ރައީސުލްޖުމްހޫރިއްޔާގެ އޮފީހާއި ރައީސުލްޖުމްހޫރިއްޔާގެ ރަސްމީ ގެކޮޅަށް 2020 ވަނަ އަހަރު ޚަރަދުތައް ކޮށްފައިވަނީ ދައުލަތުގެ މާލިއްޔަތުގެ ޤާނޫނާއި، މާލިއްޔަތުގެ ގަވާއިދާ އެއްގޮތަށްކަމަށް އޮޑިޓް އޮފީހުން ވިދާޅުވެއްޖެއެވެ.
އޮޑިޓަރ ޖެނަރަލް ނެރުއްވާފައިވާ ރައީސުލްޖުމްހޫރިއްޔާގެ އޮފީހާއި، ރައީސުލްޖުމްހޫރިއްޔާގެ ރަސްމީ ގެކޮޅަށް ޑިސެންބަރު 31، 2020 ނިމުނުއިރު މާލީ ހަރަދުކޮށްފައިވަނީ އެ އަހަރަށް ރައްޔިތުންގެ މަޖިލީހުން ފާސްކޮށްދެއްވި ބަޖެޓްގެ މަގުސަދުތައް ހާސިލުވާ ގޮތަށް ކަމަށެވެ. އަދި އެ ބަޖެޓްގައި ކަނޑައަޅާފައިވާ ކަންތައްތަކަށް ބަޖެޓްގައި ކަނޑައަޅާފައިވާ މިންވަރަށް ދައުލަތުގެ މާލިއްޔަތުގެ ގާނޫނާއި ދައުލަތުގެ މާލިއްޔަތު ގަވާއިދާ އެއްގޮތަށް ކަމަށެވެ.
އަދި އެއޮފީހުން ޚަރަދުކޮށްފައި ވަނީ ބަޖެޓުގައި ކަނޑައެޅިފައިވާ ކަންތައްތަކަށް، ބަޖެޓުގައި ކަނޑައެޅިފައިވާ މިންވަރަށް، ދައުލަތުގެ މާލިއްޔަތުގެ ޤާނޫނާއި ދަޢުލަތުގެ މާލިއްޔަތުގެ ޤަވާއިދާ އެއްގޮތަށް އޮޑިޓަރޖެނަރަލްގެ އޮފީހުންދެކޭކަމަށް މި އޮޑިޓްރިޕޯޓުގައި ފާހަގަކޮށްފައި ވެއެވެ.
މީގެ އިތުރުން ރައީސުލްޖުމްހޫރިއްޔާގެ އޮފީހުގެ އެހެނިހެން މާލީ ކަންކަން، މައިގަނޑު ގޮތެއްގައި، ހިންގައި ބަލަހައްޓާފައި ވަނީ ދައުލަތުގެ މާލިއްޔަތުގެ ޤާނޫނާއި ދަޢުލަތުގެ މާލިއްޔަތުގެ ޤަވާއިދާ އެއްގޮތައްކަންވެސް އޮޑިޓަރ ޖެނެރަލް ނެރުއްވި ރިޕޯޓުގައި ވަނީ ފާހަގަކުރައްވާފައެވެ.
މިއާއެކު ރައީސުލްޖުމްހޫރިއްޔާގެ އޮފީހުގެ މިދިޔަ މާލީ އަހަރުގެ ކޮންސޮލިޑޭޓެޑް މާލީ ބަޔާންތައް ހަދާފައި ވަނީވެސް "އިންޓަނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަޑް (އިޕްސްސް): ފައިނޭންޝަލް ރިޕޯޓިންގ އަންޑަރ ދަ ކޭޝް ބޭސިސް އޮފް އެކައުންޓިންގ" އާއި އެއްގޮތަށް ކަމުގައިވެސް އޮޑިޓަރ ޖެނެރަލް ފާހަގަކުރައްވާފައި ވެއެވެ.
މާލީ ބަޔާންތަކުގައި ބަޔާންކޮށްފައިވާ ފައިސާ ލިބުނުގޮތާއި ފައިސާ ހޭދަކުރެވުނުގޮތުގެ ބަޔާނާއި، ފާސްކުރެވުނު ބަޖެޓާއި އެބަޖެޓުން ހޭދަކުރެވުނުގޮތުގެ ބަޔާނުގެ އިތުރުން މާލީ ބަޔާންތަކާއި ގުޅޭ ނޯޓްތަކަކީ މައިގަނޑު ގޮތެއްގައި ރައީސުލްޖުމްހޫރިއްޔާގެ އޮފީހަށް ލިބުނު ފައިސާ އާއި އެފައިސާއިން ކުރެވުނު ޚަރަދާއި ނިމިގެން މިދިޔަ މާލީ އަހަރުގެ ނިޔަލަށް ބާކީ ހުރި ފައިސާ އަދި ފާސްކުރެވުނު ބަޖެޓާއި އެ ބަޖެޓުން ހޭދަކުރެވުނު ގޮތް ރަނގަޅުކަމަށް އޮޑިޓްރިޕޯޓުގައި އޮޑިޓަރ ޖެނެރަލް ވަނީ ފާހަގަކުރައްވާފައެވެ.
