ޔޫއެން ހިއުމަން ރައިޓްސް ކައުންސިލްއިން ރަޝިއަ ސަސްޕެންޑް ކޮށްފިއެވެ.
ޔޫއެން ހިއުމަން ރައިޓްސް ކައުންސިލްއިން ރަޝިއާ ސަސްޕެންޑު ކުރުމަށް އާންމު މަޖިލުހިގައި ނެގުނު ވޯޓުގައި ރަޝިއާއިން ދެކޮޅަށް 93 ގައުމަކުން ވޯޓު ދީފައިވާއިރު، ރަޝިއާ މި ކައުންސިލްއިން ސަސްޕެންޑް ކުރުމާއި ދެކޮޅަށް 24 ގައުމަކުން ވޯޓު ދީފައި ވެއެވެ. އަދި މި ވޯޓުގައި 58 ގައުމަކުން އެއްވެސް ކޮޅަކަށް ވޯޓު ދީފައި ނުވެއެވެ.
ދާދި ދެންމެއަކު ޔޫއެން ޖެނެރަލް އެސެމްބްލިގައި ބޭއްވުނު މި ވޯޓުގައި ރަޝިއާއި ދެކޮޅަށް ވޯޓުދިން ގައުމުތަކުގެ ތެރޭގައި އެމެރިކާ، އިނގިރޭސިވިލާތް އަދި ޔޫރަޕްގެ ގައުމތަކުގެ އިތުރުން ޔޫކުރެއިން ހިމެނެއެވެ. އަދި ރަޝިއާ މި ކައުންސިލުން ސަސްޕެންޑް ކުރުމާއި ދެކޮޅަށް ވޯޓު ދިން ގައުމުތަކުގެ ތެރޭގައި ޗައިނާ، ސީރިއާ އަދި ބެލަރޫސް ހިމެނެއެވެ.
އެއްވެސް ކޮޅަކަށް ވޯޓު ދީފައި ނުވާ ގައުމުތަކުގެ ތެރޭގައި އިންޑިއާއާއި މިސްރުގެ އިތުރުން ދެކުނު އެފްރިކާ ހިމެނެއެވެ.
ޔޫއެން ޖެނެރަލް އެސެމްބްލީގައި ކުރިޔަށްދިޔަ މި ވޯޓުގެ ކުރިން، ޖެނެރަލް އެސެމްބްލީގައި ވާހަކަ ދައްކަވަމުން، ޔޫކުރެއިންއިން ޔޫއެންއަށް ކަޑައަޅުއްވާފަ ހުންނަވާ ސަފީރުވަނީ، ރަޝިއާއިން ޔޫކުރެއިންގައި އިންސާނިއްޔާތާއި ޚިލާފް ޖަރީމާތައް ހިގާފައިވާކަމުގެ ތުހުމަތު ތަކުރާރު ކުރައްވާފައެވެ.
ރަޝިއަ ޔޫއެން ހިއުމަން ރައިޓްސް ކައުންސުލްއިން ސަސްޕެންޑް ކޮށްފައި މިވަނީ، ރަޝިއާގެ އަސްކަރިއްޔާއިން ޔޫކުރެއިންގެ ވެރިރަށް ކީވް ހިމެނޭ ސަރަހައްދުގައި އޮންނަ ޓައުނެއް ކަމުގައިވާ ބުޗާގައި ރަޝިއާއިން ސިފައިން ގަތުލުއާންމެއް ހިންގާފައިވާކަމަށް ދުނިޔޭގެ ގިނަ ގައުމުތަކުން ތުހުމަތު ކޮށްފައި ވަނިކޮށެވެ. އަދި ރަޝިއާގެ އަމަލްތައް ކުށްވެރިކޮށް، ގިނަ ގައުމުތަކުން މިހާރުވަނީ ރަޝިއާގެ ސަފީރުންވެސް އަބުރާ ފޮނުވާލާފައެވެ. މީގެތެރޭގައި ޔޫރަޕްގެ ގިނަ ގައުމުތައްވެސް ހިމެނެއެވެ. އަދި ދުނިޔޭގެ ގައުމުތަކުން ދަނީ ރަޝިއާގެ ޖަރީމާތަކަށް ބައިނަލްއަގުވާމީ ތަހުގީގެއް ހިންގުމަށް ގޮވާލަމުންނެވެ.
ރަޝިއާއިން ވަނީ މި ތުހުމަތުތައް ދޮގު ކޮށްފައެވެ. އަދި ބުނެފައިވަނީ، މިއީ ޔޫކުރެއިންއިން އެގައުމު ބަދުނާމު ކުރުމަށް ހިންގާފައިވާ ޖަރިމާތަކެއް ކަމުގައެވެ.
