އިންޑިއަން ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް (އެޗްއައިސީޑީޕީ) ގެ ގްރާންޓް އެސިސްޓަންޓް ސްކީމްގެ ދަށުން އިތުރު ހަތް މަޝްރޫއަކަށް ފަންޑުކުރަން ނިންމައިފިއެވެ.
މި މަޝްރޫއުތަށް އިއުލާނު ކުރެވިފައި ވަނީ އެކްސްޓާނަލް އެފެއާޒް މިނިސްޓަރު ޑރ. ޖައިޝަންކަރު ރާއްޖެއަށް ދާދި ފަހުން ކުރެއްވެވި ދަތުރުފުޅުގައެވެ. 132 މިލިއަން އިންޑިއަން ރުޕީސް (27 މިލިއަން ދިވެހި ރުފިޔާ) ހިނގާނެ ކަމަށް އަންދާޒާކުރެވޭ މި ހަތް މަޝްރޫއު ވަނީ ރާއްޖޭގެ ހަތް އަތޮޅަަކަށް ބަހާލެވިފައެވެ.
އިންޑިއާގެ އެހީގައި ކުރިއަށްގެންދާ ހަތް މަޝްރޫއަކީ:
– ކުޅުދުއްފުށީ ހޮސްޕިޓަލުގައި އޯޑިއޮލޮޖީ ޔުނިޓް
– ނިލަންދޫގައި މާބުދުގެ އާއި ތ. ދިޔަމިގި ގަނޑުވަރުގައި ސައިޓް މިއުޒިމްތައް
– މަނަދޫގައި މަލްޓި ސްޕޯޓްސް ކޮމްޕްލެކްސް
– ހުޅުމާލެ ހޮސްޕިޓަލްގައި ޕްރޮސްތެޓިކްސް އަދި އޯރތޮޓިކްސް ފެސިލިޓީ
– ގެމަނަފުށީގައި ޒުވާނުންގެ މަރުކަޒު
– ދިއްގަރުގައި ޒުވާނުންގެ މަރުކަޒު
– އައްޑޫ އިކުއަޓޯރިއަލް ހޮސްޕިޓަލްގައި މެންޓަލް ހެލްތު ޔުނިޓު
ހައި ކޮމިޝަނުން ފާހަގަ ކުރި ގޮތުގައި މި ހަތް މަޝްރޫއާއެކު އެޗްއައިސީޑީޕީ އިން ރާއްޖޭގައި ހިންގާ މަޝްރޫއުތަކުގެ އަދަދު 27 އަށް އަރައެވެ. މީގެ ތެރެއިން ދެ މަޝްރޫއު ކަމަށްވާ "ވިލުނު" ޑްރަގް ޑިޓޮކްސިފިކޭޝަން އެންޑް ރިހެބިލިޓޭޝަން ސެންޓަރާއި އައްޑޫ މީދޫގައި އިކޯ ޓޫރިޒަމް ޒޯން ވަނީ ޖައިޝަންކަރު ދާދި ފަހުން ކުރެއްވި ދަތުރުގައި އިފްތިތާހުކޮށް ދެއްވައިފައެވެ.
އެޗްއައިސީޑީޕީ އިން މަޝްރޫޢުތައް ހިންގާ ދާއިރާތަކުގެ ތެރޭގައި ހިމެނެނީ މަސްވެރިކަމާއި، އިކޯ-ޓުއަރިޒަމް، ދެމެހެއްޓެނިވި ތަރައްގީ، ދަނޑުވެރިކަން، ސަގާފަތާއި ތަރިކަ، ސިއްޙީ، ރަށްރަށުގެ އިންފްރާސްޓްރަކްޗަރ އާއި ތަޢުލީމުގެ ދާއިރާއެވެ. ރާއްޖޭގައި ހިންގޭ އެޗްއައިސީޑީޕީ މަޝްރޫއުތަކަށް ޖުމްލަ 155 މިލިއަން ދިވެހި ރުފިޔާ ކަނޑައެޅިފައިވެއެވެ.
މި 27 މަޝްރޫއުގެ އިތުރުން އިންޑިއާގެ ފަރާތުން ފޯރުކޮށްދޭ 106 މިލިއަން ދިވެހި ރުފިޔާގެ ހިލޭ އެހީގެ ދަށުން އިތުރު 18 މަޝްރޫޢުއެއްވަނީ ރާއްޖެއަށް ކަނޑައަޅުއްވާފައިއެވެ. މީގެ ތެރެއިން 15 މަޝްރޫޢުއެއްވަނީ މިހާރު ނިންމާ އިފްތިތާހްކުރެވިފައެވެ.
