މާލެ ސިޓީ ކައުންސިލްގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ރައީސާއަަކަށް އެމްޑީޕީން ކެނޑިޑޭޓަކު ނެރެ، ތްރީލައިން ވިޕެއް ނެރެފައި ވަނިކޮށް، އެމަޤާމަށް އަދާލަތު ޕާޓީގެ ބޭފުޅަކު ހޮވައިފިއެވެ.
ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީއަށް ނިސްބަތްވާ މަރިޔަމް ޝިމާޒާ ރައީސާއަކަށް ހޮވިފައިވާއިރު މިއަދުގެ އިންތިހާބަށް އެމްޑީޕީގެ މެމްބަރު ރަޝީދާ ރަޝާދާ އިންތިޚާބު ކުރުމަށް ވަނީ ތްރީލައިން ވިޕެއްވެސް ނެރެފައެވެ. އަންހެނުންގެ ކޮމެޓީގެ ސާފު މެޖޯރިޓީ އެމްޑީޕީއަށް އޮތް ނަމަވެސް މިއިންތިޚާބުގައި އެމްޑީޕީ ބަލިވެފައިވަނީ އަދާލަތުގެ ކެނޑިޑޭޓަށް އެމްޑީޕީގެ ގިނަ މެމްބަރުން ވޯޓު ދިނުމުންނެވެ.
އަންހެނުންގެ ކޮމެޓީގައި ހިމެނޭ މެމްބަރުންގެ ތެރެއިން މިއަދުގެ ވޯޓުގައި، ބައިވެރިވީ 17 އަންހެން ކަނަބަލުންނެވެ. އެމްޑީޕީ މެމްބަރު ރަޝީދާއަށް ލިބުނީ 6 ވޯޓެވެ. އަދާލަތު ޕާޓީގެ މެމްބަރު ޝިމާޒާއަށް ލިބިފައިވަނީ 9 ވޯޓެވެ. އެއްވޯޓް ބާތިލް ވޯޓެވެ.
ޝިމާޒާ އެ މަގާމަށް އިންތިހާބު ކޮށްފައިވަނީ ކުރީން އެ މަގާމުގައި ހުންނެވި އެމްޑީޕީއަށް ނިސްބަތްވާ ފާތިމަތު ޝިފާ މާޗް 15 ވަނަ ދުވަހު އެ މަގާމުން އިސްތިއުފާ ދެއްވުމާއި ގުޅިގެން އާ ރައީސާއަކު ހޮވުމަށް މިއަދު ބޭއްވުނު ވޯޓުގައެވެ.
