ރަޝިއާ ސިފައިން ޔޫކުރެއިންގައި ހިންގާފައިވާ ޖަރީމާތައް ހާމަވެ، ވަކީން ޚާއްސަކޮށް ޔޫކުރެއިންގެ ބުޗާ ސްޓޭޓްގައި ރަޝިއާ ސިފައިން ހިންގާފައިވާ އިންސާނިއްޔަތާއި ޚިލާފް ޖަރީމާތައް ހާމަވަމުން ދިއުމާއެކު، އިތުރަށް ރަޝިއާއެކު މަޝްވަރާގެ މޭޒަށް އެރުމަކީ ފަސޭހަކަމެއް ނޫންކަމުގައި ޔޫކުރެއިންގެ ރައީސް ޒެލެންކީ ވިދާޅުވެއްޖެއެވެ.
ޒެލެންސްކީ މިހެން ވިދާޅުވެފައިވަނީ، ޔޫކުރެއިންވެ ވެރިރަށް ކީވްގެ އަވަށެއްކަމުގައިވާ ބުޗާއަށް ކުރެއްވި ޒިޔާރަތުގައި އެގައުމުގެ ޓީވީ މެދުވެރިކޮށް ވާހަކަ ދައްކަވަމުންނެވެ.
ރަޝިއާ ސިފައިން ބުޗާ ޓައުން ދޫކޮށް ދިއުމާއެކު އެ ޓައުންވަނީ ޔޫކުރެއިން ސިފައިންގެ ބާރުގެ ދަށަށް ގެނެސްފައެވެ. އަދި ބުޗާ ޓައުންގެ މަގުމަތިންވަނީ، ފުރަގަހަށް ދެއަތް ބަނދެ، ބަޑިޖަހާ މަރާލާފައިވާ މީހުންގެ ހަށިތައް ފެނިފައެވެ. އަދި އޭގެ އިތުރުން ބުޗާގެ އެކި ހިސާބުތަކުންވަނީ، މާރާލާފައިވާ މީހުން ވަޅުލާފައިވާ ބޮޑެތި ކަށްވަޅުތައްވެސް ފެނިފައެވެ.
"މިއީ ހަގުރާމައިގެ ބޮޑެތި ޖަރީމާތައް، ދުނިޔެއިން މިއީ ގަތުއާންމެއްގެ ގޮތުގައި ބަލައިގަންނާނެ،" ސިފައިންގެ ހެދުމުގައި، ޔޫކުރެއިންގެ ސިފައިނާއެކީ ހުންނަވާ ވާހަކަ ދައްކަވަމުން ޒެލެންސްކީ ވިދާޅުވެފައި ވެއެވެ.
"އެމީހުން ކޮށްފައިވާ ކަންކަން ފެނުމުން، އެމީހުންނާއެކީ އިތުރަށް މަޝްވަރާ ކުރުން ފަސޭހައެއް ނޫން، ޒެލެންސްކީ ވިދާޅުވިއެވެ. "އަހަރެމެންނަށް އިގޭ އެމީހުންވަނީ އެތައްހާސް ބަޔަކު މަރާލާފައިކަން، އަންހެނުން ރޭޕްކޮށް، އެތައް ކުޑަކުދިންނެއް ގަތުލު ކޮށްފައި."
ޒެލެންސްކީގެ ވާހަކަތަކަށްފަހު، ޔޫކުރެއިންގެ އޮފިޝަލުންވަނީ، ކުޑަކުދިންގެ ތިބޭ ބިލްޑިންއެއްގެ ބިމު އަޑީގެ ބިންގަރާހަކަށް ނޫސްވެރިން ގެންގޮސް، ރަޝިއާއި ސިފައިން މަރާލާފައިވާ ބައެއް މީހުންގެ ހަށިތައް ދައްކާލާފައެވެ. މިތަނުގައި މަރާލާފައިވާ 5 މީހުން މަރާލާފައިވަނީ އެމީހުންގެ ދެއަތް ފުރަގަހަށް ބަނުމަށްފަހުއެވެ.
ޔޫކުރެއިންގެ އޮފިޝަލުން ބުނެފައިވަނީ، އާންމު ހެނދުމުގައިތިބި މިމީހުން މަރާލާފައިވަނީ، ޔުކުރެއިން ސިފައިންގެ ބާރުގެދަށް މިސިޓީ އައުމުގެ ކުރިން ކަމުގައެވެ.
ރަޝިއާ ސިފައިން ބުޗާގައި ހިންގާފައިވާ އިންސާނިއްޔަތާއި ޚިލާފް ޖަރީމާތައް ދުނިޔޭގެ ގައުމުތަކުން ދަނީ ކުށްވެރި ކުރަމުންނެވެ. އަދި ރަޝިއާގެ އަމަލްތައް ކުށްވެރިކޮށް، ގިނަ ގައުމުތަކުން މިހާރުވަނީ ރަޝިއާގެ ސަފީރުން އަބުރާ ފޮނުވާލާފައެވެ. އަދި ދުނިޔޭގެ ގައުމުތަކުން ދަނީ ރަޝިއާގެ ޖަރީމާތަކަށް ބައިނަލްއަގުވާމީ ތަހުގީގެއް ހިންގުމަށް ގޮވާލަމުންނެވެ.
ރަޝިއާއިން ވަނީ މި ތުހުމަތުތައް ދޮގު ކޮށްފައެވެ. އަދި ބުނެފައިވަނީ، މިއީ ޔޫކުރެއިންއިން ރަޝިއާ ބަދުނާމު ކުރުމަށް ހިންގާފައިވާ ޖަރިމާތަކެއް ކަމުގައެވެ.
