ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކާއެކު ހިފި އެގައުމުގެ ވެރިރަށް ކީވްގެ ހުރިހާ ސަރަހައްދެއް އަލުން ޔޫކުރެއިން ސިފައިން މިހާރު ހިފާފައިވާކަން އެގައުމުގެ ޑެޕިއުޓީ ޑިފެންސް މިނިސްޓަރު ހާމަކޮށްފިއެވެ.
އަދި އޭގެ އިތުރުން ހަމަގުރާމަ ފެށުނުތަނާކަހަލަ ގޮތަކަށް ރަޝިއާއިން ހިފި، ޔޫކުރެއިންގެ ވެރިރަށް ކީވްގެ ކައިރީގައި އޮންނަ އެއަރ ފީލްޑެއް ކަމުގައިވާ ހޯސްޓްމެލް އެއަރޕޯޓު ދޫކޮށް މިހާރު ރަޝިއާ ސިފައިން ގޮސްފައިވާއިރު، ރަޝިއާ ސިފައިން ދޫކޮށް ގޮސްފައިވާ ހިސާބުތަކުގައި އާންމު ރައްޔިތުންނަށް ލިބިގެން ގޮސްފައިވާ ބޮޑެތި ގެއްލުންތައް މިހާރުދަނީ ހާމަވަމުންނެވެ. ހޯސްޓްމެލް އެއަރޕޯޓަކީ އެތަނަށް ދިން ހަމަލާތަކުގައި، ދުނިޔޭގެ އެންމެ ބޮޑު މަތިންދާ ބޯޓަށް ހަލާކުވެގެންދިޔަ އެއަރޕޯޓެވެ.
ރަޝިއާއިން ދޫކޮސް ގޮސްފައިވާ އެއް އަވަށް ކަމުގައިވާ ޔޫކުރެއިންގެ ބުޗާ ޓައުންގެ މަގުތައްމަތިން މިހާތަނަށް މަރުވެފައިވާ 20 މީހެއްގެ ހަށިގަޑުވަނީ ފެނިފައެވެ. އަދި މީގެ އޮތުރުން ރަޝިއާ ސިފައިންގެ ބާރުގެދަށުން މިނިވަން ކޮށްފައިވާ ޔޫކުރެއިންގެ އެހެން އަވަށެއް ކަމުގައިވާ އިރުޕިންގައި 200 މީހަކު މަރުވެފައި ވާކަމުގައި މީޑިއާތަކުން ވަނީ ރިޕޯޓު ކޮށްފައެވެ. މި ސިޓީއަކީ، ވެރިރަށް ކީވްގެ ހުޅަގު އުތުރުން އޮންނަ އަވަށެކެވެ.
ރަޝިއާއިން ޔޫކުރެއިންގެ ވެރިރަށް ކީވްގެ އަވަށްތަކުންނާއި އަދި ކައިރި ސަރަހައްދުތައް ދޫކޮށް ގޮސްފައިވާއިރު، ޔޫކުރެއިންގެ ރައީސް ޒެލެންސްކީ އެެންމެފަހުން ދެއްވި ވީޑިއޯ ޚިތާބުގައި ވިދާޅުވެފައިވަނީ، ރަޝިއާ ސިފައިންގެ މިހާރުގެ ހުރިހާވެސް އަމާޒަކީ އެގައުމުގެ އިރުމައްޗާއި ދެކުނުގެ ސަރަހައްދުތައް ކަމުގައެވެ. އަދި ރަޝިއާއިން ހިފާފައިވާ ކުރައިމިއާ ސަރަހައްދާ ގުޅިފައި އޮންނަ އަވަށެއް ކަމުގައިވާ މަރިއޮޕޯލް ދިފާއު ކުރަމުންދާ ޔޫކުރެއިން ސިފައިންނަށް ޒެލެންސްކީވަނީ ވަރަށް ބޮޑަށް ތަޢުރީފް ކުރައްވާފައެވެ.
ފާއިތުވެ 3 ހަފްތާތެރޭގައި ރަޝިއާއިން ހިފުމަށް ހަގުރާމަ ކުރަމުންދާ، 450،000 އެއްހާ މީހުންގެ އާބާދީއެއް އޮންނަ މަރިއޮޕޯލްއަކީ، ހަގުރާމާގައި މިހާރު އެ ސިޓީގެ ހުރިހާ އިމާރާތްތަކެއް ކަހަލަގޮތަކަށް ބިމާއިހަމަވެގެން ގޮސްފައިވާ ސިޓީއެކެވެ. އަދި ސިޓީގެ އެތައްބަޔަކު މަރުވެފައިވާއިރު، ސިޓީގެ އާބާދީގެ %90 މީހުންވަނީ ސިޓީ ދޫކޮށް ގޮސްފައެވެ.
ރަޝިއާއިން ކުރިން އުއްމީދުކުރި ގޮތަށް މުޅި ޔޫކުރެއިން އެގައުމުގެ ބާރުގެ ދަށަށް ނުގެނެވުމުން، އެގައުމުގެ މިހާރުގެ އަމާޒަކީ، ޔޫކުރެއިންގެ އެއްބައި ރަޝިއާއިން ކޮންޓްރޯލް ކުރާގޮތަށް، މުޅި ޔޫކުރެއިން ދެބަޔަކަށް ބަހާލުން ކަމަށް، ޔޫކުރެއިން މިލިޓަރީ އިންޓެލިޖެންސުން ކުރިން ވަނީ ބުނެފައެވެ.
ޔޫކުރެއިންއަށް އުދުވާނީ ހަމަލާ ދޭން ފެށުމުގެ ކުރިން، ފާއިތުވެދިޔަ ފެބްރުއަރީމަހު ރަޝިއާގެ ރައީސް ލާޑިމިރު ޕުޓިންވަނީ، ޔޫކުރެއިންގެ އިރު ދެކުނުގައި ވަކިވެގަތުމަށް ހަނގުރާމަ ކުރަމުންދާ ދެ ސަރަހައްދަކީ މިނިވަން ދެ ދައުލަތުގެ ގޮތުގައި ބަލައިގެންފައެވެ.
