ޔޫކުރެއިން ބޯޑަރު ކައިރިން، ރަޝިއާގެ ސަރަހައްދުގައި ހުރި ތެޔޮ ރައްކާކުރާ ތާނގީތަކަށް ހެލިކޮޕްޓަރތައް ބޭނުންކޮށްގެން ހަމަލާދީ ރޯކޮށްލީ ޔޫކުރެއިންކަމުގައި ރަޝިއާއިން ތުހުމަތު ކޮށްފިއެވެ.
ޔޫކުރެއިންއާއި އިންވެގެން އޮންނަ ރަޝިއާގެ ބެލްގޮރޮޑް ރީޖަންގެ މޭޔަރު ތުހުމަތު ކުރައްވާފައިވާ ގޮތުހައި ޔޫކުރެއިންގެ އަސްކަރިއްޔާގެ 2 ހެލިކޮޕްޓަރެއް ވަނީ ވަރަށް ތިރިން އުދުހި، ހުކުރުދުވަހުގެ ހެނދުނުގެ ވަގުތެއްގައި ރަޝިއާގެ ބޯޑަރު ހުރަސް ކޮށްފައެވެ. އަދި މި ދެހެލިކޮޓަރުން ދީފައިވާ ހަމަލާތަކުގެ ސަބަބުން އެތައް މިލިއަން ގެލޮންގެ ތެޔޮ ރައްކާ ކޮށްފައިހުރި ޓޭންކުތަކުގައި ދަނީ ރޯވެ އަނދަމުންނެވެ.
ރަޝިއާގެ މި ތުހުމަތުތަކަށް އެއްވެސް ކޮމެންޓެއް ކުރުމަށް ޔޫކުރެއިންގެ ޑިފެންސް މިނިސްޓްރީންވަނީ ދެކޮޅު ހަދާފައެވެ.
"އަހަރެން ފާހަގަ ކޮށްލާން ބޭނުންވަނީ، ޔޫކުރެއިންގެ އަސްކަރިއްޔާއިން ދަނީ، އެގައުމުގެ ސަރަހައްދުގައި، ރަޝިއާގެ އުދުވާންއިން ސަލާމަތްވުމަށް އަސްކަރީ އޮޕަރޭޝަންތައް ހިންގަމުން،" ޔޫކުރެއިންގެ ޑިފެންސް މިނިސްޓްރީގެ ތަރުޖަމާން އޮލެސްކަންދަރު މޮޓުޒިޔަނީކް ވިދާޅުވެފައި ވެއެވެ.
"އޭގެ މާނައަކީ، ރަޝިއާގެ ސަރަަހައްދަގައި ހިގާ ހުރިހާ ގޯހެއްގެ ނުވަތަ، ހިނގާ ކޮންމެ ކާރިސާއެއްގެ ހުރިހާ ޒިންމާއެއް ޔޫކުރެއިން ނަގަން ޖެހުމެއް ނޫން. މިއީ މިފަދަ ތުހުމަތުތައް ޔޫކުރެއިންއަށް އަމާޒު ކުރެވިގެންދާ ފުރަތަމަ ފަހަރެއް ނޫން. އެހެންކަމުން ތިމައުލޫމާތު ތެދު ކުރާކަށްވެސް އަދި ދޮގު ކުރާކަށްވެސް ނެތިން."
ޔޫކުރެއިންގެ ބޯޑަރުކައިރިން، ރަޝިއާގެ ސަރަހައްދުގެ ތެރެއިން ދެ ހެލިކޮޕްޓަރެއް ވަރަށް ތިރިން އުދުހިފައިދާ މަންޒަރުތައް ވަނީ ސޯޝަލް މީޑިއާގެ ބައެއް ވީޑިއޯތަކުން ފެނިފައެވެ. އެހެންނަމަވެސް މިއީ ޔޫކުރެއިންގެ ހެލިކޮޕްޓަރުތަކެއްކަން އެއްވެސް ފަރާތަކުން ޔަގީން ކޮށްދީފައެއް ނުވެއެވެ.
