ޓިއުނީޝިއާގެ ރައީސް ކައިސް ސައިދު އެގައުމުގެ ގާނޫނުހަދާ މަޖިލިސް އުވާލައިފިއެވެ.

އެއް އަހަރަށްވުރެ ދިގު މުއްދަތަކަށް ސަސްޕެންޑްކޮށްފައިވާ ޓިއުނީޝިއާގެ ގާނޫނުހަދާ މަޖިލިސް ސައިދު އުވާލާފައިވަނީ، ގާނޫނުހަދާ މަޖިލިސް އުވާލުމަށް އޭނާ ނެރުއްވާފައިވާ ގަރާރު އުވާލުމަށް މެމްބަރުން ވޯޓު ލުމަށް މަސައްކަތް ކުރައްވަމުން ގެންދަވަނިކޮށެވެ.

ޓިއުނީޝިއާގެ ގާނޫނުހަދާ މަޖިލިހުގެ މެމްބަރުން އޮންލައިންކޮށް ދޮޅުގަޑިއިރު ވަންދެން ބޭއްވި އޮންލައިން ޖަލްސާއަށްފަހު، ގާނޫނުހަދާ މަޖިލިސް އުވާލައްވަމުން ސައިދު ވިދާޅުވެފައިވަނީ، ގާނޫނުހަދާ މަޖިލިހުން ބައާވާތެއް ގެންނަން މަސައްކަތް ކޮށްފައިވާ ކަމަށެވެ. އަދި ދައުލަތުގެ ސަލާމަތީ ބާރުތަކާއި ގުޅޭގޮތުން ހަގީގަތާއި ޚިލާފު ތުހުމަތުތައް ކޮށްފައިވާކަމަށް ވިދާޅުވެ، އޭނާވަނީ މަޖިލިސް މެމްބަރުންގެ މައްސަލަ ތަހުގީގުކުރުމަށް ސަލާމަތީ ބާރުތަކަށް އަމުރު ކުރައްވާފައެވެ.

ޓިއިނީޝިއާގެ ގާނޫނުހަދާ މަޖިލިހުން ބޭއްވުމަށް މަސައްކަތްކުރި ޖަލްސާއާއި، އަދި މި ޖަލްސާއަށްފަހު ސައިދު އެޅުއްވި ފިޔަވަޅުތަކާއި ގުޅިގެން، ޓިއުނީޝިއާގެ ސިޔާސީ މަސްރަހު އަނެއްކާވެސް ވަނީ ހަލަބޮލި ވެފައެވެ. އަދި ސައިދު އެއްކުރައްވާފައިވާ ބާރުތައް އޭނާގެ އަތުން އަތުލުމަށް އުވާލެވުނު ގާނޫނުހަދާ މަޖިލިހުގެ މެމްބަރުން އިތުރަށް މަސައްކަތް ކުރައްވާނެކަމެއް އަދި ސާފުވެފައެއް ނުވެއެވެ.

ޓިއުނީޝިއާގެ ގާނޫނުހަދާ މަޖިލިހުގެ އޮންލައިން ސެޝަންއަށް ހާޒިރުވި މެމްބަރުންގެ ތަހުގީގު ކުރިޔަށް ގެންދިއުމަށް ސައިދު އުމުރުކުރައްވާފައި ވުމާއެކު، ޓިއުނީޝިއާގެ ސަލާމަތީ ބާރުތަކުން، މިއިން އެއްވެސް މެމްބަރަކު ހައްޔަރު ކުރުމަށް މަސައްކަތް ފަށައިފި ހާލަތެއްގައި، އިދިކޮޅު ފަރާތްތަކާއި ޓިއުނީޝިއާގެ ރައީސް ސައިދުއާ ދެމެދު އުފެދިފައިވާ މައްސަލަތައް އިތުރަށް ގޯސްވެގެން ދާނެކަމުގައި މީޑިއާތަކުން ވަނީ ރިޕޯޓު ކޮށްފައެވެ.

"ދައުލަތް ބައިބައި ވެގެންދިއުމުން ސަލާމަތް ކުރަން ޖެހޭނެ.. އަދި ނާޖާއިޒު ފައިދާ ނަގަން މަސައްކަތް ކުރާފަރާތްތަކަށް ދައުލަތާއި ދެކޮޅަށް އުދުވާން ހިންގުމަށް ފުރުސަތެއް ނުދެވޭނެ،" އޮންލައިން ކޮށްފައިވާ، ސައިދުގެ ވީޑިއޯ މެސެޖުގައި އޭނާ ވިދާޅުވެފައި ވެއެވެ.

ފާއިތުވެދިޔަ އަހަރުގެ ޖުލައިކަހު، ކައިސް ސައިދު އެގައުމުގެ ގާނޫނުހަދާ މަޖިލިސް ސަސްޕެންޑު ކުރުމާއެކު، އިދިކޮޅު ފަރާތްތަކުން ބުނެފައިވަނީ އޭނާ ގެނެސްފައިވަނީ ބަޢާވާތެއް ކަމުގައެވެ.

ގާނޫނުހަދާ މަޖިލިސް އުވާލެއްވުމަށްފަހު ސައިދުވަނީ ގާނޫނު އަސާސީގެ ގިނަ ބާރުތައް އަމިއްލަ އަތްޕުލަށް ނަންގަވާފައެވެ.