ސައުދީ އަރަބިއާގެ ހުރިހާ މުސްލިން ރައްޔިތުންވެސް އަންނަ ހުކުރު ދުވަހުގެ ހަވީރު ރޯދައަށް ބެލުމަށް އެގައުމުގެ ސުޕްރީމް ކޯޓުން އަންގާފައި ވާކަމަށް، ސައުދީ ސަރުކާރުގެ ނޫސް އޭޖެންސީން (SPA) އިން ބުދަވުވަހު ބުނެފިއެވެ.
ސައުދީގެ ސުޕްރީމް ކޯޓުން އަންގާފައިވާ ގޮތުގައި، ހަމަ ލޮލަށް، ނުވަތަ ބިނޮކިއުލާ (ހަނދު ބަލާ ދުރުމީ)ގެ ބޭނުން ކޮށްގެން ހަނދު ފެނިއްޖެ ކޮންމެ މީހަކު އެންމެ ކައިރީގަ ހުރި ކޯޓަކަށް ބަޔާން ދިނުމަށް ނުވަތަ، ކޯޓަށް ބަޔާން ދިނުމުގެ އިންތިޒާމްތައް ހަމަޖެއްސުމަށްޓަކާ އެންމެ ކައިރީގެ ހުރި ދައުލަތުގެ މުއްސަސާއަކަށް އަންގަން ވާނެއެވެ.
354 ނުވަތަ 355 ދުވަހުގެ މައްޗަށް އެކުލެވިގެންވާ ހިޖުރީ އަހަރުގެ މަސްތައް ކަނޑައެޅިގެން ދަނީ ހަނދުގެ ދައުރުވުމާ އެއްގޮތަށެވެ. އަދި އިސްލާމީ ކަލަންޑަރުގެ 9ވަނަ މައްސަރު ކަމުގައިވާ ރޯދަމަސް ފެށިގެންދަނީ ހަނދު ފެނުނުކަން ސާބިތު ކުރުމަށްފަހުއެވެ.
މިއަހަރުގެ ރޯދަމަހު، ދުނިޔޭގެ އެކި ކަންކޮޅުތަކުގައި 1.5 ބިލިއަން މުސްލިމުން ރޯދަމަހަށް މަރުހަބާ ކިޔާނެއެވެ. ރަމަޟާން މަހަކީ އިސްލާމީ މައްސަރުތަކުގެ ތެރެއިން އެންމެ މާތް އެއް މައްސަރެވެ. އަދި އެމަހަކީ އެމަހެއްގައި ގުރުއާން ބާވާލެއްވުނު މައްސަރުވެސް މެއެވެ. އެމަހުގައި އަދާކުރާ އެންމެ މުހިންމު އަޅުކަން ކަމުގައިވާ ރޯދައަކީ އިސްލާމް ދީނުގެ 5 ރުކުންތަކުގެ ތެރޭގައި ހިމެނޭ އެއް ރުކުނެވެ.
މުސްލިމުން ފާހަގަކުރާ ދެ އީދުގެތެރެއިން ފިތުރު އީދު އަންނަނީ ރަމަޟާންމަސް ނިމުމާއިއެކުއެވެ.
