ރަޝިއާއިން ފާއިތުވި ފެބްރުއަރީމަހުގެ 24ވަނަ ދުވަހު ޔޫކުރެއިންއަށް އުދުވާނީ ހަމަލާ ދޭންފެށި ފަހުން، މިހާތަނަށް ރަޝިއާގެ 17،200 ސިފައިން މަރުވެފައިވާ ކަމުގައި ޔޫކުރެއިންއިން ބުނެފިއެވެ.
އޭގެ އިތުރުން، ހަނގުރާމާގައި ރަޝިއާގެ 597 ޓޭންކާއި، ހަނގުރާމަމަތީ 1,710 އުޅަނދާއި، 127 ޖެޓާއި، 129 ހެލިކޮޕްޓަރާއި އަދި ރަޝިއާގެ އަސްކަރިއްޔާގެ ކަނޑުމަތީ 7 އުޅަނދުވެސް ހަލާކު ކޮށްލާފައި ވާކަމަށް، ޔޫކުރެއިންގެ އަސްކަރިއްޔާގެ ފޭސްބުކް އެކައުންޓުގައި ހާމަ ކޮށްފައިވާ މައުލޫމާތުތަކުގެ ތެރޭގައި ހިމެނެއެވެ.
އެހެންނަމަވެސް، މި ހަފްތާގެ ހުކުރުދުވަހު، ރަޝިއާއިން ބުނެފައިވަނީ، ހަނގުރާމާގައި މިހާތަނަށް މަރުވެފައިވަނީ، އެގައުމުގެ 1,351 ސިފައިން ކަމުގައެވެ.
ރަޝިއާގެ ގިނަ އަދަދައްގެ ސިފައިން ހަނގުރާމާގައި މަރާލާފައިވާކަމަށް ޔޫކުރެއިން ބުނެފައިވާއިރު، ރަޝިއާއިން ޔޫކުރެއިންގެ ވެރިރަށް ހިފުމަށް ކުރިޔަށް ޖެހެމުންއައި އައުންވަނީ އެކީ ކަހަލަގޮތަކަށް މަޑުޖެހިފައި ކަމަށް ބޭރުގެ މީޑިއާތަކުން ވަނީ ރިޕޯޓު ކޮށްފައެވެ.
އެހެންނަަމަވެސް ރަޝިއާއިން ޔޫކުރެއިންގައި ކުރަމުން އަންނަ ހަނގުރާމައިގެ ފުރަތަމަ މަރުހަލާ ނިމުމަކަށް އައިސްފައިވާކަމަށް ވިދާޅުވެ، ރަޝިއާއިން މިހަނގުރާމައިގައި މިހާރު ގެންގުޅެމުން އަންނަ ސިޔާސަތު އެގައުމުގެ އަސްކަރީ އިސް ޖެނެރަލަކު ހުކުރު ދުވަހު ވަނީ ހާމަ ކުރައްވާފައެވެ.
ރަޝިއާގެ އަސްކަރިއްޔާގެ ފަރާތުން ހާމަ ކޮށްފައިވާ ގޮތުގައި، އެގައުމުގެ އަސްކަރިއްޔާއިން ޔޫކުރެއިންގައި ކުރަމުން އަންނަ ހަގުރާމާގައި މިހާރުގެ އެންމެ ބޮޑު އަމާޒަކީ، ޔޫކުރެއިންގެ އިރުމަތީގައި މިނިވަންކަން އިއުލާންކޮށްފައިވާ ޑޮމްބަސް ސަރަހައްދު އެކީ ހިމާޔަތް ކުރުމެވެ.
"ހިންގަމުންދާ އަސްކަރީ އޮޕްރޭޝަންގެ ފުރަތަމަ މަރުހަލާ މިހާރުވަނީ ނިމުމަކަށް އައިސްފަ،" ހުކުރުދުވަހު ބޭއްވި ނިއުސް ބްރީފިންގައި ރަޝިއާގެ ޖެނެރަލް ސްޓާފުގެ ފަރސްޓް ޑެޕިއުޓީ ޗީފް ކާނަލް ޖެނެރަލް ސާރޖީ ރުޑްސްކޮއި ވިދާޅުވެފައި ވެއެވެ.
"ޔޫކުރެއިންގެ އަސްކަރިއްޔާގެ އަސްކަރީ ގާބިލްކަން ވަނީ ވަރަށް ބޮޑުތަނުން ދަށް ކުރެވިފައި، އޭގެ ނަތިޖާއެއްގެ ގޮތުން އެންމެ މުހިންމު އަމާޒަށް ވާސިލްވުމަށް ވަރަށް ބޮޑުތަނުން މަގުފަހި ވެއްޖެ، އެއީ ޑޮންބަސް (ވަކިވެގަތުމަށް ހަނގުރާމަކުރާ ސަރަހައްދު) މިނިވަންކުރުން."
ކާނަލް ޖެނެރަލް ސާރޖީ ރުޑްސްކޮއި މިހެން ވިދާޅުވެފައި ވަނީ، ރަޝިއާ ސިފައިން ޔޫކުރެއިންގެ ވެރިރަށް ކީވްއާއި އަދި ވެރިރަށް ކައިރިން އޮންނަ ކާކިވްއާއި ދިމާލަށް ކުރިއަރަމުންއައި އައިއުން އެކީ ކަހަލަ ގޮތަކަށް މަޑުޖެހި، ޔޫކުރެއިންގެ ވައިގެ ސަރަހައްދުވެސް ރަޝިއާގެ ބާރުގެދަށަށް ގެނައުމުގައި އެގައުމު ފެއިލްވެގެން ގޮސްފައިވާކަމަށް ޔުރަޕާއި ހުޅަނގުގެ ގައުމުތަކުން ބުނަމުން ދަނިކޮށެވެ.
