ހަނގުރާމަ ހުއްޓާލުމާއި ބެހޭގޮތުން މަޝްވަރާ ކުރުމަށްޓަކާ ރަޝިއާއިން ޔޫކުރެއިންގެ ޑެލިގޭޝަންތަކުގެ ބޭފުޅުން ތުރުކީގެ ވެރިރަށް އިސްތަމްބޫލްއަށް ވަޑައިގެންފިއެވެ.
ރަޝިއާއި ޔޫކުރެއިންގެ ޑެލިގޭޝަންގެ ޓީމުގެ ބޭފުޅުން، ތުރުކީގެ ރައީސް އެރެދޮގާންގެ އޮފީސް ހުންނަ، އިސްތަމްބޫލްގެ ބޮސްފޯރަސްގެ އައްސޭރީގެ ޑޮލްމަބޭޗްއަށް ވަޑައިގެން، މަޝްވަރާތައް ފަށާފައިވަނީ މޫނާއި މޫނު ދިމާވާގޮތަށް އެތުރާފައިވާ މޭޒުތަކުގެ ދެފަރާތުގައި ތިބެގެންނެވެ. އަދި މަޝްވަރާތައް ފެށުމުގެ ކުރިން ތުރުކީގެ ރައީސް އެރެދޮގާންވަނީ މަޝްވަރާގެ ބައިވެރިންނާ މުޚާތަބުކޮށް ވާހަކަ ދައްކަވާފައެވެ.
މިއީ ފާއިތުވެދިޔަ 2 ހަފްތާ ތެރޭގައި ޔޫކުރެއިންއާއި ރަޝިއާގެ އޮފިޝަލުން މަސްވަރާތައް ކުރިޔަށް ގެންދިއުމަށްތަކާ އެއްތަނަކަށް ހާޒިރުވި ފުރަތަމަ ފަހަރެވެ. އެހެންނަމަވެސް، މަޝްވަރާތަކުން އާދަޔާ ޚިލާފު ނިންމުމެއް ނުކުމެދާނެކަމާމެދު ގިނަބަޔަކު އުއްމީދެއް ނުކުރެއެވެ.
ފާއިތުވި 2 ހަފްތާ ތެރޭގައި މަޝްވަރާތައް ކުރިޔަށް ގެންގޮސްފައިވަނީ އޮންލައިން ކޮށެވެ.
މަޝްވަރާތަކުގެ ބައިވެރިންނާ މުޚާތަބްކޮށް ވާހަަކަ ދައްކަވަމުން އެރެދޮގާންވަނީ، މި ހަނގުރާމައަށް ހުއްޓުމެއް ނައިސް 4 ހަފްތާއަށް ދިގުދެމިގެން ގޮސްފައިވާތީ ހިތާމަ ކުރައްވާކަމަށް ވިދާޅުވެފައެވެ. އަދި އޭނާ ވިދާޅުވި ގޮތުގައި، ދެގައުމާއެކީވެސް ތުރުކީން ބާއްވަމުން އަންނަ ގާތް ގުޅުމުގެ ސަބަބުން، ދެގައުމު ސުލްހަ ކުރުވޭތޯ މަސައްކަތް ކުރުމަކީ އެގައުމުގެ މައްޗަށް އޮތް ވާޖިބެއްކަމުގައި އޭނާ ދެކެވަޑައިގަންނަވައެވެ.
"މި ނުރައްކާތެރި ކާރިސާ ހުއްޓުމަކަށް ގެނައުމުގެ ބާރުއޮތީ ތި ދެފާރާތުގެ އަތްމަތީ،" އެރެދޮގާން ވިދާޅުވެފައި ވެއެވެ.
ތުރުކީއަކީ ނޭޓޯގެ މެމްބަރު ގައުމަކަށްވި ނަމަވެސް، އެގައުމަކީ ރަޝިއާއެކީ ގާތް ގުޅުންތަކެއް ބާއްވަމުން އަންނަ ގައުމެކެވެ. އަދި ރަޝިއާއިނ ޔޫކުރެއިންއަށް އުދުވާނީ ހަމަލާ ދޭން ފެށުމާއެކު، ހުޅަނގާއި ޔޫރަޕްގެ ގައުމުތަކުން ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ތާއީދު ކޮށްފައި ނުވާ މަދު ގައުމުތަކުގެ ތެރޭގައި ތުރުކީ ހިމެނެއެވެ. އަދި ތުރުކީން މިހާތަނަށް ރަޝިއާއާއި ދެކޮޅަށް ދަތިކުރުމުގެ ފިޔަވަޅުތައް އަޅާފައެއް ނުވެއެވެ.
