އެންމެ ފަހުގެ ޕްރެޒިޑެންޓްސް ކަޕުުގެ ޗެމްޕިއަން ކްލަބް ވެލެންސިއާގެ ކުޅުންތެރިންނަށް މުސާރަ ނުދޭތީ، އެ ކްލަބުގެ ފަރިތަކުރުންތައް ހުއްޓާލައިފިއެވެ.
ވެލެންސިއާގެ ފަރިތަކުރުންތައް ހުއްޓާލަން ޖެހުނީ މުސާރަ ނުދީގެން ކުޅުންތެރިން ފަރިތަކުރުންތަކަށް ހާޒިރުވާން ދެކޮޅު ހެދުމާއި ގުޅިގެންނެވެ. ޚަބަރު އޮންލައިންއަށް މަޢުލޫމާތު ލިބިފައިވާ ގޮތުގައި ދިވެހި ޕްރިމިއާ ލީގުގައި މިމަހުގެ 19 ވަނަ ދުވަހު މާޒިޔާ އާއި ދެކޮޅަށް ކުޅުނު މެޗަށްފަހު ވެލެންސިއާގެ ފަރިތަކުރުންތައް ބާއްވާފައެއް ނުވެއެވެ.
ފަރިތަކުރުންތައް ހުއްޓާލި މައްސަލައިގައި ކްލަބް ވެެލެންސިއާއިން ރަސްމީކޮށް އެއްވެސް އެއްޗެއް އަދި ބުނެފައެއް ނުވެއެވެ.
މުސާރާއިގެ މައްސަލައިގައި ވެލެންސިއާ އިން ފަރިތަކުރުންތައް ހުއްޓާލާފައިވާއިރު، އޭއެފްސީ ކަޕް ފުޓްބޯޅަ މުބާރާތުގެ ޕްރިލިމިނަރީ ސްޓޭޖުގައި ބޫޓާންގެ ޗެމްޕިއަން ޕަރޯ އެފްސީއާ ދެކޮޅަށް ކުޅެން ޖެހޭ މެޗު އަންނަ މަހުގެ 5 ވަނަ ދުވަހަށް އޮތީ ޝެޑިއުލްކޮށްފައެވެ. މި މެޗު ކުޅުމަށް ހަމަޖެހިފައިވަނީ މާލޭގައެވެ.
އުރީދޫ ދިވެހި ޕްރިމިއާ ލީގުގެ ފުރަތަމަ ބުރުގެ ކުޅުން މިހާރު ނިމިފައިވާއިރު، ވެލެންސިއާ އޮތީ 12 ޕޮއިންޓާއެކު ލީގުގެ 3 ވަނައިގައެވެ.
