ރަޝިއާއިން ކުރިން އުއްމީދުކުރި ގޮތަށް މުޅި ޔޫކުރެއިން އެގައުމުގެ ބާރުގެ ދަށަށް ނުގެނެވުމުން، އެގައުމުގެ މިހާރުގެ އަމާޒަކީ، ޔޫކުރެއިންގެ އެއްބައި ރަޝިއާއިން ކޮންޓްރޯލް ކުރާގޮތަށް، މުޅި ޔޫކުރެއިން ދެބަޔަކަށް ބަހާލުން ކަމަށް، ޔޫކުރެއިން މިލިޓަރީ އިންޓެލިޖެންސުން ބުނެފިއެވެ.
ޔޫކުރެއިންގެ މިލިޓަރީ އިންޓެލިޖެންސުގެ ވެރިއާ، ކިރީލޯ ބުޑަނޯވްއާއި ހަވާލާދީ، ރޮއިޓާސް ނިއުސް އޭޖެންސީން ރިޕޯޓު ކޮށްފައިވާ ގޮތުގައި، ރަޝިއާއިން ބޭނުންވަނީ، "އުތުރު ކޮރެއާއާއި ދެކުނު ކޮރެއާ" އޮންނަ ގޮތަށް، ޔޫކުރެއިން ދެބައި ކޮށްލުމަށް ކަމުގައެވެ. އަދި އޭނާ އިންޒާރު ދީފައިވާ ގޮތުގައި، ޔޫކުރެއިންގެ އަސްކަރިއްޔާއިން ވަރަށް އަވަހަށް، ރަޝިއާއިން ހިފާފައިވާ އެގައުމުގެ ސަރަހައްދު ތަކުގައި ގެރިއްލާ ހަނގުރާމަ ފަށާނެއެވެ.
ރަޝިއާއިން އެގައުމު ދެބައި ކޮށްލުމަށް ރާވަމުން ދާކަމަށް ޔޫކުރެއިންގެ ސަރުކާރުން ބުނަމުން ދާއިރު، ޔޫކުރެއިންގެ އިރިމަތީގައި އޮންނަ، ލުހާންސްކު ޕީޕަލްސް ރިޕަބްލިކްގެ ނަމުގައި އަމިއްލައަށް މިނިވަންކަން އިއުލާން ކޮށްފައިވާ ސަރަހައްދުގައި ވަކިވެގަތުމަށް ހަނގުރާމަ ކުރަމުންދާ ހަނގުރާމަވެރިންގެ ލީޑަރު ލިއޮނިޑް ޕެޝެސްނިކް އާއި ހަވާލާދީ ރަޝިއާގެ ސަރުކާރުގެ ނޫސް އޭޖެންސީ ރިއާ (RIA) އިން ރިޕޯޓުކޮށްފައިވާ ގޮތުގައި، މި ސަރަހައްދުގެ އާންމު ރައްޔިތުން ބޭނުންވާނަމަ ރަޝިއާއާއި ގުޅުމަށް ބޭނުންވޭތޯ ނުވަތަ ނުވޭތޯ ބެލުމަށް އާންމުގެ ފެންނަ ނުފެންނަ ވޯޓެއް ވަރަށް އަވަހަށް ބޭއްވިދާނެއެވެ.
ޔޫކުރެއިންއަށް އުދުވާނީ ހަމަލާ ދޭން ފެށުމުގެ ކުރިން، ފާއިތުވެދިޔަ ފެބްރުއަރީމަހު ރަޝިއާގެ ރައީސް ލާޑިމިރު ޕުޓިންވަނީ، ޔޫކުރެއިންގެ އިރު ދެކުނުގައި ވަކިވެގަތުމަށް ހަނގުރާމަ ކުރަމުންދާ ދެ ސަރަހައްދަކީ މިނިވަން ދެ ދައުލަތުގެ ގޮތުގައި ބަލައިގެންފައެވެ.
