ދިވެހި ތާރީޚުގައި މިއަދު ލިޔެވިގެންދާނީ މިނިވަންކަން ނަގާލި، ކަޅު ދުވަހެއްގެ ގޮތުގައި ކަމަށް އިދިކޮޅު ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.

އަދުރޭ މިހެން ވިދާޅުވީ އައްޑޫގައި ގާއިމްކުރި ނޭޝަނަލް ޕޮލިސިންގ އެންޑް ލޯ އެންފޯސްމަންޓް ހުޅުވުމުގެ ރަސްމިއްޔާތަށް އިޝާރާތް ކުރައްވައި ކުރެއްވި ޓުވީޓެއްގައެވެ. ރައީސް ވަނީ މިއަދު މިއެކަޑަމީ ހުޅުވުމަށް ބޭއްވި ރަސްމިއްޔާތުގައި މިމަސައްކަތުގައި ބޮޑު ދައުރެއް އަދާކޮށްފައިވާނީ ރައީސް ޔާމީނަށާއި، ރައީސް ވަހީދަށްވެސް ޝުކުރު އަދާކުރައްވާފައެވެ.

އިންޑިއާގެ މަތީފަންތީގެ ވެރިންނާއިއެކު މިއަދު އައްޑޫގައި ގާއިމްކުރި ޕޮލިސް އެކަޑަމީ ހުޅުވުމާއި ގުޅިގެން އަދުރޭ ވިދާޅުވީ މާދަމާގެ ދިވެހިދަރީން މިއަދުގެ ތާރީޚު ލިޔާނީ ގައުމުގެ ވެރީން އަމިއްލަ އެދުމަށްޓަކައި މިނިވަންކަން ނަގައިލާ އިންޑިޔާގެ އަޅުވެތިކަން ބަލައިގަތް ކަޅު ދުވަހުގެ ގޮތުގައިކަމަށެވެ.

ކުރީގެ ރައީސް ސޯލިހަށް: މާދަމާގެ ދިވެހިދަރީން މިއަދުގެ ތާރީޚު ލިޔާނީ ގައުމުގެ ވެރީން އަމިއްލަ އެދުމަށްޓަކައި މިނިވަންކަން ނަގައިލާ އިންޑިޔާގެ އަޅުވެތިކަން ބަލައިގަތް ކަޅު ދުވަހުގެ ގޮތުގައިކަން ކަަށަވަރު. އަދި މަނިކުފާނަކީ މިގައުމު މިހާތަނަށް ދުށް އެންމެބޮޑު ޚާއިނުގެގޮތުގައި.

– އަދުރޭ ވިދާޅުވިއެވެ.

މިއަދު ބޭއްވި އައްޑޫ ޕޮލިސް އެކަޑަމީ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ޞާލިހު ވިދާޅުވީ މިއަދު ހުޅުވިގެންދިޔަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓު އެޅުމަށްޓަކައި، މިޕްރޮޖެކްޓުގެ ވާހަކަ ފުރަތަމަ ދެ ސަރުކާރުގެ ދެމެދުގައި ދެކެވިފައިވަނީ 2009 ވަނަ އަހަރުގައި ކަމަށެވެ. ފުރަތަމަ ޕްރޮޖެކްޓު ކުރިއަށް ގެންދަން ނިންމާފައިއޮތީ ކ.ދިއްފުށިމާދޫގައި ކަމަށާއި، އެއަށްފަހު ޅ.މާބިންހުރައިން ދ.ވާނީއަށް ޕްރޮޖެކްޓު ބަދަލުކުރެވުނު ކަމަށެވެ.

އައްޑޫ ސިޓީގެ މަރަދޫ ހިތަދޫ ގުޅޭ މިސަރަހައްދުގައި މިޕްރޮޖެކްޓު ހިންގަން ނިންމާފައިވަނީ 2014 ވަނަ އަހަރު ފެބުރުވަރީމަހު އޭރު އޮތް ރައީސް ޔާމީންގެ ސަރުކާރުން ކަމަށާއި، ޕްރޮޖެކްޓުގެ ޕްލޭނިންގ މަސައްކަތް ނިންމުމަށްފަހު ޢަމަލީ މަސައްކަތް ފަށާފައިވަނީ 2017 ވަނަ އަހަރު ޖުލައި މަހު ކަމަށެވެ. އަދި މަސައްކަތް ނިންމަން ކަނޑައަޅާފައިވާ ތާރީޚަކީ 2022 ވަނަ އަހަރުގެ ފެބުރުވަރީގެ ނިޔަލަށް ކަމަށާއި، މިސަރަހައްދަކީ ވަރަށް ހަނި ސަރަހައްދެއްކަމުން ޕްރޮޖެކްޓު ކުރިއަށް ގެންދިއުމަށްޓަކައި 200,000 އަކަ މީޓަރުގެ ބިންވަނީ އިތުރުކުރެވިފައިކަމަށެވެ.

އިންޑިއާ ސަރުކާރުން މިވަނީ 30 މިލިއަން ޑޮލަރުގެ ހިލޭ އެހީއެއް މިޕްރޮޖެކްޓަށް ހޭދަކޮށްފަ. އިރާދަ ކުރެއްވީތީ މިއަދު އަޅުގަނޑުމެން މިބާއްވަނީ މިފުރިހަމަ ކޮލެޖް ހުޅުވުމުގެ ރަސްމިއްޔާތު. މިއީ އިންޑިއާ ސަރުކާރުން ދިވެހިންނަށް ވެދީފައިވާ ދީލަތި އެހީއެއް މިޕްރޮޖެކްޓު ކުރިއަށް ގެންދިއުމުގައި މީގެ ކުރީގެ ސަރުކާރު ތަކުން ކުރެއްވި މަސައްކަތްތައް ފާހަގަކޮށް އަޅުގަނޑު ރައީސްކަމުގައި ތިއްބެވި ބޭފުޅުންނަށް ޝުކުރު ދަންނަވަން. އެގޮތުން ކުރީގެ ރައީސް ޔާމީނަށާއި، ރައީސް ވަހީދަށް ޚާއްސަ ޝުކުރެއް ދަންނަވަން.