ދުނިޔޭގެ އެންމެ މުއްސަދި ގައުމުތައް އެކުވެގެން، 20 ގައުމުތަކުގެ މައްޗަށް އެކުލަވާލާފަ އޮންނަ G20 އިން ރަޝިއާ ބޭރު ކުރުމަށް ތާއީދު ކުރައްވާނޭކަމަށް އެމެރިކާގެ ރައީސް ޖޯ ބައިޑްން ވިދާޅުވުމުން ރަޝިއާއިން ބައިޑްންއަށް ރައްދު ދީފިއެވެ.
ރަޝިއާއިން ބުނެފައިވަނީ، G20 އިން އެގައުމު ވަކި ކުރުމަކީ އެގައުމަށް އިތުރު މުސީބާތެއް ކުރިމަތިވެގެންދާނެ ކަމެއް ނޫންކަމުގައެވެ.
"G20 އަކީ މުހިމު ގުރޫޕެއް، އެހެންނަމަވެސް މި ވަގުތުގެ ހާލަތަށް ބަލާއިރު– G20 ގައި ހިމެނޭ ގިނަ ގައުމުތަކަކަކީ ރަޝިއާއި ދެކޮޅަށް އިގުތިސާދީގޮތުން ހަގުރާމަ އިއުލާން ކޮށްގެން ތިބި ގައުމުތަކަށް ވުމުން، އެ ގުރޫޕުން ވަކިކުރިޔަސް މިހާރަށްވުރެ ގޯސް ހާލަތެއް ނާންނާނެ،" ރަޝިއާގެ ސަރުކާރުގެ ތަރުޖަމާން ޑިމިޓްރީ ޕެސްކޯވް ނޫސްވެރިންނަށް މައުލޫމާތު ދެއްވަމުން ވިދާޅުވެފައި ވެއެވެ.
ޕެސްކޯވް ވިދާޅުވެފައިވަނީ، ދުނިޔެއަކީ އެމެރިކާއާއި ޔޫރަޕް އެކަނި ނޫންކަމުގައެވެ. އަދި އޭނާވަނީ ރަޝިއާ މުޅި ދުނިޔެއިން ބާކީ ކުރުމަށް ކުރެވެމުންދާ މަސައްކަތް ކާމިޔާބު ނުކުރެވޭނޭކަމުގެ އިޝާރާތް ކުރައްވާ ވާހަކަދައްކަވާފައެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން ޔުރަޕާއި އެމެރިކާގެ އިތުރުން ދުނިޔޭގެ އެހެން ގިނަ ގައުމުތަކުންވެސް ރަޝިއާއި ދެކޮޅަށް އަޅާފައިވާ އިގްތިސާދީގޮތުން ދަތިކުރުމުގެ ވަރުގަދަ ފިޔަވަޅުތަކާއެކު، ރަޝިއާގައިވަނީ ތަކެތީގެ އަގު އިންތިހާއަށް އުފުލި، އަދި އާންމުކޮށް ބޭނުންވާ ބައެއް ތަކެތި ލިބުމުގެ ދަތިތަކާވެސް ކުރިމަތިލާން ޖެހިފައެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން ދުނިޔޭގެ ގިނަ ގައުމުތަކުންވަނީ، ޕުޓިންގެ އަރިސް ގިނަ އޮފިޝަލުންނާއި، އަދި ޕުޓިންއާއި ގާތް ގުޅުން ބާއްވަމުން ގެންދަވާ ރަޝިއާގެ މަހުޖަނުންގެ އެސެޓްތައް ހިފަހައްޓާ، ދަތިކުރުމުގެ ފިޔަވަޅު އަޅާފައެވެ.
