މިއަދު ހަވީރު އިދިކޮޅު ކޯލިޝަނުން މާލޭގައި ބޭއްވުމަށް ރާވައިވާ ހަރަކާތް ބޭއްވިޔަ ނުދިނުމަށްޓަކައި، ޕީޕީއެމް އޮފީސް ސަަރަހައްދު ބަންދުކޮށް، ސަލާމަތީ ބާރުތަކުން ހަރަކާތްތެރިވާން ފަށައިފިއެވެ.
އިދިކޮޅު ކޯލިޝަނުން "ނޭވާހިޅިއަށް" ނަމުގައި ބޭއްވުމަށް ހަމަޖެހިފައިވާ މިހަރަކާތް ފެށުމަށް ރާވާފައިވަނީ މިއަދު ހަވީރު 16:00 ގައެވެ. ނަމަވެސް މިހަރަކާތް ފެށުމުގެ ދެގަޑިއިރުގެ ކުރިން ގިނަ އަދަދެއްގެ ފުލުހުން އެސަރަހައްދަށް އެއްވެ ވަނީ ޕީޕީއެމް އޮފީސް ކައިރިޔަށް އެއް ނުވެވޭނެހެން މަގުތައް ބަންދުކޮށްފައެވެ.
ފުލުހުން މަގުތައް ބަންދުކޮށްފައިވާއިރު، ފުލުހުންގެ ގިނަ އަދަދެއްގެ ވެހިކަލްތައްވެސް މިހާރު ދަނީ އެސަރަހައްދަށް ޖަމާކުރަމުންނެވެ.
މިހަރަކާތާއި ގުޅިގެން ފުލުހުން ބުނެފައިވަނީ މާލޭގެ މަގުތަކާއި، އިދިކޮޅު ޕީޕީއެމްގެ މައި އޮފީސް ސަރަޙައްދާއި، ކާނިވާ ސަރަޙައްދާއި، ރަސްފަންނު ސަރަޙައްދާއި، ބޮޑުތަކުރުފާނު މަގާއި، މާލޭ ދެކުނުފަރާތު އުސްފަސްގަނޑު ސަރަހައްދު ހިމެނޭ ސަރަޙައްދުގައި އެއްވުން އިންތިޒާމުކޮށް ސަލާމަތީ ކަންކަން ބެލެހެއްޓުމަށް ދަތިވާނެހެން އެއްވަގުތެއްގައި މާލޭގެ އެކި ސަރަޙައްދުތަކުގައި ބައިބަޔަށް މީހުން ނުކުތުމަށް ރާވާފައިވާކަމަށެވެ. ހަމައެއާއެކު މާލޭގައި ޙަރަކާތްތެރިވާ ގޭންގްތައް މިއެއްވުމުގައި ބައިވެރިކުރުމަށް އިދިކޮޅުން ނިންމާފައިވާކަމަށާއި މިއީ ފުލުހުން ޖާގަދޭނެކަމެއް ނޫންކަމަށް ފުލުހުން ވިދާޅުވެއެވެ.
އެހެންކަމުން މިއެއްވުން މިގޮތަށް ނުބޭއްވުމަށް ޕީޕީއެމްއަށް އަންގާފައިވާކަމަށް ފުލުހުން ވިދާޅުވެއެވެ. މިއާއެކު މިއެއްވުމުގައި ބައިވެރިނުވުމަށްވެސް ފުލުހުންވަނީ އިލްތިމާސްކުރައްވާފައެވެ. އަދި މިއެއްވުމުގައި ބައިވެރިވާ އެއްގަމާއި ކަނޑު އުޅަނދުތައް ބަލާފާސްކުރާނެ ކަމަށް ފުލުހުންވަނީ ވިދާޅުވެފައެވެ. އަދި ޤާނޫނާ ޚިލާފުވާ ފަރާތްތަކާ މެދު ޤާނޫނީ އިމުގެތެރެއިން ފިޔަވަޅު އަޅާނެކަމަށްވެސް ފުލުހުންވަނީ ވިދާޅުވެފައެވެ.
އިދިކޮޅު ކޯލިޝަނުން ބުނެފައިވަނީ ޤާނޫނު އަސާސީން ކޮންމެ ރައްޔިތަކަށް ލިބިދީފައިވާ އެއްވެ އުޅުމުގެ ހައްގުގެ ބޭނުން ކުރާނެކަމަށެވެ. އަދި މިހަރަކާތް ސަލާމަތީ ބާރުތަކަށް ނުހުއްޓުވޭނެކަމަށެވެ.
ކޮމެންޓު ފޮނުވާ