ރަޝިއާއިން ޔޫކުރެއިންއަށް ދެމުންދާ އުދުވާންއަށް ބެލަރޫސްއިން އެހީތެރިކަން ފޯރުކޮށްދެމުން ދިއުމާއި ގުޅިގެން، އެގައުމުގެ ރައީސް އެލެގްޒެންޑަރ ލުކަޝެންކޯއާއި އޭނާގެ އާއިލާއާއި ދެކޮޅަށް އޮސްޓްރޭލިއާއިން ދަތިކުރުމުގެ ފިޔަވަޅު އަޅައިފިއެވެ.
އޮސްޓްރޭލިއާއިންވަނީ އެގައުމުން އެކުލަވާލާފައިވާ، ރަޝިއާއަށް ސްޓަރޓީޖިކް ސަޕޯޓު ފޯރުކޮށް ދެމުންދާ ފަރާތްތަކުގެ ލިސްޓުގައި ލުކަޝެންކޯގެ ނަން ހިމަނާފައެވެ.
ލުކަޝެންކޯގެ ނަން މި ލިސްޓުގައި ހިމެނުމާއި ގުޅިގެން އޭނާގެ ދަރިފުޅު ވިކްޓަރ ލުކެޝެންކާއާއި އަނބިކަބަލުން ގަލީނާ ލުކަޝެންކޯވެސް ވަނީ ދަތިކުރުމުގެ ފިޔަވަޅު އަޅާފައިވާ މީހުންގެ ތެރޭގައި ހިމެނިގެން ގޮސްފައެވެ.
އަދި މީގެ އިތުރުން، އޮސްޓްރޭލިއާއިންވަނީ، ރަޝިއާއަށް "ޕްރޮޕަގެންޑާ ފަތުރާދޭ އަދި ނުރަގަޅު މައުލޫމާތު ފެތުރުމުގައި" ހަރަކާތްތެރިވާ އިތު 22 ފަރާތެއްވެސް މި ލިސްޓުގައި ހިމަނާފައެވެ. މީގެ ތެރޭގައި ރަޝިއާގެ މީޑިއާ ކުންފުނިތައް ކަމުގައިވާ "ރަޝިއާ ޓުޑޭ" އާއި "އިންފޯރޮސް" އަދި "ނިއުސްފްރޮންޓު"ގެ އިސް ފަރާތްތައް ހިމެނެއެވެ.
"އޮސްޓްރޭލިއާއިން މިހާރުވަނީ، ކުރެމްލިންގެ ޕްރޮޕަގެންޑާ ފަތުރާ 32 ފަރާތަކަށް ދަތިކުރުމުގެ ފިޔަވަޅު އަޅާފަ،" އޮސްޓްރޭލިއާގެ ފޮރިންގ މިނިސްޓަރ މަރިސް ޕައިން ވިދާޅުވެފައި ވެއެވެ.
"އުދުވާނަށް އެއްމަސް ފުރިގެން ގޮސްފައިވާއިރު، އަޅަމުން މިދާ ފިޔަވަޅުތަކުން ދޭހަ ކޮށްދެނީ، ގާނޫނުތަކާއި ޚިލާފަށް، ރަޝިއާއިން އެގައުމުގެ އިންވެގެން އޮތް ޑިމޮކްރަޓިކް ގައުމެއްގެ މިނިވަންކަން ނަގާލުމުން އޭގެ އަގު އަދާ ކުރަން ޖެހޭނެކަން."
އޮސްޓްރޭލިއާއިން މިހާރުވެސް ވަނީ، ރަޝިއާގެ ރައީސްގެ އިތުރުން އޭނާއާއި ގާތް ގުޅުން ބާއްވަމުން ގެންދަވާ ރަޝިއާގެ މުއްސަދި މަހުޖަނުންނާއި އަދި ރަޝިއާ ސަރުކާރުގެ އިސް އެތައް އޮފިޝަލަކާއި ދެކޮޅަށް ދަތިކުރުމުގެ ފިޔަވަޅު އަޅާފައެވެ.
