ރަޝިއާއިން ހިފާފައިވާ ޔޫކުރެއިންގެ ސިޓީއެއް ކަމުގައިވާ ބާރޑްޔަންސްކްގެ ޕޯޓުގައި ބޭނުންކުރަމުން އައި ރަޝިއާގެ ލޭންޑިން ބޯޓެއް ގޮއްވާލާ އިތުރު ދެ އުޅަނދަކަށް ގެއްލުން ދީފައިވާކަން ޔޫކުރެއިންގެ އޮފިޝަލުން ހާމަކޮށްފިއެވެ.
ޔޫކުރެއިންގެ ނޭވީންނާއި އަދި ސޯޝަލް މީޑިއާގައި އާންމު ކޮށްފައިވާ ވީޑިއޯއިން ފެންނަ ގޮތުގައި، މި ޕޯޓުގައި ބޮޑު ގޮވުންތަކެއް ގޮވާ، އަދި އަސްކަރީ ބޮޑު ބޯޓެއްގައި ރޯވެފައިވާ މަންޒަރުވަނީ ފެނިގެން ގޮސްފައެވެ. މި ޕޯޓަކީ ރަޝިއާއިން ހަމަލާދީ އަދި މިހާރު ހިސޯރު ކޮށްފައިވާ ޔޫކުރެއިންގެ ސިޓީއެއް ކަމުގައިވާ މަރިއޮޕޮލްއާއި 70 ކިލޯ މީޓަރު ދުރުގައި އޮންނަ ޕޯޓެކެވެ.
ޔޫކުރެއިންގެ އަސްކަރިއްޔާއިން ބުނެފައިވަނީ، ރަޝިއާގެ އޯރސްކު ނަމަކަށް ކިޔާ އަސްކަރީ ކަނޑު އުޅަދަކަށް ހަމަލާ ދީފައި ވާކަމުގައެވެ.
ޔޫކުރެއިންގެ ޑެޕިއުޓީ ޑިފެންސް މިނިސްޓަރ ހަންނާ މަލްޔާރު ފަހުން ޔޫކުރެއިންގެ ޓީވީއަށް މައުލޫމާތު ދީފައިވާ ގޮތުގައި، އެގައުމުގެ އަސްކަރިއްޔާއިން ވަނީ، 20 ޓޭންކާއި، ހަތިޔާރުއެޅި 45 އެއްގަމު އުޅަނދާއި، އަދި 400 ސިފައިން އުފުލުމުގެ ގާބިލްކަން ލިބިފައިވާ، ރަޝިއާގެ ވަރުގަދަ އަސްކަރީ ބޯޓަަކަށް ހަމަލާދީފައެވެ.
ރަޝިއާގެ އަސްކަރިއްޔާގެ ޓީވީން ފާއިތުވެދިޔަ ހަފްތާގައިވަނީ، އޯރސްކް ނަމަކަށް ކިޔާ މި އަސްކަރީ ބޯޓު ހިފާފައިވާ، ޔޫކުރެއިންގެ ބާރޑްޔަންސްކްގެ ޕޯޓަށް ބަނދަރު ކުރުކުރިން "ފަޚުރުވެރި ކާމިޔާބީއެއްގެ" ގޮތުގައި ސިފަކޮށްފައެވެ. އޯރސްކް ލޭންޑިންގ ޝިޕަކީ، ރަޝިއާއިން މިޕޯޓު އެގައުމުގެ އަސްކަރިއްޔާގެ ބާރުގެދަށް ގެންދިޔަފަހުން ޕޯޓަށް ބަނދަރުކުރި ފުރަތަމަ އަސްކަރީ ބޯޓެވެ.
Video of the Black Sea Fleet’s Orsk Project 1171 large landing ship offloading BTR-82A vehicles in Berdyansk. https://t.co/G2RaJM1DaL pic.twitter.com/S21wCfcIbO
— Rob Lee (@RALee85) March 21, 2022
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފެށިތާ މިއަދަށްވަނީ އެއް މަސް ފުރިފައެވެ.
ގެއްލުން ބޮޑު މިހަނގުރާމައަށް މިއަދަށް އެއް މަސް ފުރިގެންދާއިރު، ހުޅަނގުގެ ގައުމުތަކުން ބުނަމުންދަނީ، ހަގުރާމަ ފެށުމަށްފަހު، ޔޫކުރެއިންގެ ވެރިރަށް ބާރުގެ ދަށަށް ގެނެސް، ޔޫކުރެއިގެ ސަރުކާރު ބަދަލުކުރުމަށް ރަޝިއާއިން ކަނޑައެޅި ލަނޑުދަޑިތައް ހާސިލް ނުވެ، ރަޝިއާގެ އަސްކަރިއްޔާ މިވަގުތު އޮތީ ހާސްކަމެއްގެ ތެރޭގައި ކަމުގައެވެ.
އަދި ރަޝިއާއިން ކަނޑައެޅި މުހިންމު އަސްކަރީ ލަނޑުދަޑިތައް ހާސިލްނުވެ ދިއުމުގެ ނަތިޖާއެއްގެ ގޮތުން، ރަޝިއާއިން އެއްވެސް ބެލުމެއްނެތި މިހާރު ޔޫކުރެއިންއަށް ދެމުންދާ ހަމަލާތަކާއި ގުޅިގެން، އާންމު ރައްޔިތުންނަށް ލިބެމުންދާ ގެއްލުންތައް އިންތިހާއަށް އިތުރުވެގެން ގޮސްފައިވާކަމަށްވެސް އެމެރިކާއާއި އިނގިރޭވިލާތުން ވަނީ ބުނެފައެވެ.
ހުލަނުގެ ގައުމުތަކުގެ އިންޓެލިޖެންސް މައުލޫމާތުތައް ބުނާ ގޮތުގައި ހަނގުރާމައަށް މިއަދަށް އެއްމަސް ފުރިގެން ދާއިރު، ރަޝިއާގެ އަސްކަރިއްޔާ އެންމެ ބޮޑަށް ފެއިލް ވެގެން ގޮސްފައިވަނީ، ލޮޖިސްޓިކްސްއާއި ކޮމިއުނިކޭޝަން އެކަށީގެންވާ ގޮތުގައި ނުދެމެހެއްޓިގެންނެވެ. އަދި މީގެ އިތުރުން ޔޫކުރެއިން ސިފައިންގެ ހިއްވަރާއި އެކުލުންތެރިކަންވެސް ވެގެން ދިޔައީ ރަޝިއާ ސިފައިންނަށް ކުރިމަތިވި ވަރަށް ބޮޑު ގޮންޖެހުމަކަށް ކަމުގައި މަސްރަހު ދިރާސާ ކުރާ ފަރާތްތަކުން ވަނީ ފާހަގަ ކޮށްފައެވެ.
ޔޫކުރެއިންގެ ޑިފެންސް މިނިސްޓްރީން ބުނެފައިވަނީ، އެގައުމުގެ ވެރިރަށް ކީވްގެ ވަށައިގެންވާ ބައެއް އަވަށްތައް އަލުން ޔޫކުރެއިން ސިފައިންގެ ބާރުގެ ދަށަށް ގެނެސްފައިވާ ކަމުގައެވެ. އަދި ހިތްވަރު އެލިފައިވާ ރަޝިއާގެ ބައެއް ސިފައިން ވަރަށް އަވަހަށް ވަށާލާނެކަމަށްވެސް ޔޫކުރެއިންގެ ޑިފެންސް މިނިސްޓްރިން ބުނެފައި ވެއެވެ.
