ރާއްޖޭގައި ތިބި އިންޑިއާގެ ސިފައިން ރާއްޖެއިން ބޭލުމަށް ގޮވާލާއި މާދަމާ ބޭއްވުމަށް ހިންގުމަށް ހަމަޖެހިފައިވާ "ނޭވާހޮޅިއަށް" ހަރަކާތަކީ ސުލްހަވެރި ސިޔާސީ ހަރަކާތެއް ކަމަށާއި، މިހަރަކާތުގައި އެއްވެސް ހަމަނުޖެހުމެއް ނިހިނގާނެކަމަށް ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.
މާދަމާ ބާއްވާ އިންޑިއާ އައުޓް ހަރަކާތަކީ ނުރައްކާތެރި ހަރަކާތެއް ކަމަށްބުނެ ފުލުހުން ނެރެފައިވާ ބަޔަނާއި ގުޅިގެންނާއި، މާދަމާގެ ހަރަކާތާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަދުރޭ ވިދާޅުވީ، މިއީ ޤާނޫނު އަސާސީން ދިވެހި ކޮންމެ ރައްޔިތަކަށް ލިބިދީފައިވާ ހައްގުގެ ބޭނުންކޮށް ޤާނޫނީ އިމުގެ ތެރެއިން ދިވެހި ރައްޔިތުން ހިންގާ ހަރަކާތެއް ކަމަށެވެ.
ޤާނޫނު އަސާސީގައި ކޮންމެ ދިވެހި ރައްޔިތަކަށް ކުރިން އެންގުމަކާއި ނުލައިވެސް އެއްވެ އުޅެވޭނެ ތަންތަން ހުރިނަމަވެސް މިހަރަކާތް ބާއްވާކަން ފުލުހުންނަށް އަންގާފައިވާނެކަމަށެވެ. ނަމަވެސް އިއްޔެ ކުއްލިއަކަށް ބަޔާނެއްނެރެ މިހަރަކާތަކީ ނުރައްކާތެރި ހަރަކާތެއްކަމަށް ވިދާޅުވި ވިދާޅުވުމަކީ ވަރަށް ޒިންމާދާރުކަން ކުޑަ ކަމެއްކަމަށެވެ.
މިހަރަކާތް ދާނީ ސުލްހަވެރިކަމާއިއެކު ކުރިއަށް، މިހަރަކާތް ނުހުއްޓުވޭނެ، ފުލުހުން މިހަރަކާތް ހުއްޓުވައި، ދިވެހި ރައްޔިތުންނާއި ކުރިމަތި ނުލާނެކަމަށް އަޅުގަނޑުމެން އުންމީދު ކުރަން. ފުލުހުން ޣައިރު ޤާނޫނީ އަމުރުތަކަށް ތަބާވާކަށް ނުޖެހޭނެ. ފުލުހުން އަމަލު ކުރަންޖެހޭނީ ޤާނޫނީ އިމުގެ ތެރެއިން ޤާނޫނާއި އެއްގޮތަށް.
– އަދުރޭ ވިދާޅުވިއެވެ.
އަދުރޭ ވިދާޅުވީ، މިސަރުކާރު މިހާރު އޮތީ ނޭވާހޮޅިއަށް އޮޅިފައިކަމަށެވެ. ކުރިއަށް ރަމަޟާން މަސް އޮތްއިރު ރައްޔިތުންނަށް އަގަޔާއި އަތާއި ދިމާނުވާ ހިސާބަށް ކަންކަން ގޮސްފައިވާއިރުވެސް ރައްޔިޔުތުންގެ ހައްގުތައް ކަށަވަރު ކޮށްދިނުމަށް ސަރުކާރުން ކުރާ އެއްވެސް ކަމެއް ނުފެންނަ ކަމަށެވެ. ސަރުކާރުގައި ތިއްބެވި ބޭފުޅުން މަސައްކަތް ކުރައްވަނީ ވަގުތީ ބޭނުންހިފައި ޤައުމަށް ޣައްދާރުވެ ވައްކަން ކުރަން ކަމަށާއި، އެކަން ވަރަށް ރަނގަޅަށް މިސަރުކާރުން ކުރަމުން ދާކަމަށެވެ.
އޭނާ ވިދާޅުވީ މާދަމާގެ ހަރަކާތަކީ އެމްޑީޕީން ހިންގާ ފަދަ ހަމަނުޖެހުން ބޮޑު ހަރަކާތަކަށް ނުވާނެކަމަށެވެ. ޕީޕީއެމްއަކީ އަބަދުވެސް ސުލްހަޔަށް ލޯބިކުރާ ރައްޔިތުންގެ ހައްގުތައް އިސްކުރާ ބައެއް ކަމަށެވެ. މިހަރަކާތަކީ ސުލްހަވަރިކަމާއިއެކު ހިންގާ މިސަރުކާރު "ކުޑަކަކޫ" މައްޗަށް ތިރިކުރާނެ ހަރަކާތެއްކަމަށް އަދުރޭ ވިދާޅުވިއެވެ.
އަދުރޭ ވިދާޅުވީ މާދަމާގެ ހަރަކާތުގައި ނުރައްކާތެރި ކަމެއް ކޮށްފާނެކަމަށް ފުލުހުންނަށް ބެލެވޭ މީހަކުހުރިނަމަ މިހާރުން މިހާރަނަށްވެސް އެމީހަކީ ކާކުކަން އެންގުމަށް ސިޓީއަކުން ދަންނަވާފައިވާނެކަމަށެވެ. އަދި އެމީހަކު ހުރިނަމަ މިހާރުން މިހާރަށްވެސް ފުލުހުންގެ ބެލުމުގެ ދަށަށް ގެންދިއުމަށް އޭނާ ވަނީ އެދިފައެވެ. މާދަމާގެ "ނޭވާހޮޅިއަށް" ހަރަކާތް ފެށުމަށް ހަމަޖެހިފައިވަނީ 15:45ގައި ޕީޕީއެމް އޮފީސް ދޮރުމަތިންކަމަށް އަދުރޭ ވިދާޅުވިއެވެ.
