ރަޝިއާގެ ރައީސް ލާޑިމިރު ޕުޓިންގެ، ބައިނަލްއަގުވާމީ ގުޅުންތަކާބެހޭ ޚާއްސަ މުޝީރު، އަދި ޒަމާންވީ އަރިސް ބޭފުޅެއް ކަމުގައިވާ އެނަޓޮލީ ޗުބައިސް، މަގާމުން އިސްތިއުފާ ދެއްވާ، އަދި ގައުމުވެސް ދޫކުރައްވާ ވަޑައިގެންފި ކަމަށް، މީޑިއާތަކުން ރިޕޯޓު ކޮށްފިއެވެ.
ޗުބައިސްއަކީ، ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން، މަގާމުން އިސްތިއުފާ ދެއްވި، ރަޝިއާގެ ސަރުކާރުގެ އެންމެ އިސް އޮފިޝަލެވެ. މަގާމުން އިސްތިއުފާ ދެއްވުމަށްފަހު އޭނާ ވަޑައިގެންފާ ގައުމެއް އަދި ކަށަވަރު ވެފައި ނުވާކަމަށް ބައިނަލް އަގުވާމީ މީޑިއާތަކުން ރިޕޯޓު ކޮށްފައިވި ނަމަވެސް، ރަޝިއާގެ މީޑިއާތަކުން ރިޕޯޓު ކޮށްފައިވާ ގޮތުގައި، މަގާމުން އިސްތިއުފާ ދެއްވުމަށްފަހު، އަނބިކަބަލުންނާ އެކީ އޭނާ މިވަގުތު ހުންނެވީ ތުރުކީގައި ކަމުގައެވެ.
ޕުޓިންގެ ޚާއްސަ މުޝީރުކަމަށް ޗުބައިސް އައްޔަން ކުރެއްވުމަށްފަހު އޭނާއާއި ހަވާލު ކުރެވިފައިވާ މަސައްކަތަކީ ރަޝިއާއިން ހާސިލްކުރުމަށް ކަނޑައަޅާފައިވާ ބައިނަލްއަގުވާމީ ދެމެހެއްޓެނިވި ތަރައްގީގެ ލަޑުދަނޑިތައް ހާސިލްކުރުމަށް މަސައްކަތް ކުރުމެވެ.
ރަޝިއާއިން ޔޫކުރެއިންއަށް އުދުވާނީ ހަމަލާ ދޭންފެށުމާއެކު އޭނާވަނީ، މަރާލާފައިވާ ރަޝިއާގެ އިދިކޮޅު ސިޔާސީ މީގެއްގެ ފޮޓީ ސޯޝަލް މީޑިއާގައި ޝާއިއު ކޮށްފައެވެ. އަދި މިއީ އޭނާ މިހަގުރާމައާއި ދެކޮޅުކަން ހާމަ ކުރުމުގެގޮތުން ކުރެއްވި އިޝާރާތެއްގެ ގޮތުގައި ގިނަބަޔަކު ސިފަ ކޮށްފައި ވެއެވެ.
މަރާލާފައިވާ، ރަޝިއާގެ އިދިކޮޅު ސިޔާސީ މީހެއް ކަމުގައިވާ ބޮރިސް ނެމްޓޯވް މަރާލި ތާރީޚާއި ދިމާކޮށް އޭނާގެ ފޮޓޯ ޗުބައިސްގެ ފޭސްބުކް ޕޭޖުގައި ޝާއިއު ކޮށްފައިވި ނަމަވެސް، އެއްވެސް ތަފްސީލެއް ހާމަ ކޮށްފައެއް ނުވެއެވެ.
ޗުބައިސް މަގާމުން އިސްތިއުފާ ދެއްވާފައިވާކަން ރަޝިއާގެ މީޑިއާތަކުންވެސް ރިޕޯޓު ކޮށްފައިވި ނަމަވެސް، އިސްތިއުފާއާއިބެހޭ އެއްވެސް މައުލޫމާތެއް އޭނާ އަމިއްލަފުޅަށް އަދި ހާމަ ކުރައްވާފައެއް ނުވެއެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކަށް ފާޑުކިއުން އެގައުމުގައިވަނީ ޖިނާޢީ ކުށަކަށް ހަދާފައެވެ. އަދި އެގައުމުގެ މީޑިއާތަކުން މި އުދުވާނީ ހަމަލާތައް ރިޕޯޓު ކުރަން ޖެހެނީ، ރަޝިއާއިން ޔޫކުރެއިންގައި ކުރިޔަށް ގެންދާ ޚާއްސަ އަސްކަރީ އޮޕަރޭޝަނެއްގެ ގޮތުގައެވެ.
މަގާމުން އިސްތިއުފާ ދެއްވާފައިވާ ޗުބައިސް ފާހަގަވެގެން ގޮސްފައިވަނީ، ސޯވިއެޓް ޔޫނިއަން ރޫޅިގެން ދިއުމަށްފަހު، 90ގެ އަހަރުތަކުގައި ރަޝިއާގެ އިގްތިސާދު ކޮޅަށް ޖެހުމުގައި މުހިންމު ދައުރެއް އަދާކުރެއްވި ބޭފުޅެއްގެ ގޮތުގައެވެ.
ޕުޓިން ރަޝިއާގެ ރައީސްކަމާ ހަވާލުވެ ވަޑައިގަތުމަށްފަހު ޗުބައިސްވަނީ އިސް ގިނަ މަގާމްތަކެއް ފުރުއްވާފައެވެ. އޭގެ ތެރޭގައި ރަޝިއާގެ ދައުލަތުގެ ޓެކްނޮލޮޖީ ފާރމްގެ އެންމެ އިސްވެރިޔާގެ މަގާމް އޭނާވަނީ ދިގުމުއްދަތެއް ވަންދެން އަދާ ކުރައްވާފައެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން ދުނިޔޭގެ ގިނަ ގައުމުތަކުންވަނީ، ޕުޓިންގެ އަރިސް ގިނަ އޮފިޝަލުންނާއި، އަދި ޕުޓިންއާއި ގާތް ގުޅުން ބާއްވަމުން ގެންދަވާ ރަޝިއާގެ މަހުޖަނުންގެ އެސެޓްތައް ހިފަހައްޓާ، ދަތިކުރުމުގެ ފިޔަވަޅު އަޅާފައެވެ.
