މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ މަގާމުގައި މުހައްމަދު މަލީހު ޖަމާލްގެ ކޮޓަރިކޮޅާއި އެ މިނިސްޓްރީގެ އިމާރާތުގެ ބްލޮކް-ބީ މަރާމާތުކޮށްފައިވަނީ ގަވާއިދާ ހިލާފަށް ކަމަށް އޮޑިޓް ރިޕޯޓުގައި ބުނެފިއެވެ.

ކޮމިއުނިކޭޝަން މިނިސްޓްރީގެ 2019 ވަނަ އަހަރުގެ މާލީ އޮޑިޓް ރިޕޯޓްގައި ބުނެފައިވަނީ މިނިސްޓަރުގެ ކޮޓަރިކޮޅާއި، އެ މިނިސްޓްރީގެ އިމާރާތުގެ ބްލޮކް-ބީ މަރާމާތުރަން 795،000 ރުފިޔާއަށް އަމިއްލަ ފަރާތަކާ މަސައްކަތް ހަވާލުކޮށްފައިވާ ކަމަށެވެ. ނަމަވެސް ދައުލަތުގެ މާލިއްޔަތު ގަވާއިދާ ހިލާފަށް މި މަސައްކަތުގެ ބައެއް ކަންކަން ކޮށްފައިވާ ކަމަށް ރިޕޯޓުގައި ފާހަގަކޮށްފައިވެއެވެ.

މި މަސައްކަތް އަމިއްލަ ފަރާތަކާ ސެޕްޓެމްބަރު 15، 2019 ގައި ހަވާލުކޮށްފައިވަނީ 25 ދުވަހުގެ ތެރޭ ނިންމުމަށެވެ. އެކަމަކު މަސައްކަތް ނިންމާފައިވަނީ މަސައްކަތް ނިންމަން ހަވާލުކުރި ތާރީހުގެ އަހަރެއް ފަހުންނެވެ.

އޮޑިޓް ރިޕޯޓްގައި ވަނީ މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ ދަށުން ހިނގަމުންދާ ނޭޝަނަލް ސެންޓަރ ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީގެ ހަރުމުދަލާއި ހަރުމުދަލުގެ ރެކޯޑުތައް ގަވާއިދުގައި ބަޔާންކޮށްފައިވާ ގޮތުގެމަތިން ބަލަހައްޓާފައި ނުވާކަން ފާހަގަކޮށްފައިވެއެވެ. އަދި މިކަމުގެ ސަބަބުން މިނިސްޓްރީގެ 2019 ވަނަ އަހަރުގެ "މިލްކިއްޔާތާއި މާލީ ޒިންމާތަކުގެ ބަޔާން"ގައި، ހަރުމުދަލުގެ އަގުގެ ގޮތުގައި ހިމަނާފައިވާ ޖުމްލަ އަގު ކަމުގައިވާ 164 މިލިއަނަށްވުރެ ގިނަ ރުފިޔާއަކީ އެމިނިސްޓްރީގެ ބެލުމުގެ ދަށުގައި ހުރި ހަރުމުދަލުގެ ޞައްޙަ އަގުކަން ކަށަވަރު ކުރެވެން ނެތްކަން އޮޑިޓް ރިޕޯޓްގައި ފާހަގަކޮށްފައިވެއެވެ. އޮޑިޓް ރިޕޯޓު ބުނާ ގޮތުގައި މަސައްކަތް ލަސްވުމުން ލިކުއިޑޭޓް ޑެމޭޖަސްގެ ގޮތުގައި 119،250 ރުފިޔާ އުނިކުރަން ޖެހުނު ނަމަވެސް، އުނިކޮށްފައި ވަނީ 9،834 ރުފިޔާ ކަމަށެވެ.

ދައުލަތުގެ މާލިއްޔަތު ގަވާއިދުގައި، އެގްރިމެންޓްކޮށްގެން ހަވާލުކުރާ މަސައްކަތްތައް ލަސްވާނަމަ، ލަސްވުމުގެ ސަބަބުން މިނިސްޓްރީއަށް ލިބޭ ގެއްލުމުގެ އަގު ނުވަތަ ލިކުއިޑޭޓެޑް ޑެމޭޖަސް ކޮންޓްރެކްޓާ އަތުން ހޯދަން ޖެހޭނެ ކަމަށް ބަޔާންކޮށްފައިވެއެވެ. އެގޮތުން މުޅި ކޮންޓްރެކްޓްގެ އަގުގެ 15 ޕަސެންޓަށް ވުރެ ބޮޑު ނުވާނެހެން އެ ފައިސާ މިނިސްޓްރީން ކޮންޓްރެކްޓަރު އަތުން ހޯދަން ޖެހޭނެ ކަމަށް ގަވާއިދު ބުނެއެވެ.

ކޮމިއުނިކޭޝަން މިނިސްޓްރީއާ ގުޅޭ ގޮތުން އޮޑިޓާ ޖެނެރަލް އޮފީހުން ތައްޔާރުކޮށްފައިވާ ރިޕޯޓުގައި އިތުރަށް ބުނެފައިވަނީ 2019 ވަނަ އަހަރު ގަވާއިދާ ހިލާފަށް ކޮންސަލްޓެންޓުންގެ މަގާމަށް މުވައްޒަފުން ނަގައިފައިވާ ކަންވެސް ވަނީ ފާހަގަކޮށްފައެވެ. ރިޕޯޓުގައި ބުނެފައިވަނީ ފިނޭންސް މިނިސްޓްރީން އެ މިނިސްޓްރީއަށް ހުއްދަ ދިނީ ކޮންޓްރެކްޓް މުވައްޒަފުން ވަޒީފާއަށް ނެގުމަށް ކަމަށެވެ. 2019 ވަނަ އަހަރުގެ ކުރިން ވެސް އެގޮތަށް މީހުންނަށް އެ މިނިސްޓްރީން ވަޒީފާ ދެމުން އައި ކަމަށް ބަޔާންކޮށްފައިވެއެވެ.