ކުރެންދޫ ކައުންސިލް ރައީސް އިންތިޚާބު އަންނަ ހޮނިހިރު ދުވަހު ބޭއްވުމަށް ހަމަޖެހިފައިވަނިކޮށް ކުއްލިއަކަށް އަރަށުގައި 50 ހައުސިން ޔުނިޓް އެޅުމަށް އިއުލާންކޮށްފިއެވެ.
ކުރެންދޫ ކަންސިލް ރައީސް އިންތިޚާބު ހޮނިހިރު ދުވަހު ބާއްވާއިރު، މިއިންތިޚާބާއި ދިމާކޮށް، ހައުސިން ޔުނިޓް އެޅުމަށް އިއުލާންކޮށްފައިވަނީ އިންތިޚާބަށް ނުފޫޒު ފޯރުވުމަށް ކަމަށް އިކޮޅު ފަރާތްތަކުން ދަނީ ބުނަމުންނެވެ. މީގެ ކުރިންވެސް ބޭއްވި މިފަދަ އިންތިޚާބުތަކުގައި ސަރުކާރުން އިންތިޚާބަސް ނުފޫޒު ފޯރުވުމަށް މިފަދަ ބޮޑެތި މަޝްރޫޢުތައް ހިންގަމުންދާތީ އެކަމުގެ ކަންބޮޑުވުން ވަނީ ފާޅުކޮށްފައެވެ.
ކުރެންދޫގެ އިންތިހާބާ ދިމާކޮށް ފިނޭންސް މިނިސްޓްރީން އިއްޔެ ކޮށްފައިވާ އިއުލާންގައި ކުރެންދޫގައި ހައުސިން ޔުނިޓް އެޅުމުގެ މަޝްރޫއަށް ބީލަން ހުށަހެޅުމަށް ޝައުގުވެރިވާ ފަރާތްތަކަށް ފުރުސަތު ހުޅުވާލާފައިވަނީ ކުރިއަށް އޮތް އޭޕްރީލް މަހުގެ 13 ވަނަ ދުވަހުގެ ނިޔަލަށެވެ.
މި ޕްރޮޖެކްޓުގެ ބިޑްސެކިޔުރިޓީގެ ގޮތުގައި -/255,000ރ (ދެލައްކަ ފަންސާސް ފަސްހާސް ރުފިޔާ) ނުވަތަ އެޢަދަދާއި އެއްވަރު ޢަދަދެއްގެ ޔޫ.އެސް.ޑޮލަރުން ހުށަހަޅަން ޖެހޭނެއެވެ. ބިޑް ސެކިޔުރިޓީގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަހެވެ. ބީލަން ހުޅުވުން އޮންނާނީ 13 އެޕްރީލް 2022 ވާ ބުދަދުވަހުގެ 13:00 ގައި މިމިނިސްޓްރީގެ ނެޝަނަލް ޓެންޑަރުގައެވެ.
ފާދިއްޕޮޅު ކުރެންދުއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް މިއަހަރުގެ ތެރޭގައި ހައުސިންގ މަޝްރޫޢެއް ކުރެންދޫގައި ހިންގަވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ މިދިޔަ މަހު ވިދާޅުވެފައެވެ.
ކުރެންދޫ ކައުންސިލް ރައީސްކަމަށް ވާދަ ކުރަނީ އިދިކޮޅު ޕީޕީއެމްގެ ކެނޑިޑޭޓަކާއި، ސަރުކާރު ހިންގާ މައި ޕާޓީ އެމްޑީޕީގެ ކެނޑިޑޭޓެކެވެ.
