ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު މުހައްމަދަކީ އެއްވެސް މީހަކަށް އިޚްލާސްތެރިވާނެ މީހެއް ނޫންކަމަށާއި، ސައީދު ހަމައެކަނި އިޚްލާސްތެރިވާނީ މަގާމާއި ލާރިއަށް ކަމަށް، ރައްޔިތުންގެ މަޖިލީހުގެ ތިނަދޫ އުތުރު ދާއިރޭގެ ކުރީގެ މެމްބަރު ސައުދުﷲ ހިލްމީ ވިދާޅުވެއްޖެއެވެ.
ކުރިޔަށް އޮތް އެމްޑީޕީގެ ޗެއަރޕާރސަން އިންތިޚާބުގައި، ފެނަކަ އެމްޑީ ސައީދު ރާއްޖެތެރޭގެ އެކި ރަށްރަށުގައި ހުރި ފެނަކަ ސްޓޭޝަންތަކުގެ ބައެއް މުއައްޒަަފުންނަށް ގުޅުއްވާ ވަކިގޮތަކަށް ވޯޓުލާން އަންގަމުންދާކަމުގެ ތުހުމަތު ކުރައްވާ އެމްޑީޕީގެ ރައީސް ނަޝީދު އެކަމާ ނުރުހުން ފާޅުކޮށް އެމްޑީޕީގެ ގައުމީ މަޖިލިސް ވަޓްސްއަޕް ގުރޫގައި ސައީދަށް ވަރަށް ބޮޑަށް ފާޑު ވިދާޅުވެ ކުރައްވާފައިވާ މެސެޖަތަކަށް އިޝާރާތް ކުރައްވާ ސައުދުﷲ ހިލްމީ މިއަދު ކުރެއްވި ޓުވީޓެއްގަައި ވިދާޅުވެފައިވަނީ އޭނާ މިވާހަކަ ކުރިން ދެއްކެވެމުން އެކަން އޭރު ރައީސް ނަޝީދަށްވެސް ގަބޫލު ނުކުރެއްވުނު ކަމަަށެވެ.
އަދި ފެނަކަ އެމްޑީ އަހުމަދު ސައީދުގެ މަކަރާއި ހީލަތްތެރިކަމާއި އަނިޔާވެރިކަން ހާމަވަމުންދާތީ އުފާކޮށް ހަމްދު ކުރާކަމަށްވެސް ސައުﷲ ހިލްމީ ވިދާޅުވެފައި ެވެއެވެ. ސައުދުﷲ ހިލްމީ ތުހުމަތު ކުރައްވާފައިވާ ގޮތުގައި އެމްޑީ އަހުމަދު ސައީދަށް މެނޭޖިންގ ޑިރެކްޓަރުކަމުގެ ވަޒީފާ ދީފައިވަނީވެސް ގޯސްކޮށެވެ. އެހެންނަމަވެސް މިތުހުމަތާއި ގުޅޭ އިތުރު ތަފްސީލެއް ސައުދުﷲ ހިލްމީގެ ޓުވީޓުގައި ހާމަ ކުރައްވާފައެއް ނުވެއެވެ.
Mivaahaka aharemen kurin dhekkeema RN ahves gabool nukurevunu. Saeed aki ekakahves ikhulaastheri vaane meeheh noon, ikhulaastheri vaanee magaamaai laariah. Ufaakuran adhi h’amdhukuran eynaage makaraai heelathaai aniyaaverikan haama vamun dhaathee. Vazeefaa dheefavaneeves goaskoh. pic.twitter.com/eE4Y5fpBmI
— Saudulla (@saudullahilmy) March 21, 2022
ސައުދުﷲ ހިލްމީ ފެނަކަ އެމްޑީ ސައީދަށް ވަރަށް ބޮޑަށް ފާޑު ވިދާޅުވެ ޓުވީޓު ކުރައްވާފައިވާއިރު، އެމްޑީޕީގެ ވަޓްސްއަޕް ގުރޫޕަށް ރޭ ކުރެއްވި މެސެޖްތަކުގައި ވިދާޅުވެފައިވަނީ، ފެނަކަ އެމްޑީ ސައީދަށް އެކުންފުނީގެ މެނޭޖިންގެ ޑިރެކްޓަރުގެ މަގާމަށް އާދެވުނުގޮތް އޭނާއަށް އޮޅިވަޑައިގެންފައި ވާކަމަށެވެ.
އެމްޑީޕީގެ ޗެއަރޕާސަން އިންތިޚާބުގެ ކެމްޕޭނަށް ނުފުޒު ފޯރުވާ، ވަކިފަރާތަކަށް ވޯޓު ދިނުމަށް ސައީދު ފެނަކައިގެ މުވައްޒަފުންނަށް ގުޅުއްވަމުން ގެންދަވާކަމަށް ތުހުމަތު ކުރައްވަމުން އެމްޑީޕީގެ ގައުމީ މަޖިލިސް ވަޓްސްއަޕް ގުރޫޕުގައި ރޭކުރެއްވި މެސެޖުތަކުގައި ރައީސް ނަޝީދުވަނީ، ފެނަކަ ސައީދު އެމަނިކްފާނު އެމްޑީޕީން ބޭރުކުރުމަށް މަސައްކަތް ކުރަމުންދާކަމުގެ ތުހުމަތުވެސް ކުރައްވާފައެވެ.
ސައީދު އަޅުގަޑު މި ޕާޓީން ވަކިކުރަން އުޅުނަސް، ފެނަކަ ހުރިހާ މުވައްޒަފުން އެކަމާ ނުރުހޭނެ.
ސައީދަށް ރައްދު ދެއްވަމުން ރައީސް ނަޝީދު ވިދާޅުވެފައި ވެއެވެ.
ފެނަކަ ކޯޕަރޭޝަނުން ރަށްރަށުގައި ތިބޭ ފެނަކައިގެ މުވައްޒިފުންނަށް އެމްޑީޕީގެ ޗެއާޕާސަން އިންތިޚާބުގައި ވަކި ގޮތަކަށް ވޯޓުލުމަށް އަންގާތީ އެކަމާއި ނުރުހުން ފާޅުކޮށް ރައީސް ނަޝީދު ލިޔުއްވި މެސެޖްތަކަށް، ސައީދު ވަނީ ޖަވާބު ދެއްވާފައެވެ. ސައީދުވަނީ ވަކި ކުރީކޮން މުވައްޒިފެއްތޯ، އެފަދަ ފިޔަވަޅެއް އެޅުއްވި މުވައްޒިފެއް ހުރިނަމަ އެއީ ކާކުތޯ ސުވާލު ކުރައްވާފައެވެ.
ސައީދުގެ މެސެޖްތަކަށް ރައްދު ދެއްވާ ނަޝީދު ވަނީ ސައީދު "ޖަދަލު" ކުރައްވަނީތޯ ސުވާލު ކުރައްވާފައެވެ. އަދި ސައީދަށް މިހާރު ފެނަކައިގެ އެމްޑީކަން ލިބުނު ގޮތް އޮޅިފައިވާކަމަށްވެސް ރައީސް ނަޝީދު ވިދާޅުވެފައި ވެއެވެ.
ސައީދަށް ތިޔަ ތަނަށް އާދެވުނު ގޮސްވެސް ސައީދަށްވެސް އޮޅުނީ. އަޅެ ސައީދު އަޅުގަނޑު މި ޕާޓީ އިން ބޭރުކޮށްބަލަ.
– ނަޝީދު ވިދާޅުވިއެވެ.
އެމްޑިޕީގެ ގައުމީ މަޖިލިސް އިންތިޚާބުގައި ވަކި ގޮތަކަށް ވޯޓު ލުމަށް އަންގާ ފެނަކަ މުވައްޒަފުންނަށް ސައީދު ގުޅުއްވަމުން ގެންދަވާ ކަމަށް ތުހުމަތު ކުރައްވަމުން ރައީސް ނަޝީދުވަނީ، "ތިޔަހާ މުނާފިގު ނުވުމަށާއި" "ދޮގު ނުހެދުމަށް"ވެސް ވިދާޅުވެ ސައީދަށް ރައްދުކޮށް ވަޓްސްއަޕް ގުރޫޕަށް މެސެޖު ކުރައްވާފައެވެ.
ޗެއާޕާސަންގެ އިންތިހާބުގައި ވާދަކުރައްވަނީ އެމްޑީޕީގެ ކުރީގެ ސްޕޯކްސްޕާސަން އިމްތިޔާޒު ފަހުމީ އާއި ސަރުކާރުގެ އެންމެ ނުފޫޒު ގަދަ ވަޒީރު ފައްޔާޒު އިސްމާއިލްއެވެ. ގައުމީ މަޖިލީހުގެ ގިނަ މެންބަރުންނާއި ސަރުކާރުގެ އިސް ބޭފުޅުންގެ ތާއީދު އޮތީ ފައްޔާޒަށެވެ. ރައީސް ނަޝީދުގެ އާއިލީ ބޭފުޅުންނާއި އެމަނިކުފާނުގެ އެންމެ އަރިސް އަދި ވަފާތެރި މެންބަރުންގެ ތާއީދު އޮތީ އިންތިއަށެވެ. ރައީސް ނަޝީދުގެ އާއިލީ ބޭފުޅުން ގެންދަވަނީ އިންތި ހޮއްވެވުމަށް ރަށްރަށަށް ދަތުރުކުރައްވާ ކެމްޕެއިން ކުރައްވަމުންނެވެ.
ރައީސް ނަޝީދު ވަނީ ވަޒީފާގެ ބިރުދައްކައި، ކަންކަން ކުރާނަމަ ފާޅުގައި މިކެމްޕެއިންގައި ނިކުންނަން ޖެހިދާނެކަމުގެ އިންޒާރުވެސް ދީފައެވެ.
