ދިގު ދަތުރަކަށްފަހު، އޭނާ ކުއްޔަށް ހިފި ލޮރީގައި އިނގިރޭސި ކުރީގެ ބޮޑުވަޒީރު ޑޭވިޑް ކެމަރަން ޕޮލޭންޑަށް ހިޖުރަ ކޮށްފައިވާ ޔޫކުރެއިންގެ ރެފިއުޖީންނަށް އެހީ ފޯރުކޮށްދީފިއެވެ.
ކެމަރަން އަމިއްލަފުޅަށް ދުވާފައިދިޔަ، އެހީގެ ތަކެތިން ބަރާކޮށްފައި އޮތް ލޮރީ ޕޮލޭންޑް ޔޫކުރެއިން ބޯޑަރާއި ހަމައަށް ފޯރާފައިވަނީ، 1،000 މޭލު ކަނޑައްތުކޮށް 20 ގަޑިއިރުގެ ދުއްވުމަށް ފަހުއެވެ.
ޑޭވިޑް ކެމަރަން ވޮލަންޓިއަރެއްގެ ގޮތުގައި މަސައްކަތް ކުރަމުންދާ، އޭނާގެ އަވަށުގެ ޗިޕީ ލާރޑަރ ފުޑް ޕްރޮޖެކްޓްއިން ޖަމާކޮށްފައިވާ، އެހީގެ ތަކެތީގެ ތެރޭގައި ހެދުމާއި، ނެޕީއާއި، ފިނީގައި ނިދަން ބޭނުންވާ ސާމާނުފަދަ ތަކެތި ހިމެނެއެވެ.
ލޮރީގައި ގެންދިޔަ ތަކެތި، ރެފިއުޖީ ކޭމްޕްގައި ހުރި ރެޑްކްރޮސްގެ ވެއަރހައުސްއަށް ފޯރުކޮށް ދިނުމަށްފަހު، ކެމަރަންގެ އަމިއްލަ ޓުވިޓަރ އެކަންޓުން އޭނާ ވާހަކަ ދައްކެއިރު ޗިޕިންގ ނޯޓަން ލޭބަރ ކައުންސިލަރ ރިޒްވާނާ ޕޫލްވެސް އޭނާގެ ކައިރީގައި ހުއްޓެވެ.
"ވަރަށް ފިނި، އަދި ވަރަށް ވަރުބަލިވެސް ވެއްޖެ. އެހެންނަމަވެސް ވަރަށް ހާލުގައި އުޅެމުންދާ ރެފިއުޖީންނަށް އެހީގެ ތަކެތި ފޯރުކޮށް ދެވުމުން ވަރަށް އުފާވެއްޖެ،" ކެމަރަން ވިދާޅުވެފައި ވެއެވެ.
އޭނާ ވިދާޅުވި ގޮތުގައި ދަތުރުގެ ބައެއްގައި ދުއްވީ އޭނާ ކަމަށާއި، ދަތުރު ވަރަށް އަމާން ކަމަށެވެ. އެހެންނަމަވެސް ދަތުރުމަތީގައި ދުއްވަމުން އައި ލޮރީގެ އެއް ޓަޔަރު ފަޅައިގެން ދިއުމުގެ ސަބަބުން އެ ޓަޔަރު ބަދަލު ކުރުމަށް ވަރަށް ގިނައިރު ނެގި ކަމަށެވެ. އަދި ޓަޔަރ ބަދަލުކުރުމަށް ގިނައިރު ނެގި ސަބަބެއް ކަމުގައި އޭނާ ވިދާޅުވީ، އޭނާ ކުއްޔަށް ނެގި ލޮރީގައި އިތުރު ޓަޔަރެއް ނެތުމުގެ ސަބަބުންނެވެ.
Delivery successfully made! #StandWithUkraine️ ???????? pic.twitter.com/0eisBor72z
— David Cameron (@David_Cameron) March 19, 2022
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތައް ފެށިފަހުން، މިހާރަނަށް 2,057,114 ޔޫކުރެއިންގެ ރެފިއުޖީން ޕޮލޭންޑަށް ހިޖުރަ ކޮށްފައިވާކަމަށް ޕޮލިޝް ބޯޑަރ ގާރޑް އޭޖެންސީން ވަނީ ބުނެފައެވެ.
ފާއިތުވެދިޔަ ފެބްރުއަރީމަހު ރަޝިއާއިން ޔޫކުރެއިންއަށް ހަމަލާ ދޭންފެށިފަހު މިހާތަނަށް 3 މިލިއަން މީހުންވަނީ އެގައުމު ދޫކޮށް ހިޖުރަ ކޮށްފައެވެ. މީގެ ތެރޭގައި ގިނަ އަދަދެއްގެ ކުޑަކުދިންވެސް ހިމެނެއެވެ.
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފެށުމާއެކު، އުފެދިފައިވާ ރެފިއުޖީ ކާރިސާއަކީ ދެވަނަ ބޮޑު ހަގުރާމައަށްފަހު ޔޫރަޕަށް ކުރިމަތިވެފައިވާ އެންމެ ބޮޑު ރެފިއުޖީ ކާރިސާއެވެ. އަދި ޔޫކުރެއިންއިންގެ އަވައްޓެރި ގައުމުތަކަށް ހިޖުރަ ކުރަމުންދާ ރެފިއުޖީންނަށް އެގައުމުތަކުންދަނީ އެހީތެރިކަން ފޯރުކޮށްދެމުންނެވެ.
