ޖައްވީ ސްޓޭޝަނަށް އެންމެ ފަހުން ދިޔަ ރަޝިއާގެ ކޮސްމޮނޯޓުން ނޫކުލައިގެ ބެޖުތައް ޖަހާފައިވާ، ރީނދޫކުލައިގެ ހެދުން ލައިގެންތިބެ ނަގާފައިވާ ފޮޓޯއަކީ ޔޫކުރެއިންއަށް ތާއީދުކުރާކަން ދެއްކުމުގެ ގޮތުން ނަގާފައިވާ ފޮޓޯއެއްކަމަށް ސިފަކޮށް ހުޅަނގުގެ މީޑިއާތަކުން ރިޕޯޓު ކޮށްފައިވާ ޚަބަރުތައް ރަޝިއާއިން ދޮގު ކޮށްފިއެވެ.
"ބައެއް ފަހަރަށް ރީނދޫ ކުލައަކި ހަމައެކަނި ރީނދޫ ކުލަ،" ރަޝިއާގެ ޖައްވީ އިދާރާ ރޮސްކޮސްމޮސްގެ ޕްރެސް ސާރވިސްއިން އެ އިދާރާގެ ޓެލެގްރާމް ޗެނަލްގައި ލިޔެފައި ވެއެވެ.
"ޖައްވީ ސްޓޭޝަނަށް އަލަށްދިޔަ ކުރޫންގެ ހެދުން ފަރުމާ ކޮށްފައިވަނީ، ސްޓޭޝަނަށް ދިޔަ 3 ކުރޫން ތައުލީމު ހާސިލް ކޮށްފައިވާ ޔުނިވަރސިޓީ ކަމުގައިވާ ބައުމާން މޮސްކޯ ސްޓޭޓް ޓެކްނިކަލް ޔުނިވަރސިީޓިގެ ނިޝާންގައި ހުންނަ ކުލަ ބޭނުން ކޮށްގެން.. ހުރިހާ ތަނަކުން، ހުރިހާ އެއްޗަކުން ޔޫކުރެއިންގެ ދިދަ ފެނުމަކީ މޮޔަކަމެއް."
ޖައްވަށްދިޔަ ރަޝިއާގެ ކޮސްމޮނޯޓުން ޔޫކުރެއިންގެ ދިދައިގެ ކުލައިގެ ހެނދުން ލައިގެން ތިބެ ފޮޓޯ ނަގާފައިވަނީ، ޔޫކުރެއިންއަށް ތާއީދުކުރާކަން ދެއްކުމުގެ ގޮތުންކަމަށް ބުނެ ދެކެވެމުންދާ ވާހަކަތަކަށް ރުޅިވެރިކަމާއެކު ޖަވާދެއްވަމުން ރޮސްކޮމޮސްގެ ޑައިރެކްޓަރ ޖެނެރަލް ޑިމިޓްރީ ރޮގޮޒިން އޭނާގެ އަމިއްލަ ޓެލެގްރާމް ޗެނަލްގައި ވިދާޅުވެފައިވަނީ، ރަޝިއާގެ ކޮސްމޮނޯޓުންގެ ހިތުގައި ޔޫކުރެއިންގެ ރައްޔިތުންނަށް އެއްވެސް ހަމްދަރުދީއެއް ނޯންނާނެ ކަމުގައެވެ.
ހުކުރު ދުވަހު، ލައިވް ސްޓްރީމްކޮށް، އައިއެސްއެސް އިން ގެނެސްދިން ނޫސްވެރިންގެ ބައްދަލުވުމުގައި މިޝަން ކޮމާންޑަރ ވެޓެރަން ކޮސްމޮނޯޓު އޯލެގް އާރެޓެމްވޭއާއި އޭނާގެ ހެދުމާއި ގުޅޭގޮތުން ސުވާލު ކޮށްފައި ވެއެވެ.
"ހުރިހާ ކުރޫންވެސް ވަނީ ތަފާތު ކުލަތައް އިޚްތިޔާރު ކޮށްފައި، އެއީ ކުލައެއް އިޚްތިޔާރު ކުރުމަށް އަހަރެމެންނަށް ލިބުނު ފުރުސަތު،" އޭނާ ބުނެފައި ވެއެވެ. "ހަގީގަތަކީ އަހަރެމެން އަތުގައި އެބަހުރި ރީނދޫ ކުލައިގެން ވަރަށް ގިނަ ހެނދުން، އެހެންވީމަ އަހަރެމެން އެ ހެނދުންތައް ލާން އެބަޖެހޭ. އަހަރެމެން ރީނދޫ ކުލައިގެ ފްލައިޓް ހެދުން ލާންޖެހުނު ސަބަބަކީ އެއީ."
ހޮނިހިރު ދުވަހު، އޭނާއާއި ހަވާލާދީ ރޮސްކޮސްމޮސްގެ ޓެލެގްރާމް އެކައުންޓުގައި ބުނެފައިވަނީ ކުރޫން ލާ ހެދުންތައް ތައްޔާރު ކުރެވިފައިވަނީ މީގެ 6 މަސްދުވަސް ކުރިން ކަމަށާއި، އަދި 3 ކޮސްމޮނޯޓުން އިޚްތިޔާރު ކޮށްފައިވަނި އެމީހުން ކުރިން ކިޔެވި ޔުނިވަރސިޓީގެ ކުލަތައް ކަމުގައެވެ.
"ކުލައަކީ ކުލަ. އެއީ ޔޫކުރެއިންއާއި ގުޅުންހުރި ކަމެއް ނޫން،" ވެޓެރަން ކޮސްމޮނޯޓު އޯލެގް އާރެޓެމްވޭ ބުނެފައި ވެއެވެ. "އަހަރެމެން ޖައްވުގައި ތިއްބަސް މި ދުވަސްކޮޅު އަހަރެމެން މިތިބީ އަހަރެމެންގެ ރައްޔިތުންނާއި ރައީސާ އެކީ."
ޔޫކުރެއިންގެ ދިދައިގެ ކުއަކީ ރީނދުލާއި މަޑުނޫ ކުލައެވެ. އަދި މިހާރު އެގައުމުގައި ކުރެވެމުންދާ ހަނގުރާމާއިގައި އެގައުމުގެ ސިފައިން ގިނައިން ތިބެނީ ދިދައިގެ ކުލައިގެ ރިބަން ފަށެއް އަތުގައި އައްސައިގެންނެވެ.
