އަންނަ ހޮނިހިރު ދުވަހު ބާއްވާ ޅ.ކުރެންދޫ ކައުންސިލް ރައީސްގެ އިންތިޚާބުގައި ވާދަކުރާއިރު، ލިބޭ އެންމެބޮޑު ހިތްހަމަ ޖެހުމަކީ މިއިންތިޚާބުގެ ކެމްޕެއިންގައި އެކުގައި އެމްޑީޕީގެ ބޭފުޅުންވެސް ހަރަކާތްތެރިވާތީ ކަމުގައާއި، ކުރެންދޫގެ ތަރައްޤީ އަލުން އިޔާދަ ކުރެވޭނީ ތަރައްޤީގެ ފިކުރަށް ކަމުގައި ޕީޕީއެމް ޓިކެޓުގައި ވާދަކުރައްވާ އިސްމާއިލް މަދީހު ވިދާޅުވެއްޖެއެވެ.
ކުރެންދޫ ކައުންސިލް ރައީސް އިންތިޚާބުގެ ކެމްޕެއިންގައި ރައީސް ޔާމީން މިއަދު ކުރެންދޫއަށް ވަޑައިގެން ބޭއްވި ހަފްލާގައި ވާހަކަ ދައްކަވަމުން މަދީހު ވިދާޅުވީ، ކުރެންދޫ ކައުންސިލް ރައީސްކަމަށް އަނެއްކާވެސް ވަދަކުރަން ނިންމީ ކުރެންދޫގެ ގިނަ އަދަދެއްގެ ރައްޔިތުން އެދުމުންކަމަށެވެ.
ކުރެންދޫގެ ފެނިގެންދަނީ ތަރައްޤީގައި މިއަދު ފަހަތަށް ދާތަން ކަމަށާއި، އެކަން ބަދަލުކޮށްގެން ނޫނީ، ކުރެންދީގެ ކުރިމަގު އުޖާލާ ނުވާނެކަމަށް މަދީހު ވިދާޅުވިއެވެ. އޭނާ ވިދާޅުވީ ކުރެންދޫ ރައްޔިތުން އެދޭފަދަ ތަރައްޤީއެއް ލިބޭނީ އެކަމަށް ވަކާލާތު ކޮށްގެން ކަމަށެވެ. އެކަން ކުރެވޭ ވަރުގެ ގާބިލްކަމާއި އަޒުމާއިއެކު ކުރެންދޫ ރައްޔިތުންނަށް ޚިދުމަތް ކޮށްދެވޭނެ މީހަކީ އޭނާކަަމަށް މަދީހު ވިދާޅުވިއެވެ.
ކެމެޕެއިންފައި ބައިވެރިވާ އަދި ކުރެންދޫގެ ޒުވާނުންނަށް މަދީހު ވަނީ، އޭނާ އިންތިޚާބުވާތާ 15 ދުވަސް ތެރޭގައި ޒުވާނުން ބޭނުންވާ ގޮތަށް ފުޓްސަލް މުބާރާތެއް ބާއްވަދޭނެ ކަމުގެ ޔަގީންކަން ދެއްވާފައެވެ. އަދި ކުރެންދޫގެ އިޖުތިމާއީ ކަންކަން ހައްލުކޮށް ޕާކުވެސް ޒަމާނީ ފެންވަރަށް ތަރައްޤީ ކޮށްދޭނެކަމަށް މަދީހު ވިދާޅުވިއެވެ. މީގެ އިތުރުން ކުރެންދޫގެ ތަރައްޤީގެ ކަންކަމުގައި ކުރަންޖެހުނު ކޮންމެ ކަމެއް ކުރުމަށް ވަރަށް ސާބިތު ކަމާއިއެކު މަސައްކަތް ކޮށްދެއްވާނެ ކަމުގެ ޔަގީންކަން މަދީހު ވަނީ ދެއްވާފައެވެ.
މަދީހުގެ ވާހަކާގައި އޭނާއާއި ވާދަކުރާ އިދިކޮޅު ކެނޑިޑޭޓަށް ރައްދުދީ ބަހުގެ ހަމަލާއެއް ދީފައިނުވެއެވެ. މަދީހު ވިދާޅުވެފައިވަނީ އެނާ މަސައްކަތް ކުރާނީ ކުރެންދޫގެ ހުރިހާ ރައްޔިތުންނާއި ގުޅިގެން ރަށުގެ ތަރައްޤީއަށް ޓަކައި ކަމުގައެވެ.
