މިއަދު ހަވީރު ޅ.ނައިފަރުގައި ބޭއްވުމަށް ހަމަޖެހިފައިވާ "އިންޑިއާ އައުޓް" ހަރަކާތަށް މުޅި ރަށް ވަރަށް ބޮޑަށް ތައްޔާރު ވެއްޖެއެވެ.
ރައީސް ޔާމީން މިހަރަކާތުގައި ނައިފަރަށް ވަޑައިގަތުމަށް ހަމަޖެހިފައިވަނީ މިއަދު ހަވީރު 16:30 ހާއިރުއެވެ. އެމަނިކުފާނު ނައިފަރަށް ވަޑައިގަތުމުގެ ކުރީން ޅ.ކުރެންދޫއަށް ދިއުމަށް ވަނީ ހަމަޖެހިފައެވެ. ނައިފަރަކަށް ރައީސް ޔާމީނަށް ތާއީދު ބޮޑު ރަށަކަށްވާއިރު މުޅިރަށް ވަނީ އިންޑިއާ އައުޓްގެ ބެނާތަކާއި، ޕީޕީއެމްގެ ކުލަތަކުން ޖަރީކޮށްފައެވެ.
ރައީސް ޔާމީން މިއަދު ނައިފަރަށް އިންޑިއާ އައުޓް ހަރަކާތުގައި ވަޑައިގެންނެވާއިރު މިއީ މުޅި ޅ.އަތޮޅަށް އަންނަ އީދެއްގެ ގޮތުގައި ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ވިދާވެފައެވެ. ރައީސް ޔާމީނަކީ ޅ.އަތޮޅުގެ ތާރީހުގައިވެސް އެއަތޮޅަށް އެންމެ ބޮޑެތި ތަރައްޤީ ގެނެސްދެއްވި ރައީސްކަމަށް ޝިޔާމް ވިދާޅުވިއެވެ. އިދިކޮޅު ކޯލިޝަނުން ބުނެފައިވަނީ މިހަރަކާތް ދެން ހުއްޓުވޭނެ ގޮތެއް ނެތްކަމަށެވެ. އިންޑިއާ އައުޓް ހަރަކާތުގައި ގިނަ އަދަދެއްގެ ރައްޔިތުން ދަނީ ބައިވެރިވަމުންނެވެ.
ރައީސް ޔާމީން ވިދާޅުވެފައިވަނީ އިންޑިއާ އައުޓް ހަރަކާތަކީ ރާއްޖޭގެ މިނިވަންކަމާއި ސިޔާދަތާއި ގުޅުން އޮތް ޤައުމީ ހަރަކާތެއްކަމަށެވެ. ރައްޔިތުންގެ މަޖިލީހުގައި ސަރުކާރަށް ފުލް ކޮންޓްރޯލް އޮތުމުން ޤާނޫނު ހެދިދާނެކަމަށާއި، ނަމަވެސް ދިވެހި ފަސްގަނޑުގައި އިންޑިއާގެ އަސްކައްރިއްޔާ ތިބުމަކީ ދިވެހި ރައްޔިތުން ޖާގަ ދޭނެކަމެއް ނޫންކަމަށް ރައީސް ޔާމީން ވަނީ ވިދާޅުވެފައެވެ.
މާލެ އަތޮޅުގެ ރަށްތަކުން ރައީސް ޔާމީން ފެއްޓެވި އިންޑިއާ އައުޓް ހަރަކާތް މިހާރު ވަނީ އެމަނިކުފާނާ އެކު ށ. އަތޮޅާއި، ރ. އަތޮޅާއި، އދ. އަތޮޅާއި، ފ. އަތޮޅުގެ އިތުރުން ގއ. އަތޮޅުގައި ވެސް ކުރިއަށް ގެންގޮސްފައެވެ. ރައީސް ޔާމީން ބައިވެރިވެވަޑައިގެން އެންމެ ފަހުން އިންޑިއާ އައުޓް ހަރަކާތް ކުރިއަށް ގެންދިޔައީ އދ. މަހިބަދޫގައެވެ.
