މިސަރުކާރުން ވެރިކަމަށް އައުމަށް ރައްޔިތުންނަށް ވެފައިވާ ވައުދުތައް ފުއްދުމުގައި އިކޮނޮމިކް މިނިސްޓަރ އަދި އެމްޑީޕީގެ ޗެއާޕާސަންގެ މަޤާމަށް ވާދަ ކުރައްވާ ފައްޔާޟު އިސްމާއިލްގެ ދައުރު ބޮޑުކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
އެމްޑީޕީގެ ޗެއާޕާސަން އިންތިޚާބުގައި މިނިސްޓަރ ފައްޔާޟު ވާދަކުރައްވައި ކެމްޕެއިން ކުރައްވަން ފެއްޓެވުމުން އޭނާއާއި ވާދަ ކުރައްވާ ކެނޑިޑޭޓާއި، ކެމްޕެއިން ޓީމުން ދަނީ ސަރުކާރުން މިކެމްޕެއިނަށް ނުފޫޒު ފޯރުވަމުންދާކަމަށް ތުހުމަތު ކުރަމުންނެވެ. އެގޮތުން ރަށްރަށުގައި ހިންގޭ ތަރައްޤީގެ މަޝްރޫޢުތައްވެސް މިއިންތިޚާބާއި ގުޅިގެން އަވަސްވެ، ލަސްވުންތަކެއްވެސް އަންނަކަމަށް ދަނީ ތުހުމަތު ކުރަމުންނެވެ.
މި ތުހުމަތުތަކަށް ރައްދު ދެއްވައި ރާއީ ވިދާޅުވީ، ސަރުކާރުން ރައްޔިތުންނަށް ވެފައިވާ ވައުދުތައް ފުއްދަމުންދަނީ އެމްޑީޕީގެ ޗެއާޕާސަންގެ އިންތިޚާބު ބޯމަތިވުމުން ނޫންކަމަށެވެ. އަދި އެކަންކަން ކުރަމުންދަނީ މިނިސްޓަރ ފައްޔާޟު މިމަޤާމަށް ވާދަކުރުމަކުންވެސް ނޫންކަމަށެވެ. އެމްޑީޕީންނާއި، ރައީސް ޞާލިހު ރައްޔިތުންނަށް ވެފައިވާ ވައުދުތައް އިންތިޚާބުގެ މާކުރިންވެސް ދަނީ ފުއްދަމުން ކަމަށާއި، މިކަންކަމުގައި އެންމެ ބޮޑު ދައުރެއް އަދާކުރައްވަނީ މިނިސްޓަރ ފައްޔާޟުކަމަށް ރާއީ ވިދާޅުވިއެވެ.
ސަރުކާރުން ދާޢީިރާތަކުގެ ތަރައްޤީއަށް ކުރަންޖެހޭ މަސައްކަތް ތަކާއި، ރާއްޖޭގެ ރައީސްގެ ވައުދުފުޅުތަކާއި، MDPގެ މެނިފެސްޓޯގައިވާ ކަންކަން ކުރަމުން ގެންދަނީ، އަދި ކުރަމުންދަނީ ޕާޓީގެ އިންތިޙާބަށް ފައްޔާޟު ވާދަކުރައްވާތީ ކީނޫނެވެ. އެކަމަކު މިނިސްޓަރު ދައުރު އެކަންކަން ކަމުގައިބޮޑެވެ.
– ރާއީ ވިދާޅުވިއެވެ.
މިއިންތިޚާބުގައި ފައްޔާޟާއި ވާދަކުރައްވަނީ، އިންތިއެވެ. އިންތިއާއި ފައްޔާޟުގެ ޓީމުތަކުން ކެމްޕެއިން ކުރިއަށް ގެންދާއިރު އިންތިޚާބު ބޭއްވުމަށް ކުރިން ކަނޑައަޅާފައިވާ ތާރީހަށް މިހާރުވަނީ ބަދަލު ގެނެސްފައެވެ. އެމްޑީޕީގެ ޗެއަރޕަރސަން، އަންހެނުންގެ ރޫޙު، އަދި ޒުވާނުންގެ ހިތްވަރުގެ އިންތިޚާބު ބޭއްވުމަށް އެޕާޓީގެ ޤައުމީ މަޖިލީހުން ފާސްކޮށްފައިވާ ތާރީޚަކީ އަންނަ މަހުގެ 16ވަނަ ދުވަހެއެވެ.
އިންތިޚާބު ބޭއްވުމަށް މިހާރު ކަނޑައަޅާފައިވާ ތާރީޚާއި ރަމަޟާން މަސް ދިމާވާތީ އިންތިޚާބު ފަސްކުރުމަށް އެދި ޗެއާޕާސަންގެ މަޤާމަށް ވަދަކުރައްވާ އިކޮނޮމިކް މިނިސްޓަރ ފައްޔާޒު އިސްމާޢީލް ވަނީ އެދިވަޑައިގެންފައެވެ. މިހާރު އިންތިޚާބު ބޭއްވުމަށް ހަމަޖެހިފައިވަނީ މެއި މަހުގެ 14 ވަނަ ދުވަހަށެވެ.
