ލާމަރުކަޒީ ނިޒާމާމެދު މައި ސަރުކާރުން އަމަލުކުރަމުންދަނީ ވަރަށް ކޮށިކޮށްކަމަށާއި އާ ލާމަރުކަޒީ ނިޒާމަށް ދަޢުލަތުގެ ވުޒާރާތަކުން ފަރިތަވެ ވަޑައިގަންނަވަން ޖެހޭ ކަމަށް މާލެ ސިޓީގެ ގަލޮޅު އުތުރު ދާއިރާގެ އެމްޑީޕީ ކައުންސިލަރު މުޙައްމަދު ސައިފް ފާތިޙު ވިދާޅުވެއްޖެއެވެ.
ސައިފް މިފަދައިން ވިދާޅުވީ މާލެ ސިޓީ ކައުންސިލްގެ 44 ވަނަ ރަސްމީ އާއްމު ބައްދަލުވުމުގައި ދެއްކެވި ވާހަކަފުޅުގައެވެ. މައި ސަރުކާރު ލާމަރުކަޒީ ނިޒާމަށް ވަރަށް ކޮށިކަމަށް ސައިފް ވިދާޅުވީ މާލެއާއި ވިލިމާލެއާއި ގުޅީފަޅާއި ތިލަފުށި ގުޅުވައިލާ ބުރިޖުގެ މަޝްރޫޢަށް ސިޓީ ކައުންސިލުން ހުރަސްއަޅާކަމަށް ސަރުކާރުން ބުނުމާއި ގުޅިގެން އެކަމަށް އިޝާރާތްކުރައްވައި ދެއްކެވި ވާހަކަފުޅުގައެވެ.
ސައިފް ވިދާޅުވީ އަލަށް އުފެދިގެން އައި ލާމަރުކަޒީ ނިޒާމު ތަަސައްވަރުކުރާ އުސޫލަކީ ސިޓީއެއްގައި ނުވަތަ ރަށެއްގައި ކުޑަ ނުވަތަ ބޮޑު މަޝްރޫޢެއް ހިންގި ނަމަވެސް، އެ ސިޓީއެއްގައި ނުވަތަ އެ އަވަށެއްގައި ދިރިއުޅޭ އެތަނަކަށް ވޯޓު ހައްގުވާ އެތަނުގެ އަހުލުވެރިން ކުރެން ޚިޔާލު ހޯދުން ކަމަށާއި، ލޯކަލް ކައުންސިލުތައް އެކަށެއެޅިފައިވާ ސަބަބަކީ ރަށްތަކާއި ސިޓީތަކުގެ އަހުލުވެރިންގެ ވިސްނުމާއި މަޝްވަރާ އެ ސަރޙައްދެއްގައި ކުރެވޭ މަސައްކަތްތަކާ ގުޅޭ ގޮތުން ހޯދުން ފަސޭހަކުރުން ކަމަށެވެ.
އެމީހުންގެ މަޝްވަރާއެއް ހޯދުން. އެކަންތައް ކުރުމަށްޓަކައި، ލޯކަލް ކައުންސިލްތައް އެކަށައެޅިފައި މިވަނީ. އެހެންވީމަ އެހެން މެމްބަރުންވެސް މިތަނުގަ ފާހަގަ ކުރެއްވި ފަދައިން، ބްރިޖްވެސް އަޅަން ޖެހޭނެ، އަދި ބޮޑެތި އިމާރާތްތައްވެސް ކުރަންޖެހޭނެ،އެހެން ނަމަވެސް އެކަންކަން ހިންގަންވާނީ އެ ސަރަޙައްދެއްގަ ދިރިއުޅޭ އާންމުންނާއި އެތަނެއްގަ އެ އޮންނަ ލޯކަލް ކައުންސިލާއި މަޝްވަރާ ކުރުމަށްފަހު.
– ސައިފް ވިދާޅުވިއެވެ.
ސައިފް އިތުރަށް ވިދާޅުވީ ބުރިޖު އެޅުމާއި ބޮޑެތި އިމާރާތްތައް ބިނާކުރުމަކީ ކުރަންޖެހޭ ކަންކަން ކަމުގައިވީ ނަމަވެސް އެކަން ކުރަންޖެހޭނީ އެ ސަރަހައްދެއްގައި ދިރިއުޅޭ ރައްޔިތުންނާއި އެ ސަރަހައްދުގެ ލޯކަލް ކައުންސިލުތަކާ މަޝްވަރާކޮށް އެ ކައުންސިލުތަކަށް އެ މަޝްރޫޢުގެ ފުރިހަމަ މައުލޫމާތު ފޯރުކޮށްދީގެން ކަމަށެވެ.
އަލަށް މި އުފަންވެގެން އައި ލާމަރުކަޒީ ނިޒާމް ތަސައްވަރު ކުރާ ގޮތަކީ، ސިޓީއެއްގަ ރަށެއްގަ އަތޮޅެއްގަ، ބޮޑު ޕްރޮޖެކްޓެއްވިޔަސް އަދި ކުޑަ ޕްރޮޖެކްޓެއްވިޔަސް، ހިންގާކަމަށްވަންޏާ އެތަނެއްގެ އަހުލުވެރިން އެތާނގަ ދިރިއުޅޭ މީހުން، އެތަނަށް ވޯޓު ހައްގުވާ މީހުންގެ، ގާތުގަ ހޭ އަހާލުން.
– ސައިފް ވިދާޅުވިއެވެ.
ސަރުކާރަށް ފާޑުވިދާޅުވަމުން ސައިފް ފާހަގަކުރެއްވީ ސަރުކާރު އަދިވެސް ފެންނަނީ ލާމަރުކަޒީ ނިޒާމަށް ނުފަރިތަ ކޮށި ސަރުކާރެއްގެ ގޮތުގައި ކަމަށެވެ. އަދި ވުޒާރާތަކުން ކަމަކަށްވާ ޒާތުގެ ބޮޑު ކަމެއްގައި ނަމަ އެއްވެސް މިންވަރަކަށް ކައުންސިލުތަކުގެ ލަފާނުހޯދާ ކަމަށްވެސް އޭނާ ވިދާޅުވިއެވެ.
އޭގެ ފުރިހަމަ މަޢުލޫމާތު ލޯކަލް ކައުންސިލަށް ލިބެން ޖެހޭނެ، އޭގެ ޕަބްލިކް ކޮންސަލްޓޭޝަން ހިނގަން ޖެހޭނެ. އެހެން ނޫންކަމަށް ވަނީ ވިއްޔާ، އަޅުގަނޑުމެން މި ލާމަރުކަޒީ ވާހަކަ ދެއްކުން ބުއްދިވެރިއެއް ނޫން. އަޅުގަނޑުމެންގެ ތެރެއަށް އާ ލާމަރުކަޒީ ނިޒާމް މި ތަޢާރަފް ވެގެން އައިމަ އެއަށް އެބަ ދަޢުލަތުގެ ވުޒާރާތަކުން ފަރިތަވެ ވަޑައިގަންނަވަން ޖެހޭ. ވަރަށް ކޮށިކޮށް މިފެންނަނީ، އަދިވެސް ލާމަރުކަޒީ ނިޒާމާއި މެދު، މައި ސަރުކާރުން ޢަމަލު ކުރައްވާ ގޮތް ވަރަށް ކޮށިކޮށް އަޅުގަނޑު މެންނަށް މި ފެންނަނީ. ވަރަށް ބޮޑަށް މި ހަޖަމް ނުވެގެން އުޅޭތަން މި ފެންނަނީ، ކަމަކަށްވާކަހަލަ ބޮޑު ކަމެއްގަ ވިއްޔާ ލަފާ ނާހާތަން މި ފެންނަނީ، އަޅުގަނޑުމެންނަށް މިގޮތަށް ޤަބޫލެއް ނުވެވޭ.
– ސައިފް ވިދާޅުވިއެވެ.
ސައިފް ވިދާޅުވީ ބްރިޖު އެޅުން ފަދަ މަޝްރޫޢުތަކަކީ ކުރިއަށްގެންދަންޖެހޭ މަޝްރޫޢުތަކެއް ކަމަށާއި، ނަމަވެސް އެ މަޝްރޫޢުތައް ކުރިއަށްގެންދިއުމުގައި ފުރިހަމަކުރަންޖެހޭ އިޖުރާޢަތްތަކެއް ޤާނޫނުގައި ބަޔާންކޮށްފައިވާ ކަމަށާއި، އައު ލާމަރުކަޒީ ނިޒާމެއް އައުމުން އެ ނިޒާމަށް ސަރުކާރުގެ ވުޒާރާތައް ފަރިތަވާންޖެހޭ ކަމަށް ސައިފް ވިދާޅުވިއެވެ
