އިންޑިއާ ކަނޑުން ބާނާ ރީނދޫ އުރަހަ ކަންނެލި ރެޑް ލިސްޓްކޮށް އެބާވަތުގެ ކަންނެލި އެމެރިކާގެ ސީފުޑް ވޮޗްއިން ރެޑްލިސްޓްކޮށްފިއެވެ.

އިންޑިއާ ކަނޑުން ބާނާ ރީނދޫ އުރަހަ ކަންނެލި އެމެރިކާގެ ސީފުޑް ވޮޗްއިން ރެޑްލިސްޓްކޮށްފައިވާކަން ހާމަކުރައްވާ ފިޝަރީޒް މިނިސްޓަރ ޑރ.ޙުސައިން ރަޝީދު ޙަސަން ކުރެއްވި ޓްވީޓްގައި ވިދާޅުވީ، އެމެރިކާގެ މޮންޓެރޭ ބޭ އަކުއޭރިއަމްގެ ސީފުޑް ވޮޗްއިން ވަނީ ރާއްޖެވެސް ހިމެނޭގޮތަށް އިންޑިޔާ ކަނޑުގެ ރީނދޫ އުރަހަ ކަންނެލި ރެޑްލިސްޓްކޮށް، އެގަތުން ހުއްޓުވާފައިވާކަމަށެވެ. އެއީ އިންޑިޔާ ކަނޑުގެ ރީދޫއުރަހަ ކަންނެލީގެ ސްޓޮކަށް ގެއްލުން ލިބިފައިވާތީ އަދި ސްޓޮކު އާލާކުރުމަށް އައިއޯޓީސީ މެދުވެރިކޮށް ފިޔަވަޅުނޭޅޭތީކަމަށް މިނިސްޓަރ ވިދާޅުވިއެވެ.

އިންޑިޔާކަނޑުގެ ރީދޫއުރަހަ ކަންނެލީގެ ސްޓޮކަށް ގެއްލުން ލިބިފައިވާތީ އަދި ސްޓޮކު އާލާކުރުމަށް #IOTC މެދުވެރިކޮށް ފިޔަވަޅުނޭޅޭތީ، އެމެރިކާގެ @MontereyAq ގެ @SeafoodWatch އިން ވަނީ ރާއްޖެވެސް ހިމޭގޮތަށް އިނޑިޔާކަނޑުގެ ރީދޫއުރަހަ ކަންނެލި ރެޑްލިސްޓްކޮށް އެގަތުން ހުއްޓުވާފައި. pic.twitter.com/s6EZI2b44Q

— Hussain R. Hassan (@DrHussainHassan) March 16, 2022

ރެޑްލިސްޓްކުރި އެމެރިކާގެ ސީފުޑް ވޮޗްއަކީ މޮންޓެރީ ބޭ އަކުއޭރިއަމް އާ ގުޅިގެން ތިމާވެއްޓާ ކަންޑުގެ ދިރުން ހިމާޔަތްކޮށް ދެމެހެއްޓެނިވިގޮތެއްގައި މަސްވެރިކަން ކުރުމަށް މަސައްކަތް ކުރާ ޖަމްއިއްޔާއެކެވެ. މީޑިއާ ރިޕޯޓްތައް ބުނާގޮތުން މި ފިޔަވަޅު އެޅީ އިންޑިއާ ކަނޑުން މަސްވެރިކަންކުރާ 32 ގައުމުގެ ތެރެއިން ބައެއް ގައުމުތަކުން ސްޓޮކް އިތުރުކުރުމަށާއި މަސްވެރިކަން ދެމެހެއްޓެނެވި ގޮތެއްގައި ކުރުމަށް އެއްބާރުލުން ނުދޭތީއެވެ. މީގެ ތެރެއިން ގިނަ ގައުމުތަކަކީ ދާ އަޅައިގެން މަސްވެރިކަން ކުރާ ޤައުމުތަކެވެ.