ރަޝިއާގެ ރައީސަކީ ހަނގުރާމައިގެ މުޖުރިމެއްކަމަށް ޖޯ ބައިޑްން ސިފަކުރެއްވުމުން، ބައިޑްންގެ ވާހަކަތައް ރަޝިއާއިން ވަރަށް ބޮޑަށް ކުށްވެރި ކޮށްފިއެވެ.
ޕުޓިންއަކީ މުޖުރިމެއް ކަމަށް ބައިޑްން ސިފަކުރެއްވި ކުރެއްވުން ބަލައި ނުގަންނާނެ ކަމަށް ވިދާޅުވަމުން ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވިދާޅުވެފައި ވަނީ، "މިއީ ގަބޫލު ނުކުރެވޭ އަދި މާފްވެސް ނުކުރެވޭ ބަސްމަގެއް" ކަމުގައެވެ.
"އެނާއަކީ ހަގުރާމައިގެ މުޖުރިމެއް،" އެމެރިކާގެ ވޮޝިންގޓަންގައި އޮތް ނޫސްވެރިންގެ ބައްދަލުވުމުގައި ނޫސްވެރިންނާއި ވާހަކަ ދައްކަވަމުން ބައިޑްން ވިދާޅުވެފައި ވެއެވެ.
ވައިޓްހައުސްގެ ޕްރެސް ސެކެޓްރީ ޖެން ސާކީ ފަހުން ވިދާޅުވެފައިވަނީ އެމެރިކާގެ ރައީސް ދެއްވި ޖަވާބަކީ ނޫސްވެރިއެއްގެ ސުވާލަކަށް ދެއްވި "ސީދާ ޖަވާބެއް" ކަމުގައެވެ.
"އަހަރެމެންނަށް ފެނިގެން ހިގައްޖެ ޚުދުމުޚްތާރު ވެރިޔަކު، އެއްވެސް ބެލުމެއް ނެތި އާންމުން މަރާ، ހޮސްޕިޓަލްތަކަށާއި، މާބަނޑު އަންހެނުންނަށާއި އަދި ނޫސްވެރިންނަށްވެސް ދެމުންދާ ހަމަލާތައް،" ޖެން ސާކީ ވިދާޅުވެފައި ވެއެވެ.
ރަޝިއާގެ ރައީސް ޕުޓިންއަކީ "ހަނގުރާމައިގެ މުޖުރިމެއް" ކަމުގައި އެމެރިކާގެ ރައީސް ސިފަ ކުރައްވާފައި ވާއިރު، 3 ހަފްތާ ފާއިތުވެގެން ގޮސްފައިވާ ހަނގުރާމާގައި، މިއީ އެމެރިކާގެ އިސް އޮފިޝަލަކު މިބީދައިން ރަޝިއާގެ ރައީސް ސިފަކުރެއްވި ފުރަތަމަ ފަހަރެވެ.
ރަޝިއާއިން ޔޫކުރެއިންއަށް ދެމުންދާ ހަމަލާތަކުން އެގައުމު ދިފާއު ކުރުމަށް ރަޝިއާއަށް އެއް ބިލިއަން އެމެރިކާ ޑޮލަރުގެ އަސްކަރީ އެހީ ދެއްވާނެކަން ބައިޑްންވަނީ އިއްޔެ ހާމަ ކުރައްވާފައެވެ. މީގެތެރޭގައި އަމާޒަށް ހަމަލާދޭ ޑްރޯންތައް ވެސް ހިމެނެއެވެ. މިއެހީއަކީ ޔޫކުރެއިންއަށް އެކި ގޮތްގޮތުން އެހީތެރިކަން ފޯރުކޮށް ދިނުމުގެ ގޮތުން އެމެރިކާގެ ކޮންގްރެސްއިން ފާސްކޮށްފައިވާ 14 ބިލިއަން އެމެރިކާ ޑޮލަރު ފަންޑުގެ ތެރެއިން ފޯރުކޮށްދޭ އެހީއެވެ.
ކޮމެންޓު ފޮނުވާ