ރަޝިއާއިން އަދިވެސް ހުއްޓުމެއް ނެތި ޔޫކުރެއިންއަށް އުދުވާނީ ހަމަލާ ދެމުންދާއިރު، ދެގައުމު ދެމެދުގައި މިހާރު ކުރިޔަށްދާ ސުލްހައިގެ ވާހަކަތަކުގައި، ވަކި ފަރާތަކަށް ނުޖެހޭ ގައުމެއްގެ ގޮތުގައި އޮތުމަށް ރަޝިއާއިން ހުށަހެޅި ހުށަހެޅުމަށް ޔޫކުރެއިންއިން އިންކާރު ކޮށްފިއެވެ.
ރަޝިއާގެ މި ހުށަހެޅުމާއި ގުޅޭގޮތުން ޔޫކުރެއިންގެ ރައީސް ވޮލޮޑޮމިރު ޒެލެންސްކީ ވިދާޅުވެފައިވަނީ، މިހާރު ކުރިޔަށްދާ ސުލްހައިގެ ވާހަކަތަކުގައި އެގައުމުން ބޭނުންވަނީ މުސްތަގުބަލުގައި އެގައުމަށް ސެކިއުރިޓީގެ ގެރެންޓީ ލިބިގެންދާނެވަރުގެ ހަމަހަމަ ޑީލެއް ކަމުގައެވެ.
"އަހަރެމެންނަށް މިހާރުވެސް ހަގުރާމަ ކުރެވޭނެ. އަދި އަހަރެމެންނަށް މުސްތަގުބަލުގައިވެސް އަހަރެމެންގެ ގައުމު ދިފާޢު ކުރެވޭނެ. ޔޫކުރެރިންގެ ރައްޔިތުންގެ ދިރިއުޅުން. އަހަރެމެން މަޝްވަރާ ކުރަން ބޭނުމީ ޔޫކުރެއިންގެ ރައްޔިތުންނަށް ސެކިއުރިޓީގެ ޔަގީންކަން ލިބޭވަރުގެ ހަމަހަމަ ޑީލަކަށް،" ވީޑިއޯ މެދުވެރިކޮށް ވާހަކަ ދައްކަވަމުން ޒެލެންސްކީ ވިދާޅުވެފައި ވެއެވެ.
ޔޫކުރެއިންގެ އެންމެ އިސް ނެގޯޝިއޭޓަރ މިޚައިލޯ ޕޮޑޮލްޔަކް ވިދާޅުވެފައިވަނީ، އެގައުމުން ބޭނުންވަނީ އެގައުމުގެ ރައްކާތެރިކަން ބައިނަލްއަގުވާމީ ފަައުޖެއް މެދުވެރިކޮށް ޔަގީން ކޮށްދިނުން ކަމަށާއި، އަދި އޮސްޓްރިއާ އަދި ސްވިޑެން ފަދައިން، ވަކި ކޮޅަކަށް ނުޖެހޭ ގައުމެއްގެ ގޮތުގައި އޮތުމަށް ރަޝިއައިން ހުށަހަޅާ ހުށަހެޅުން އެގައުމުން ބަލައި ނުގަންނާނޭ ކަމުގައެވެ.
މި ހަފްތާގެ ބުދަ ދުވަހު ރަޝިއާއިން ބުނެފައިވަނީ، މިހާރު ކުރިޔަށްދާ މަޝްވަރާތަކުގައި، ހަގުރާމަ ހުއްޓާލުމުގެ ޝަރުތެއްގެ ގޮތުން، ބައިނަލްއަގުވާމީ މަސްރަހުގައި އޮސްޓްރިއާ އަދި ސުވިޑެންފަދައިން، ވަކިއަތަކަށް ނުޖެހޭ ގައުމެއްގެ ގޮތުގައި ޔޫކުރެއިން އޮތުމާއި ގުޅޭގޮތުން އެގައުމުންދަނީ މަޝްވަތާ ކުރަމުން ކަމުގައެވެ.
"މިއީ މި މަޝްވަރާތަކުގައި ވާހަކަދެވެމުންދާ، އަދި ރަޝިއާއިން ގަބޫލު ކޮށްފާނެ ޝަރުތެއް،" ކްރެމްލިންގެ ތަރުޖަމާން ޑިމިޓްރީ ޕެސްކޯވް ވިދާޅުވެފައި ވެއެވެ.
މި މަޝްވަރާތަކުގައި ރަޝިއާގެ ފަރާތުން ބައިވެރިވަމުންދާ ނެގޯޝިއޭޓާރ ލާޑިމިރު މެޑިންސްކީ ވިދާޅުވެފައިވަނީ، މަޝްވަރާތައް ދަނީ އުދަގޫކޮށް އަދި ލަސްކޮށް ކަމުގައެވެ. އެހެންނަަމަވެސް އޭނާ ވިދާޅުވެފައިވަނީ ރަޝިއާއިން ބޭނުންވަނީ ވީހާވެސް އަވަހަށް ސުލްހަވުމަށް ކަމުގައެވެ.
