އެމެރިކާގެ މިހާރުގެ ރައީސް ޖޯ ބައިޑްންއާއި އަދި ކުރީގެ ސެކެޓްރީ އޮފް ސްޓޭޓް ހިލަރީ ކުލިންޓަންގެ އިތުރުން އެމެރިކާގެ 12 އޮފިޝަލަކާއި ދެކޮޅަށް ދަތިކުރުމުގެ ފިޔަވަޅު އަޅާފައިވާކަން ރަޝިއާގެ ފޮރިންގ މިނިސްޓްރީން ހާމަ ކޮށްފިއެވެ.
މިގޮތުން ރަޝިއާއިން ދަތިކުރުމުގެ ފިޔަވަޅު އަޅާފައިވާ ފަރާތްތަކުގެ ލިސްޓުގައި އެމެރިކާގެ މިހާރުގެ ސެކެޓްރީ އޮފް ސްޓޭޓް އެންތަނީ ބްލިންކަންއާއި، ޑިފެންސް ސެކެޓްރީ ލޯއިޑް އޮސްޓިންއާއި، ޕްރެސް ސެކެޓްރީ ޖެން ސާކީގެ އިތުރުން ބައިޑްންގެ ސަރުކާރުގެ އިތުރު އެހެން އޮފިޝަލުންވެސް ހިމެނެއެވެ.
ރަޝިއާއިން އާންމުކުރި ލިސްޓުގައި ހިމެނޭ، ގިނަ ބަޔަކަށް ހައިރާންކަން ގެނުވި ދެނަމަކަށް ވެގެން ދިޔައީ، އެމެރިކާގެ ކުރީގެ ސެކެޓްރީ އޮފް ސްޓޭޓް ހިލަރީ ކުލިންޓަންއާއި މިހާރުގެ ރައީސް ޖޯ ބައިޑްންގެ ދަރިފުޅު ހަންޓަރގެ ނަމެވެ.
ރަޝިއާއިން އަޅާފައިވާ ފިޔަވަޅުތަކުގެ ދަށުން، މިފަރާތްތައް ރަޝިއާއަށް އެތެރެވުމުގެ އިތުރުން ރަޝިއާގައި މިއިން އެއްވެސް ފަރާތެއްގެ އެސެޓެއް ހުރިނަމަ އެސްޓްތައް ފްރީޒްކުރުންވެސް ހިމެނެއެވެ.
އެހެންނަމަވެސް، ރަޝިއާގެ ފޮރިންގ މިނިސްޓްރީން ހާމަ ކޮށްފައިވާ ގޮތުގައި މި ފިޔަވަޅުތަކުގެ ނަތީޖާއެއްގެ ގޮތުން މިފަރާތްތަކާއެކީ ރަޝިއާއިން ބާއްވަންޖެހޭ މަތީ ފަންތީގެ ގުޅުންތަކަށް އަސަރެއް ނުކުރާނެއެވެ.
މިލިސްޓުގައި ހިމަނާފައިވާ ފަރާތްތަަކަކީ:
- ޗެއަރމަން އޮފް ދަ ޖޮއިންޓް ޗީފްސް އޮފް ސްޓާފް މާރކް މިލޭ
- ނޭޝަނަލް ސެކިއުރިޓީ އެޑްވައިޒަރ ޖޭކް ސުލިވަން
- ޑެޕިއުޓީ ނޭޝަނަލް ސެކިއުރިޓީ އެޑްވައިޒަރ ޑަލީޕް ސިންގ
- ޔޫއެސް އޭޖެންސީ ފޯ އިންޓަރނޭޝަނަލް ޑިވެލޮޕްމަންޓް (USAID) އެޑްމިނިސްޓްރޭޓަރ ސަމަންތާ ޕަވަރ
- ޑެޕިއުޓީ ސެކެޓްރީ އޮފް ޓްރެޒަރީ ވައްލޭ އަޑެޔެމޯ
- ޕްރެސިޑެންޓް އޮފް އެސްކްޕޯޓު އިމްޕޯޓު ބޭންކު އޮފް ދަ ޔޫއެސް ރެޓާ ޖޯ ލެވިސް
ރަޝިއާއިން ބުނެފައިވަނީ މިއީ އެމެރިކާއިން އެގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ބަދަލުގައި އަޅާފައިވާ ފިޔަވަޅުތަކެއް ކަމުގައެވެ.
ރަޝިއާއަކީ މިހާރު ދުނިޔޭގައި އެއް ގައުމަކާ ދެކޮޅަށް އިގްތިސާދީ ގޮތުން އެންމެ ވަރުގަދަ ފިޔަވަޅުތައް އަޅާފައިވާ ގައުމެވެ. މިގޮތުން ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށުމާއި ގުޅިގެން އެމެރިކާއާއި ޔޫރަޕްގެ ގައުމުތަކުން ވަނީ، ރަޝިއާ ސަރުކާރުގެ އިސް އޮފިޝަލުންނާއި، ޕުޓިން ގާތް މަހުޖަނުންނާއި، ރަޝިއާގެ ބޮޑެތި ކުންފުނިތަކާއި އަދި ބޭންކުތަކާ ދެކޮޅަށް ދަތިކުރުމުގެ ފިޔަވަޅު އަޅާފައެވެ.
