ޔޫކުރެއިންއަށް އިތުރު 1 ބިލިއަން ޑޮލަރުގެ އަސްކަރީ އެހީތެރިކަން ފޯރުކޮށް ދިނުމަށް ހަމަޖެހިފައިވާކަން، އެމެރިކާގެ ރައީސް ޖޯ ބައިޑްން މިއަދު އިއުލާން ކުރައްވާނޭކަމަށް، އެމެރިކާ ސަރުކާރުގެ އޮފިޝަލުންނާއި ހަވާލާދީ، ވޯލް ސްޓްރީޓް ޖާނަލްއިން ރިޕޯޓު ކޮށްފިއެވެ.
މި ނޫހުން ރިޕޯޓު ކޮށްފައިވާ ގޮތުގައި، މި ފައިސާ ޚަރަދު ކުރުމަށް ހަމަޖެހިފައިވަނީ، އެންޓި އެއަރކްރާފްޓް ހަތިޔާރާއި ހަނގުރާމަމަތީ އެއްގަމު އުޅަނދުތަކާއި ދެކޮޅަށް ހަމަލާދޭ ހަތިޔާރާއި، އަދި މިނޫނަސް އެއްގަމުގައި ގެންގުޅޭ ފަހުގެ ހަތިޔާރުތައް ގަތުމަށެވެ.
މި ފައިސާގެ އެހީތެރިކަމަކީ، ޔޫކުރެއިންއަށް އެހީތެރިކަން ފޯރުކޮށްދިނުމަށް ފާއިތުވެދިޔަ ހަފްތާގައި އެމެރިކާގެ ކޮންގްރެސްއިން ފާސްކޮށްފައިވާ 14 ބިލިއަން ޑޮލަރުގެ ފައިސާގެ އެހީގެ ތެރެއިން ފޯރު ކޮށްދިނުމަށް ހަމަޖެހިފައިވާ އަސްކަރީ އެހީތެރިކަމެވެ.
އެމެރިކާގެ ވައިޓްހައުސްގެ އޮފިޝަލުންނާއި ހަވާލަދީ، ރޮއިޓާރސްއިން ރިޕޯޓު ކޮށްފައިވާ ގޮތުގައި، ކޮންގްރެސްއިން ހުއްދަ ދީފައިވާ ފަންޑުގެ ތެރެއިން ސެކިއުރިޓީއާއި ގުޅުންހުރި ކަންކަމަށް ޚަރަދުކުރުމަށް ހަމަޖެހިފައިވަނީ 800 މިލިއަން އެމެރިކާ ޑޮލަރެވެ.
ރަޝިއާއިން 2014ވަނަ އަހަރު ޔޫކުރެއިންގެ ކްރައިމިއާ އެގައުމުގެ ބާރުގެދަށަށް ގެންދިޔަފަހުން، އެމެރިކާއިންވަނީ 2.5 ބިލިއަން އެމެރިކާ ޑޮލަރުގެ އަސްކަރީ އެހީތެރިކަން ޔޫކުރެއިންއަށް ފޯރު ކޮށްދީފައެވެ. އަދި އެންމެފަހުން އެމެރިކާއިން ޔޫކުރެއިންއަށް ފޯރުކޮށްދިން އަސްކަރީ ޝިޕްމަންޓު ހަމަޖައްސާ ދީފައިވަނީ ފާއިތުވެދިޔަ ފެބްރުއަރީމަހުގެ 26ވަނަ ދުވަހުއެވެ. އެފަހަރު 350 މިލިއަން އެމެރިކާ ޑޮލަރުގެ އަސްކަރީ އެހީ އެމެރިކާއިން ޔޫކުރެއިންއަށް ފޯރުކޮށް ދީފައި ވެއެވެ.
ރަޝިއާއިން ޔޫކުރެއިންއަށް ފޯރުކޮށް ދެމުންދާ އުދުވާނީ ހަމަލާތަކުން ޔޫކުރެއިން ހިމާޔަތް ކުރުމަށް އެމެރިކާއާއި ޔޫރަޕްގެ ގިނަ ގައުމުތަކުން ދަނީ ޔޫކުރެއިންއަށް އަސްކަރީ އެހީތެރިކަން ފޯރުކޮށް ދެމުންނެވެ.
