ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން، އެގައުމުގައި މިހާތަނަށް 1.4 މިލިއަން ކުދިން ރެފިއުޖީންނަށް ވެފައިވާކަން ޔޫއެންއިން ހާމަ ކޮށްފިއެވެ.
ޔޫއެން ޗިލްޑްރެންސް އޭޖެންސީ ޔުނިސެފްގެ ތަރުޖަމާން ޖޭމްސް އެލްޑަރ ވިދާޅުވެފައިވާ ގޮތުގައި، މިހާތަނަށް ހަގުރާމައިގެ ސަބަބުން ރެފިއުޖީންނަށް ވެގެން ގޮސްގައިވާ ޖުމްލަ އަދަދަށް ބަލާއިރު ކޮންމެ މިނިޓަކުން ކުއްޖަކު ރެފިއުޖީއަކަށް ވެގެން ގޮސްފައި ވާކަމުގައެވެ.
"ފާއިތުވެދިޔަ 20 ދުވަހަށް އެކަނި ބަލާލިކަމުގައި ވިނަމަވެސް، 70،000 ކުދިންވަނީ ރެފިއުޖީންގެ ގޮތުގައި ޔޫކުރެއިން ދޫކޮށް ހިޖުރަ ކޮށްފައި. އޭގެ މާނައަކީ، މި ހަނގުރާމަ ފެށުނުފަހުން، ކޮންމެ މިނިޓަކުން ކުއްޖަކު ރެފިއުޖީއަކަށް ވެގެންވަނީ ގޮސްފަ،" އޭނާ ވިދާޅުވިއެވެ.
ޔޫންއެއިން ހާމަ ކޮށްފައިވާ ގޮތުގައި، ހަނގުރާމަ ފެށުނުފަހުން މިހާތަނަށް 3 މިލިއަން މީހުންވަނީ އެގައުމު ދޫކޮށް ގޮސްފައެވެ.
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފެށުމާއެކު، އުފެދިފައިވާ ރެފިއުޖީ ކާރިސާއަކީ ދެވަނަ ބޮޑު ހަގުރާމައަށްފަހު ޔޫރަޕަށް ކުރިމަތިވެފައިވާ އެންމެ ބޮޑު ރެފިއުޖީ ކާރިސާއެވެ. އަދި ޔޫކުރެއިންއިންގެ އަވައްޓެރި ގައުމުތަކަށް ހިޖުރަ ކުރަމުންދާ ރެފިއުޖީންނަށް ގިނަ ގައުމުތަކުންދަނީ އެހީތެރިކަން ފޯރުކޮށްދެމުންނެވެ.
