ރަޝިއާއި ދެކޮޅަށް ދަތިކުރުމުގެ ފިޔަވަޅު އެޅުމުގެ 4 ވަނަ ޕެކޭޖަށް ޔޫރަޕިއަން ޔޫނިއަންގެ ފައިނޭންސް މިނިސްޓަރުން އެއްބަސް ވެއްޖެއެވެ. މި ޕެކޭޖުގެ ތެރޭގައި، ރަޝިއާގެ 600 ފަރާތަކަށް މިފަހަރުގެ ދަތިކުރުމުގެ ފިޔަވަޅުތައް އަމާޒު ކުރެވިގެން ދާނެއެވެ.
އިޔޫގެ މިފަހަރުގެ ފިޔަވަޅުތަކަށް އީޔޫގެ ފިނޭންސް މިނިސްޓަރުން ރުހުން ލިބިގެން ދިއުމާއެކު، ފްރެންޗް ފިނޭންސް މިނިސްޓަރު ބްރޫނޯ ލީ މައިރު ވަނީ މިއީ ތާރީޚީ ނިންމުމެއް ކަމުގައި ވިދާޅުވެފައެވެ.
"މިއީ ޔޫރަޕިއަން ޔޫނިއަންގެ މުޅި ތާރީޚުގައިވެސް އަޅާފައިވާ އެންމެ އަވަސް، އަދި އެންމެ ވަރުގަދަ ދަތި ކުރުމުގެ ފިޔަވަޅުތައް،" ފްރެންޗް ފިނޭންސް މިނިސްޓަރު ބްރޫނޯ ލީ މައިރު ވިދާޅުފައި ވެއެވެ.
އީޔޫގެ ދަތިކުރުމުގެ ފިޔަވަޅުތަކުގެ ލިސްޓުގައި ހިމަނާފައިވާ ފަރާތްތަކާއި އަދި ކުންފުނިތަކުގެ ނަންތަކެއް އަދި އާންމު ކޮށްފައެއް ނުވެއެވެ.
"މިފަހަރުގެ ދަތކުރުމުގެ ފިޔަވަޅުތަކުގެ ތެރޭގައި ރަޝިއާއަށް ބައެއް ބާވަތުގެ ލަގްޒަރީ މުދާ އެކްސްޕޯޓު ކުރުން މަނާ ކުރެވިގެން ދާއިރު، ވާރލްޑް ޓްރޭޑް އޯގަނިޒޭޝަންއާއި އެކީ އޮންނަ "ވިޔަފާރިއަށް ފަހި ގައުމެއްގެ" ހަސިއްޔަތުން ރަޝިއާ ވަކި ކުރެވިގެން ދާނެ– އޭގެ ނެތީޖާއެއްގެ ގޮތުން، އީޔޫގެ 27 ގައުމަށް ރަޝިއާއިން އެތެރެ ކުރާ ހުރިޔާ ޓްރޭޑް މުދަލެއްގެ ޓެރިފް ބޮޑު ކުރުމުގެ ފުރުސަތު ލިބިގެން ދާނެ،" އޭނާ ވިދާޅުވެފައި ވެއެވެ.
ޔޫރަޕިއަން ކައުންސިލް ނެރެފައި ބަޔާނުގައި ވާގޮތުން، މިފަހަރުގެ ދަތިކުރުމުގެ ފިޔަވަޅުތަކުގެ ތެރޭގައި، ރަޝިއާގެ މުއްސަނދި މަހުޖަނުންގެ އިތުރުން، ރަޝިއާއިން ޔޫކުރެއިންގައި ކުރަމުން އަންނަ ހަގުރާމައަށް އެހީތެރިވެދިނުމުގެ ގޮތުން ރަޝިއާގެ ސަރުކާރަށް ފަހިވާގޮތަށް ޕްރޮޕަގެންޑާ ފަތުރަމުންދާ ފަރާތްކާއި، އޭވިއޭޝަން ދާއިރާގެ ކުންފުނިތަކާއި، މިލިޓަރީއާއި ގުޅުންހުރި ކުންފުނިތަކާއި، ޝިޕް ބިލްޑިންގއާއި މެޝިން ބިލްޑިންގ ސެކްޓަރވެސް ހިމަނާފައި ވެއެވެ.
މިއަދު އިއުލާން ކުރި ފިޔަވަޅުތަކުގެ އިތުރަށް، އިތުރު ފިޔަވަޅުތައްވެސް އެޅުމަށް ހަޖަހިފައި ވޭތޯ ސުވާލު ކުރެވުމުން، އީޔޫގެ ފްރެންޗް ފިނޭންސް މިނިސްޓަރު ބްރޫނޯ ލީ މައިރު ވިދާޅުވެފައި ވަނީ،: "އެމަނޫލް މެކްރޮން (ފްރާންސްގެ ރައީސް) ވިދާޅުވެފައިވާ ފަދައިން އަހަރެންނަށް ޔަގީންކަން ދެވިދާނެ، ހުރިހާ ދޮރެއްވެސް ހުރީ ހުޅުވާފައި،" ކަމުގައެވެ.
ރަޝިއާއިން ޔޫކުރެއިންއަށް އަރާ އެގައުމުގައި ހިންގަމުންދާ އުދުވާންއާއި ގުޅިގެން ހުޅަނގާއި ޔޫރަޕްގެ ގައުމުތަކުން ދަނީ ރަޝިއާއާއި ދެކޮޅަށް އިގްތިސާދީގޮތުން ދަތިކުރުމުގެ ގިނަ ފިޔަވަޅުތަކެއް އަޅަމުންނެވެ.
