ރަޝިއާއިން ޔޫކުރެއިންގައި ކުރަމުންދާ ހަނގުރާމައާއި ދެކޮޅު އެކްޓިވިސްޓަކު ރަޝިއާ ސަރުކާރުގެ ޓީވީ ސްޓޭޝަންއަކަށް ވަދެގަނެ، ލައިވް ޕްރޮގްރާމް ކުރިޔަށް ދަނިކޮށް، ހަގުރާމައާއި ދެކޮޅު ޝުއޫރުތައް ފާޅު ކޮށްފިއެވެ.
ހޯމަދުވަހުގެ ރޭގެ ޓީވީ ސްޓޭޝަންގައި ޚަބަރު ކިޔަމުންދަނިކޮށް، ޚަބަރު ސްޓޫޑިއޯއަށް ވަދެގަނެ މި އަންހެން މީހާވަނީ ހަގުރާމައާއި ދެކޮޅު ޝުއޫރުތައް ލިޔެފައި ހުރި ކަރުދާސްތައް ބެލުންތެރިންނަށް ފެންނަ ގޮތަށް ދައްކާލާފައެވެ.
"ހަނގުރާމަ ހުއްޓާލާ، އެމީހުން އެ ހަދަނީ ހުސްދޮގު، މި ޕްރޮޕަގެންޑާ ގަބޫލު ނުކުރޭ،" ހަގުރާމައާއި ދެކޮޅު އެކްޓިވިސްޓު ހިފަހައްޓައިގެން ހުރި ކަރުދާހުގައި ލިޔެފައި ވެއެވެ. "ރަޝިއާ މީހުން މި ހަގުރާމައާއި ދެކޮޅު،" އެކްޓިވިސްޓު ހިފަހައްޓައިގެން ހުރި ކަރުދާހުގައި އިނގިރޭސިބަހުން ލިޔެފައިވާ އިބާރާތުގައި ލިޔެފައި ވެއެވެ.
މީޑިއާތަކުން ފަހުން ރިޕޯޓު ކޮށްފައިވާ ގޮތުގައި، ޓީވީގެ ސްޓޭޝަންގައި ޚަބަރު ކިޔަމުންދިޔަ ގަޑީގައި ސްޓޫޑިއޯތެރެއަށް ވަދެ ހަނގުރާމައާއި ދެކޮޅު ޝުޢޫރުތައް ލިޔެފައިހުރި ބޯޑުތައް ލައިވްކޮށް އާންމުންނަށް ފެންނަހެން ހިފަހައްޓައިގެން ހުރި އަންހެން މީހާއަކީ އެ ޓީވީ ސްޓޭޝަންގެ މުވައްޒިފެކެވެ.
WHOA: anti war protestor disrupts Channel One Russia during live broadcast.
Cracks in the facade.pic.twitter.com/iqdsANYQy9
— John Scott-Railton (@jsrailton) March 14, 2022
އިންޑެޕެންޑެންޓް ހިއުމަންރައިޓްސް ޕްރޮޓެސްޓް މޮނިޓަރިންގ ގުރޫޕް، އޯވީޑި-އިންފޯއިން ބުނެފައިވާ ގޮތުގައި މި އަންހެން މީހާއަކީ ރަޝިއާގެ ޓީވީ ޗެނަލްގައި މަސައްކަތް ކުރަމުންދާ މާރިއާ އޮވްސިއަނިކޯވާ ނަމަކަށް ކިޔާ މުވައްޒިފެކެވެ. އަދި އޮވްސިއަނިކޯވާގެ ރައްޓެހިންނާ ހަވާލާދީ އިންޑެޕެންޑެންޓް ހިއުމަންރައިޓްސް ޕްރޮޓެސްޓް މޮނިޓަރިންގ ގުރޫޕުން ހާމަ ކޮށްފައިވާ ގޮތުގައި އޭނާ ފަހުންވަނީ މޮސްކޯގެ އޮސްޓަންކިނޯ ޕޮލިސް ޑިޕާޓްމަންޓަށް ހާޒިރު ކުރެވިފައެވެ.
އޮވްސިއަނިކޯވާގެ ގާނޫނީ ވަކީލު ޑިމިޓްރީ ޒަޚްވާޓޯވް ސީއެންއެންއަށް މައުލޫމާތު ދެމުން ބުނެފައިވަނީ، އޭނާގެ މުވައްކިލު ޕޮލިސްޓޭޝަނަށް ހާޒިރުކުރެވިފައިވާ ކަމުގެ މައުލޫމާތު މީޑިއާތަކުން ލިބުނު ނަމަވެސް އޮވްސިއަނިކޯވާ ވީތަނެއް އޭނާއަށް މިހާތަނަށް އެގިފައި ނުވާކަމުގައެވެ.
ރަޝިއާގެ ސަރުކާރުގެ މީޑިއާ TASS އިން ރިޕޯޓު ކޮށްފައިވާ ގޮތުގައި އޮވްސިއަނިކޯވާ ޖިނާޢީ ދައުވާއާއި ކުރިމަތިލާން ޖެހުމަކީ ވަރަށް އެކަށީގެންވާ ކަމެކެވެ.
ރަޝިއާއިން ޔޫކުރެއިންގައި ކުރިޔަށް ގެންދާ ހަގުރާމައާއި ދެކޮޅު ހެދުމުގެ ގޮތުން ރަޝިއާގައި ދަނީ މުޒާހިރާތައް ކުރަމުންނެވެ. އެހެންނަމަވެސް މި މުޒާހިރާތައް ހުއްޓުމަށް ރަޝިއާގެ ސަރުކާރުންދަނީ ބާރުގެ ބޭނުން ކުރަމުންނެވެ. އަދި މިހާތަނަށް އެތައް ހާސް ބަޔަކު ވަނީ ހައްޔަރު ކޮށްފައެވެ.
