ރަޝިއާއިން އުދުވާނީ ހަމަލާތައް ދެމުންދާ ޔޫކުރެއިން ސިޓީއެއް ކަމުގައިވާ އިރުޕިންގައި ހިގަމުންދާ ހަނގުރާމާގައި ރަޝިއާއިން ދިން ހަމަލާތަކުގައި އެމެރިކާގެ ނޫސްވެރިއަކު މަރުވެއްޖެ ކަމުގައި ޔޫކުރެއިންގެ ވެރިރަށް ކީވްގެ ފުލުހުންނާއި ހަވާލާދީ ސޯޝަލް މީޑިއާގައި ބުނެފިއެވެ. ކީވްގެ ފުލުހުން ހާމަ ކޮށްފައިވާ ގޮތުގައި މި ހަމަލާތަކުގައި އެމެރިކާގެ އެހެން ނޫސްވެރިއަކަށް ވަނީ އަނިޔާ ވެފައެވެ.
އަދި މަރުވި ނޫސްވެރިއަކީ އެމެރިކާގެ ކޮން މީޑިއާއެއްގައި މަސައްކަތް ކުރާ ނޫސްވެރިއެއްކަން އަދި ޔަގީން ކުރެވިފައެއް ނުވެއެވެ.
ހަނގުރާމާގައި އެމެރިކާގެ ނޫސްވެރިއަކު މަރުވެއްޖެކަމަށް މީޑިއާތަކުން ރިޕޯޓު ކުރަމުން ދާއިރު، ރަޝިއާއިން ވަނީ ޔޫކުރެއިންގެ ސިޓީތަކަށް ދެމުންދާ ހަމަލާތައް ފުޅާ ކޮށްފައެވެ. މިގޮތުން މިއަދު ރަޝިއާއިން ވަނީ، ޔޫކުރެއިންގެ ހުޅަނގުގައި އޮންނަ މިލިޓަރީ އެއަރބޭސްއަކަށް ހަމަލާ ދީފައެވެ. މީޑިއާތަކުން ރިޕޯޓު ކޮށްފައިވާ ގޮތުގައި، މި އަސްކަރީ އެއަރބޭސްއަށް ރަޝިއާއިންވަނީ 9 މިސައިލް ހަމަލާ އަމާޒުކޮށްފައެވެ.
މި މިލިޓަރީ އެއަރބޭސްއަކީ، މިހާތަނަށް ގައުމުން ބޭރުގެ އަސްކަރީ އެހީތެރިކަން ޔޫކުރެއިންގެ ސިފައިންނަށް ފޯރުކޮށް ދިނުމުގައި ބޭނުން ކުރަމުންއައި ބޭސްއެކެވެ. އަދި މިއީ ޔޫކުރެއިންއާއި އިންވެގެން އޮންނަ ޕޮލޭންޑާއި 15 މޭލު ދުރުގައި އޮންނަ އެއަރ ބޭސްއެކެވެ.
މީޑިއާތަކުން ރިޕޯޓު ކޮށްފައިވާ ގޮތުގައި މިއީ މިއަދާ ހަމައަށް ޔޫކުރެއިންގެ ލިވިވް ރީޖަންގައި ރަޝިއާގެ ހަމަލާތައް އަމާޒުވެފައި ނުވާ ސަރައްދެކެވެ. އަދި މިއީ ހަގުރާމައި ސަލާމަތް ވުމަށްޓަކާއި، ހަގުރާމަ ހިގަމުންދާ ސަރަހައްދުތަކުން މީހުން ހިޖުރަ ކުރަމުންދިޔަ ސަރަހައްދެކެވެ.
ރަޝިއާއިން ޔޫކުރެއިންގެ އެކި ސަރަހައްދުތަކަށް ދެމުންދާ ހަމަލާތައް ވަރުގަދަކޮށް، އަދި އަންމުންނަށް އަމާޒުކޮށް ދެމުންދާ ހަމަލާތަކުގައި ގިނަ ބަޔަކު މަރުވަމުން ދާއިރު، ކުރިސްޓިއަކުންގެ އެންމެ އިސް ފާދިރީ ޕޯޕު ފްރާންސިސްވަނީ ހަގުރާމަ ހުއްޓާލުމަށް ރަޝިއާއަށް ގޮވާލައްވާފައެވެ.
