އިނގިރޭސިވިލާތުން ދަތިކުރުމުގެ ފިޔަވަޅު އަޅާފައިވާ، ރަޝިއާގެ މަހުޖަނު ރޯމަން އަބޮރަމޮވިޗްއަށް ފުޓުބޯޅަ ކުލަބް ޗެލްސީގެ ހިންގުމުގެ އެއްވެސް ދައުރެއް އަދާ ނުކުރެވޭގޮތަށް އިނގިރޭސި ޕްރިމިއަރ ލީގުން ނިންމައިފިއެވެ.
"އިނގިރޭސިވިލާތުން އަބޮރަމޮވިޗަށް ދަތިކުރުމުގެ ފިޔަވަޅު އެޅުމާއި ގުޅިގެން ޕްރިމިއަރ ލީގުގެ ބޯޑުންވަނީ ޗެލްސީ ފުޓުބޯޅަ ކުލަބުގެ ޑިރެކްޓަރުކަމުން ނިންމާފަ،" ޕްރިމިއަރ ލީގުން ނެރެފައިވާ ބަޔާނުގައި ބުނެފައިވެއެވެ.
"ޕްރިމިއަރ ލީގުގެ ބޯޑުގެ މި ނިންމުމާއި ގުޅިގެން، އިނގިރޭސި ސަރުކާރުން 31 މޭ 2022 އާއި ހަމައަށް ދޫކުށްފައިވާ ޚާއްސަ ލައިސްގެ ދަށުން މެޗްތައް ކުޅުމާއި އަދި ޓްރެއިނިންގތައް ފުރިހަމަ ކުރުމަށް އެއްވެސް ހުރަހެއް އެޅިގެން ނުދާނެ."
އަބޮރަމޮވިޗްއަށް ޗެލްސީ ދޫކޮށްލުމަށް މަޖުބުރު ކުރުވުމުގެ ގޮތުން މި ހަފްތާގެ ހުކުރުދުވަހު ޗެލްސީގެ ހުރިހާ ކްރެޑިޓް ކާރޑްތަކެއް ވަނީ ބޮލޮކް ކޮށްފައެވެ.
އަބުރަމޮވިޗް އަކީ އިނގިރޭސިވިލާތުގައި ގިނަ އަދަދެއްގެ އިންވެސްޓްމަންޓުތަކެއް ކޮށްފައިވާ، އަދި ރަޝިއާގެ ރައީސް ޕުޓިންއާއި ގާތް ގުޅުންތަކެއް ބާއްވަމުން އަންނަ ކަމަށް ޝައްކު ކުރެވޭ މަހުޖަނެކެވެ. އެހެންނަމަވެސް އޭނާ މިކަން ދޮގުކުރައްވައެވެ.
ރަޝިއާގެ ރައީސްއާއި ދެކޮޅަށް އިނގިރޭސިވިލާތުން އަޅަމުންދާ ދަތިކުރުމުގެ ފިޔަވަޅުތަކަކީ، ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން، ރަޝިއާގެ ރައީސް ލާޑިމިރް ޕުޓިން ދުނިޔެއިން އެކަހެރިކޮށް، އަދި ރަޝިއާގެ އުދުވަނީ ހަމަލާތައް ހުޓުވުމަށް ޕްރެޝަރު ކުރުމުގެ ގޮތުން އަޅަމުންދާ ފިޔަވަޅުތަކެކެވެ.
އިނގިރޭސިވިލާތުން ދަތިކުރުމުގެ ފިޔަވަޅު އަޅާ ފަރާތްތަކުގެ، އިނގިރޭސިވިލާތުގައި ހުންނަ ހުރިހާ އެސެޓެއް ފްރީޒް ކުރުމުގެ އިތުރުން، އެގައުމުގެ އެއްވެސް ފަރުދަކާ އެކީ ފައިސާގެ މުއާމަލާތްކުރުން މަނާވުމުގެ އިތުރުން އެގައުމަށް ދަތުރުކުރުންވެސް މަނާވެގެން ދާނެއެވެ.
އެމެރިކާއިން ޔޫކުރެއިންއަށް ހަމަލާ ދޭން ފެށިފަހުން އިނގިރޭސި ގާނޫނުހަދާ މަޖިލީހުން ފާސްކޮށްފައިވާ އިކޮނޮމިކް ކްރައިމް ބިލަށް އެގައުމުގައި މިހަފްތާގައި ހަފްތާގައި އަމަލްކުރަން ފެށުމަށް ވަނީ ހަމަޖެހިފައެވެ. މި ގާނޫނުގައި ވާގޮތުން، ވަކިވަކި ފަރުދުންގެ މައްޗަށް ދަތިކުރުމުގެ ފިޔަވަޅު އެޅުންވަނީ ވަރަށް ބޮޑުތަނުން ފަސޭހަ ކޮށްފައެވެ.
މަޝްހޫރު ފުޓުބޯޅަ ކުލަބު ޗެލްސީގެ ވެރިޔާ އަބުރަމޮވިޗްގެ މިލްކިއްޔާތު 9 ބިލިއަން ޑޮލަރަށް އަރައެވެ.
ރަޝިއާއިން ޔޫކުރެއިންއަށް އަރާ، އަދި އެގައުމާ ދެކޮޅަށް ދުނިޔޭގެ އެކި ގައުމުތަކުން ދަތިކުރުމުގެ ފިޔަވަޅު އަޅަން ފެށުމާއެކު، ޗެލްސީ ވިއްކާލަން ބޭނުންވާކަން އަބުރަމޮވިޗް ވަނީ ހާމަކޮށްފައެވެ. މިކަން އިއުލާން ކުރަމުން އޭނާ ވިދާޅުވެފައިވަނީ، މިއީ އެކުލަބާއި އެ ކުލަބަށް ތާއީދުރާ މީހުންނާއި، ކުލަބުގެ މުވައްޒިފުންނާއި އަދި އެކުލަބުގެ ސްޕޮންސަރުންނަށްވެސް އެންމެ ފައިދާހުރި ގޮތް ކަމުގައެވެ.
އިގިރޭސިވިލާތުން ނެރުނު ބަޔާނުގައި ބުނެފައިވަނީ، އަބުރަމޮވިޗްއާއި ދެކޮޅަށް ދަތިކުރުމުގެ ފިޔަވަޅު އެޅިނަމަވެސް، ފުޓުބޯޅަ ކުލަބު ޗެލްސީއަށް އެކުލަބުގެ މުވައްޒިފުންނަށާއި އަދި ކުޅުންތެރިންނަށް މުސާރަ ދިނުންފަދަ ފުޓު ބޯޅައާއި ގުޅުންހުރި ބައެއް ޓްރާންސެކްޝަންތައް ފުރިހަމަ ކުރުމަށް ޚާއްސައެއް ދޫކުރުމަށް ހަމަޖެހިފައި ވާކަމުގައެވެ.
އެހެންނަމަވެސް، އެކުލަބަށް އިތުރަށް ކުޅުންތެރިން ގަނެއް ވިއްކުމާއި، އަދި މިހާރު ވިއްކާފައިވާ މެޗްތަކުގެ އިތުރަށް ދެން ޓީކެޓް ވިއްކުން މި ދަތިކުރުމުގެ ފިޔަވަޅުތަކާއެކު މަނާކުރެވިގެން ދާނެއެވެ. އަދި މި ހަފްތާގެ ބުރާސްފަތި ދުވަހުގެ ކުރިން ޓިކެޓް ގަނެފައިވާ ފަރާތްތަކަށް ޗެލްސީގެ މެޗްތަކަށް ވަދެވޭނެކަމަށް އިނގިރޭސިވިލާތުގެ ބަޔާނުގައި ބުނަފައި ވެއެވެ.
