ރަޝިއާއިން ޔޫކުރެއިންއަށް އަރާ އެގައުމަށް ދެމުންދާ އުދުވާނީ ހަމަލާތަކާއި ގުޅިގެން އީޔޫން ރަޝިއާއި ދެކޮޅަށް އަޅަމުންދާ ދަތިކުރުމުގެ ފިވަޅުތަކުގެ ތެރޭގައި ރަޝިއާގެ އިތުރު 160 މީހަކު ޔޫރަޕިއަން އިއްތިހާދުން ހިމަނައިފިއެވެ.
މި ފިޔަވަޅުތަކާއެކު އީޔޫއިން ބުނެފައިވަނީ މި ފަރާތްތަކުގެ ހަރުމުދާ ހިފެއްހެއްޓުމުގެ އިތުރުން މިފާރާތްތަކަށް ޔޫރަޕަށް ދަތުުރު ކުރުންވެސް މަނާ ކުރެވިގެންދާނެ ކަމުގައައެވެ. އަދި އީޔޫއިން ބުނެފައިވަނީ، ރަޝިއާ ސިފައިން ޔޫކުރެއިންއަށް އެރުމަށް އެހީތެރިކަން ފޯރުކޮށްދިން ހުރިހާ ފަތާތްތަކުންވެސް އެކަމުގެ އަގު އަދާ ކުރަން ޖެހޭނެ ކަމުގައެވެ.
އީޔުއަށް ރަޝިއާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ފުޅާކޮށް، މި ލިސްޓުގައި މިހާރު ހިމަނާފައިވާ ފަރާތްތަކުގެ ތެރޭގައި ޕުޓިންއާއި ގުޅުން އޮންނަ މުއްސަދި މަހުޖަނުންނާއި ރަޝިއާގެ މަޝްހޫރު 14 ވިޔަފާރިވެރިއަކު އިތުރަށް ހިމަނާފައި ވެއެވެ. މި މީހުންނަކީ ރަޝިއާގެ އިގްތިސާދުގައި މުހިންމު ދައުރެއް އަދާކުރަމުންދާ ވިޔަފާރިވެރިންނާއި ކުންފުނިތަކެވެ. މީގެ ތެރޭގައި ދަނގަޑާއި މައުދަނުގެ ވިޔަފާރި ކުރާ ފަރާތްތަކާއި، ދަނޑުވެރިކަމާއި، ބޭސްވެރިކަމާއި، މުއާސަލާތީ ޚިދުމަތްތަކުގެ އިތުރުން ޑިޖިޓަލް އިންޑްސަޓްރިއާއި ގުޅުންހުރި ވިޔަފާރިވެރިންނާއި މަހުޖަނުން ހިމެނެއެވެ. އަދި މި ފަރާތްތަކުގެ އާއީލީ ފަރާތްތައްވެސް ހިމަނާފައި ވެއެވެ.
އަދި މީގެއިތުރުން، އެންމެ ފަހުން މި ލިސްޓުގައި ހިމަނާފައިވާ ފަރާތްތަކުގެ ތެރޭގައި، ރަޝިއާއިން އިރުމަތީ ޔޫކުރެއިންގެ މިނިވަންކަން ބަލައިގަތުމުގެ ގަރާރަށް ތާއީދުކުރެއްވި ރަޝިއަން ފެޑެރޭޝަން ކައުންސިލްގެ 146 މެމްބަރުންވެސް ހިމެނެއެވެ.
މިގޮތުން ޔޫރަޕިއަން އިއްތިހާދުން މިހާރު ދަތި ކުރުމުގެ ފިޔަވަޅު އަޅާފައިވާ، ރަޝިއާގެ ވަކިވަކި ފަރުދުންގެ އަދަދު 862އަށް އަރާއިރު، މި ފިޔަޅުތައް އަމާޒުކޮށްފައިވާ ރަޝިއާގެ ކުންފުނިތަކުގެ އަދަދު މިހާރު 53އަށް އަރައެވެ.
މިގޮތުން މި ފިޔަވަޅުތައް އަމާޒުވެގައިވާ ފަރާތްތަކުގެ ހަރުމުދާ ހިފެއްހެއްޓުމުގެ އިތުރުން، މިއިން އެއްވެސް ފަރާތަކަށް އީޔޫއަށް ދަތުރުކުންވެސް މަނާކޮށް، އީޔޫގެ އެއްވެސް ފަރުދަކަށްވެސް އަދި ކުންފުންޏަކަށްވެސް މިއިން އެއްވެސް ފަރުދަކާއި އަދި ކުންފުންޏަކާ އެކީވެސް އެއްވެސް ބާވަތެއްގެ ވިޔަފާރިއެއްކުރުންވެސް ވަނީ މަނާކުރެވިފައެވެ. އަދި މިއިން ފަރާތަކަށް އެއްވެސް ބާވަތެއްގެ ފަންޑެއް ފޯރުކޮށްދިނުންވެސް މި ފިޔަވަޅުތަކާއެކު ވަނީ މަނާ ކުރެވިފައެވެ.
ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން، ޕުޓިންގެ ގާތް ވިޔަފާރި ވެރިންނާއި އަދި އޭނާއާއި ގާތް ގުޅުންތައް ބާއްވަމުންގެންދާ ރަޝިއާގެ ސަރުކާރުގެ އިސްވެރިންނަށް ޔޫރަޕްގެ ގައުމުތަކުންދަނީ ދަތިކުރުމުގެ ފިޔަވަޅުތައް އަޅަމުންނެވެ. މިގޮތުން، މި ހަފްތާގައި އިނގިރޭސިވިލާތުންވަނީ، ދަތިކުރުމުގެ ފިޔަވަޅު އަޅަމުންދާ، ރަޝިއާގެ ރައީސް ލާޑިމިރު ޕުޓިންއާއި ގުޅުން އޮންނަ މަހުޖަނުންގެ ލިސްޓުގައި މަޝްހޫރު ފުޓުބޯޅަ ކުލަބު ޗެލްސީގެ އޯނަރު އަބުރަމޮވިޗް ހިމަނައިފިއެވެ.
އަދި މީގެ އިތުރުންވެސް ޕުޓިންއާއި ގުޅުން އޮންނަ ގިނަ އަދަދެއްގެ ރަޝިއާގެ މަހުޖަނުންގެ އެސެޓްތައް ފްރީޒްކޮށް، އަދި ރަޝިއާގެ ގިނަ އަދަދެއްގެ ބޭންކުތަކަށް އަމާޒުކޮށްވެސް ޔޫރަޕާއި ހުޅަނގުގެ ގައުމުތަކުންވަނީ އިގުތިސާދީގޮތުން ދަތިކުރުމުގެ ފިޔަވަޅު އަޅާފައެވެ.
ޔޫރަޕާއި ހުޅަނގުގެ ގައުމުތަކުގެ މި ފިޔަވަޅުތަކުގެ ބޭނުމަކީ ޕުޓިން ޔޫކުރެއިންއަށް ދެމުންދާ އުދުވާނީ ހަމަލާތައް ހުއްޓުވުމަކަށް ގެނައުމެވެ.
