ޔޫކުރެއިންގައި ހިގަމުންދާ ހަގުރާމައާއި ގުޅިގެން، ފޭސްބުކު އަދި އިންސްޓަގްރާމް ޕްލެޓްފީމު ބޭނުންކޮށްގެން، ނަފްރަތު އުފެދޭ ޒާތުގެ ބައެއް ވާހަކަތައް ދެއްކުން ހުއްދަ ކުރުމަށް މި ދެ ޕްލެޓްފޯމު ހިންގަމުންދާ މެޓަ ކުންފުނިން ނިންމައިފިއެވެ.
ފޭސްބުކުއާއި އިންސްޓަގްރާމް ހިންގަމުންދާ މެޓަ ކުންފުނިން ބުނެފައިވާ ގޮތުގައި، އެ ކުންފުނީގެ ބައެއް ގަވާއިދުތަކަށް ބަދަލު ގެނެސް، ދުނިޔޭގެ ގިނަ ގައުމުތަކެއްގައި، އެ ޕްލެޓްފޯމުތައް ބޭނުންކޮށް ދެކެވޭ ނަފްރަތު އުފެދޭ ޒާތުގެ ބައެއް ވާހަކަތަ ހުއްދަ ކޮށްފައިވަނީ މިހާރު ކުރިޔަށްދާ ޔޫކުރެއިން ހަނގުރާމައާއި ގުޅިގެން ކަމުގައެވެ.
މިގޮތުން މި ކުންފުނިން ބުނެފައިވާ ގޮތުގައި، ނަފްރަތު އުފެދޭ ބައެއް ވާހަކަތައް ކަމުގައިވާ، މިސާލަކަށް "ރަޝިއާއިގެ އިސްތިއުމާރީ ސިފައިންނަށް ހަލާކުހުރި (މަރު)" މިފަދަ އިބާރާތްތައް ބޭނުން ކުރަމުންދިއުން މިހާރުވަނީ ހުއްދަ ކުރެވިފައެވެ. މި ބާވަތުގެ ނަފްތަރު އުފެދޭ އިބާރާތްތަތަކީ މީގެކުރިން މި ޕްލެޓްފޯމުތަކުގައި ބޭނުންކުރުން މަނާ ކުރެވިފައިވާ އިބާރާތްތަކެވެ.
އެހެންނަމަވެސް މެޓަ ކުންފުނިން ބުނެފައިވަނީ، ފޭސްބުކު އަދި އިންސްޓަގްރާމްގައި، ރަޝިއާގެ ރައްޔިތުންނަށް އަމާޒުކޮށް ނަފްރަތު އުފެދޭ ވާހަކަތަކާއި ޝުއޫރު ފާޅުކުރުން ހުއްދަ ނުކުރާނެ ކަމުގައެވެ.
ރޮއިޓާސްއިން ރިޕޯޓު ކޮށްފައިވާ ގޮތުގައި، ރަޝިއާގެ ރައީސް ލާޑިމިރު ޕުޓިންއަށާއި، ބެލަރޫސްގެ ރައީސް އެލެގްޒެންޑަރ ލުކަޝެންކޯއަށް މަރުގެ އިންޒާރު ދިނުންވެސް ގިނަ ގައުމުތަކެއްގައި މި ޕްލެޓްފޯމުތަކުގައި ހުއްދަ ކުރެވިގެންދާނެއެވެ.
ރަޝިއާގެ ސިފައިންނާއި ދެކޮޅަށް ނަފްރަތު އުފެދޭ ވާހަކަތައް މި ޕްލެޓްފޯމްތަކުގައި ދެއްކުން ހުއްދަ ކުރެވިފައިވާ ގައުމުތަކުގެ ތެރޭގައި ހިމެނެނީ އަރުމީނިއާ، އާޒަރުބައިޖާން، އެސްޓޯނިއާ، ޖޯޖިއާ، ހަންގޭރީ، ލެޓްވިއާ، ލިތުއޭނިއާ، ޕޮލޭންޑު ރަޝިއާ، ސްލޮވާކިއާގެ އިތުރުން ޔޫކުރެއިންގައި ކަމަށް، މިކަމާއި ގުޅުގެން މެޓައިން ކޮށްފައިވާ މުއާމަލާތުތަކާއި ހަވާލާދީ މީޑިއާތަކުން ރިޕޯޓު ކޮށްފައި ވެއެވެ.
