ރަޝިއާއިން ޔޫކުރެއިންއަށް އަރާ އެގައުމަށް ދެމުންދާ އުދުވާނި ހަމަލާތަކާއި ގުޅިގެން، އިނގިރޭސިވިލާތުން ދަތިކުރުމުގެ ފިޔަވަޅު އަޅަމުންދާ، ރަޝިއާގެ ރައީސް ލާޑިމިރު ޕުޓިންއާއި ގުޅުން އޮންނަ މަހުޖަނުންގެ ލިސްޓުގައި ފުޓުބޯޅަ ކުލަބު ޗެލްސީގެ އޯނަރު ރޯމަން އަބުރަމޮވިޗް ހިމެނުމާއި ގުޅިގެން، އެކުލަބު ވިއްކާލުމަށް އޭނާ ކުރަމުން އައި މަސައްކަތްތައް ހުއްޓުމަކަށް އަތުވެއްޖެއެވެ.
ދުނިޔޭގެ އެންމެ މަޝްހޫރު އަދި ކާމިޔާބު ފުޅުބޯޅަ ކުލަބުތަކުގެ ތެރޭގައި ހިމެނޭ އެއް ކުލަބު ކަމުގައިވާ ޗެލްސީ ވިއްކާލުމުގެ ޝައުގުވެރިކަން ފާޅުކޮށް އަބުރަމޮވިޗް އެމަސައްކަތް ފަށާފައިވަނީ، ރަޝިއާއިން ޔޫކުރެއިން އަރާ އުދުވާނީ ހަމަލާ ދޭން ފެށުމާއެކު، އިނގިރޭސި ގާނޫނުހަދާ މަޖިލިހުގައި އޭނާއާއި ދެކޮޅަށް ދަތިކުރުމުގެ ފިޔަވަޅު އަޅާނޭކަމުގެ އިންޒާރު ދޭން ފެށުމާއެކުއެވެ.
މިއަދު އިނގިރޭސިވިލާތުން އާންމު ކުރި، ދަތިކުރުމުގެ ވިޔަވަޅު އަޅާފައިވާ މީހުންގެ ލިސްޓުގައި އަބުރަމޮވިޗްގެ ނަން ހިމަނާ އަދި ފްރީޒްކޮށްފައިވާ އޭނާގެ އެސެޓްތަކުގެ ތެރޭގައި އެ ކުލަބުވެސް ހިމެނުމާއި ގުޅިގެން މި ކުލަބަށް އެކުލަބުން ކުރިޔަށް ކުޅެން ހަމަޖެހިފައިވާ މެޗްތަކުގެ ޓިކެޓް ވިއްކުންވެސް ވަނީ މަނާ ކުރެވިފައެވެ.
އިނގިރޭސިވިލާތުން ހާމަ ކޮށްފައިވާ ގޮތުގައި، ފުޓުބޯޅަ ކުލަބު ޗެލްސީ މިލިސްޓުގައި ހިމަނާފައިވަނީ، މި ކުލަބުގެ ބޭނުން ކޮށްގެން އަބުރަމޮވިޗް އާމްދަނީ ހޯދަމުންދާ ދިއުން ހުއްޓުމަކަށް ގެނައުމުގެ ގޮތުން ކަމުގައެވެ.
އެހެންނަމަވެސް އިނގިރޭސި ސަރުކާރުންވަނީ، މި ކުލަބަށް އެކުލަބުގެ މުވައްޒިފުންނަށާއި އަދި ކުޅުންތެރިންނަށް މުސާރަ ދިނުންފަދަ ފުޓު ބޯޅައާއި ގުޅުންހުރި ބައެއް ޓްރާންސެކްޝަންތައް ފުރިހަމަ ކުރުމަށް ޚާއްސައެއް ލައިސަންސެއް ދޫކޮށްފައެވެ. އަދި މީގެތެރޭގައި، މިކުލަބުގެ މެޗްތަކަށް މިހާތަނަށް ޓިކެޓް ގަނެފައިވާ ފަރާތްތަކަށް އެ މެޗްތަކަށް ވަނުމުގެ ހުއްދަވެސް ހިމަނާފައި ވެއެވެ.
މިގޮތުން ސީޒަން ޓިކެޓްތައް ގަނެފައިވާ، ކުލަބުގެ ސަޕޯޓަރުންނަށް އެމެޗްތަކަށް ވަނުމުގެ ހުއްދަ ދީފައި ވިނަމަވެސް، ކުރިޔަށް އޮތް އެއްވެސް މެޗަކަށް މިކުލަބަށް، މި ދަތިކުރުމުގެ ފިޔަވަޅުތަކާއެކު ޓިކެޓް ވިއްކުންވަނީ މަނާ ކުރެވިފައެވެ. އަދި އަބުރަމޮވިޗް މި ލިސްޓުގައި ހިމަނާފައި އޮތްހާހިދަކު، ޗެލްސީއަށް ކުޅުންތެރިން ގަނެވިއްކުންވެސް ވަނީ މަނާ ކުރެވިފައެވެ.
އަދި ކުލަބުން ހިންގަމުންދާ މާރޗެންޓައިޒް ޝޮޕްތައް (ކުލަބުގެ އިސްތިހާރުތައް ކުރުމަށާއި ޕްރޮޑަކްޓުތައް ވިއްކުމަށް ޚާއްސަ ކުރެވިފައިވާ ފިހާރަތައް)ވެސް ބަންދުކުރަން ޖެހެއެވެ.
އިނގިރޭސި ސަރުކާރުން ބުނެފައިވާ ގޮތުގައި ފުޓުބޯޅަ ކުލަބު ޗެލްސީގެ ވިޔަފާރިތަކަށް އިތުރު ފުރުސަތު ދިނުމުގެ ގޮތުން ދޫކުރެވިފައިވާ ޚާއްސަ ލައިސަންސްގެ ދަށުން ދެވިފައިވާ ފުރުސަތުތައް އިތުރަށް ފުޅާ ކުރުމާއި ގުޅޭގޮތުން މަޝްވަރާ ކުރުމަށް އިނގިރޭސި ސަރުކާރު އޮތީ ތައްޔާރަށެވެ. އެހެންނަމަވެސް މި ފުރުސަތު ލިބިގެން ދާނީ، ޕުޓިންއާއި ގާތް ގުޅުމެއް ބާއްވާކަމަށް ބެލެވޭ އަދި ރަޝިއާގެ އެންމެ މުއްސަނދި މަހުޖަނުންގެ ތެރޭގައި ހިމެނޭ އަބުރަމޮވިޗްއަށް މިއިން އެއްވެސް މުޢާމަލާތެއްގެ ފައިސާއެއް ނުދާނެކަން ޔަގީން ކުރެވުމުން ކަމުގައިވެސް އިނގިރޭސި ސަރުކާރުން ވަނީ ބުނެފައެވެ.
އަބުރަމޮވިޗް މީގެ ކުރިން ބުނެފައިވަނީ، ޗެލްސީ ވިއްކާލައިގެން ލިބޭ ހުރިހާ ފައިދާއެެއްވެސް އޭނާ ހަދިޔާ ކުރާނީ ޔޫކުރެއިން ހަގުރާމައިގެ ޝިކާރައަކަށް ވެފައިވާ ފަރާތްތަކަށް އެހީތެރިކަން ފޯރުކޮށް ދިނުމަށް ކަމުގައެވެ.
މި ހަފްތާގެ ބުދަ ދުވަހާއި ހަމައަށް، ޗެލްސީ ގަތުމަށް 20 ފަރާތަކުންވަނީ ޝައުގުވެރިކަން ފާޅުކޮށްފައެވެ. މީގެ ތެރޭގައި އިނގިރޭސިވިލާތުގެ ވިޔަފާރިވެރިއެއް ކަމުގައިވާ ނިކް ކޭންޑީވެސް ހިމެނެއެވެ.
އިނގިރޭސި ކަލްޗުރަލް ސެކެޓްރީ ނަންޑިން ޑޮރިސް ވިދާޅުވެފައިވަނީ، ފުޓު ބޯޅަ ކުލަބު ޗެލްސީ ހިމާޔަތް ކުރުމަށް އެގައުމުގެ ސަރުކާރުން ބޭނުން ވެއެވެ. "ފުޓު ބޯޅަ ކުލަބު ތަކަކީ ސަގާފީ ތަރިކަތަކެއް، އަދި އަހަމެންގެ މުޖުތަމަޢުތަކުގެ އެންމެ މުހިންމު އަސާސްތައް،" އޭނާ ޓުވީޓު ކުރައްވާފައި ވެއެވެ.
"އަހަރެންނަށް އެގޭ، މީގެ ސަބަބުން ހާސްކަމާއި ނުތަނަވަސްކަން އަންނާނެކަން، އެހެންނަަމަވެސް ސަރުކާރުން ލީގުތަކާއި، ކުލަބުތަކާއި ވާހަކަ ދައްކަައިގެން، ކޮންމެހެން އަޅަންޖެހޭ ދަތިކުރުމުގެ ފިޔަވަޅުތަކާއެކު، ފުޓުބޯޅަ ކުރިޔަށް ދާނެކަން ޔަގީން ކުރާނެ. އަހަރެމެންގެ އެންމެ ބޮޑު މަސްލަހަތަކީ ޕުޓިންއާއި ގުޅުންހުރި ފަރާތްތައް ޒިންމަދާރު ކުރުވުން."
