އިނގިރޭސިވިލާތުން ދަތިކުރުމުގެ ފިޔަވަޅު އަޅަމުންދާ، ރަޝިއާގެ ރައީސް ލާޑިމިރު ޕުޓިންއާއި ގުޅުން އޮންނަ މަހުޖަނުންގެ ލިސްޓުގައި ފުޓުބޯޅަ ކުލަބު ޗެލްސީގެ އޯނަރު އަބުރަމޮވިޗް ހިމަނައިފިއެވެ.
އަބުރަމޮވިޗް އަކީ އިނގިރޭސިވިލާތުގައި ގިނަ އަދަދެއްގެ އިންވެސްޓްމަންޓުތަކެއް ކޮށްފައިވާ، އަދި ރަޝިއާގެ ރައީސް ޕުޓިންއާއި ގާތް ގުޅުންތަކެއް ބާއްވަމުން އަންނަ ކަމަށް ޝައްކު ކުރެވޭ މަހުޖަނެކެވެ. އެހެންނަމަވެސް އޭނާ މިކަން ދޮގުކުރައްވައެވެ.
ރަޝިއާގެ ރައީސްއާއި ދެކޮޅަށް އިނގިރޭސިވިލާތުން އަޅަމުންދާ ދަތިކުރުމުގެ ފިޔަވަޅުތަކަކީ، ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކާއި ގުޅިގެން، ރަޝިއާގެ ރައީސް ލާޑިމިރް ޕުޓިން ދުނިޔެއިން އެކަހެރިކޮށް، އަދި ރަޝިއާގެ އުދުވަނީ ހަމަލާތައް ހުޓުވުމަށް ޕްރެޝަރު ކުރުމުގެ ގޮތުން އަޅަމުންދާ ފިޔަވަޅުތަކެކެވެ.
އިނގިރޭސި ސަރުކާރުން ބުރާސްފަތި ދުވަހު އާންމު ކޮށްފައިވާ ނޫސް ބަޔާނެއްގައި ބުނެފައިވަނީ، ރަޝިއާގެ ރައީސްއާއި ގުޅުން ބާއްވަމުންދާ އިތުރު 7 މަހުޖަނަކު، އަބުރަމޮވިޗްވެސް ހިމެނޭގޮތުން މިލިސްޓުގައި އިތުރަށް ހިމަނާފައި ވާކަމުގައެވެ.
އިނގިރޭސިވިލާތުން ދަތިކުރުމުގެ ފިޔަވަޅު އަޅާ ފަރާތްތަކުގެ، އިނގިރޭސިވިލާތުގައި ހުންނަ ހުރިހާ އެސެޓެއް ފްރީޒް ކުރުމުގެ އިތުރުން، އެގައުމުގެ އެއްވެސް ފަރުދަކާ އެކީ ފައިސާގެ މުއާމަލާތްކުރުން މަނާވުމުގެ އިތުރުން އެގައުމަށް ދަތުރުކުރުންވެސް މަނާވެގެން ދާނެއެވެ.
އިނގިރޭސިވިލާތުން މިއަދު އާންމު ކުރި ލިސްޓުގައި، އަބުރަމޮވިޗްގެ ކުރީގެ ވިޔަފާރި ޕާޓްނަރު އޮލެގް ޑެރިޕަސްކާވެސް ހިމަނާފައި ވެއެވެ. އޭނާއަކީ ރަޝިއާގެ އެންމެ ބޮޑު އިންޑަސްޓްރިއަލް ގްރޫޕް ކަމުގައިވާ ބޭސިލް އެލެމްޓްގެ ވެރިޔާއެވެ. އަދި މީގެ އިތުރުން މިއަދު އާންމު ކުރި ލިސްޓުގައި ޕުޓިންގެ އެންމެ އަރިސް އެއް ބޭފުޅެއްގެ ގޮތުގައި ފާހަގަވެގެން ގޮސްފައިވާ އިގޯރ ސެޝިންގެ އިތުރުން ޕުޓިންގެ ގާތް އިތުރު 4 މީހަކުވެސް ހިމަނާފައިވެއެވެ.
އެމެރިކާއިން ޔޫކުރެއިންއަށް ހަމަލާ ދޭން ފެށިފަހުން އިނގިރޭސި ގާނޫނުހަދާ މަޖިލީހުން ފާސްކޮށްފައިވާ އިކޮނޮމިކް ކްރައިމް ބިލަށް އެގައުމުގައި އަންނަ ހަފްތާގައި އަމަލްކުރަން ފެށުމަށް ވަނީ ހަމަޖެހިފައެވެ. މި ގާނޫނުގައި ވާގޮތުން، ވަކިވަކި ފަރުދުންގެ މައްޗަށް ދަތިކުރުމުގެ ފިޔަވަޅު އެޅުންވަނީ ވަރަށް ބޮޑުތަނުން ފަސޭހަ ކޮށްފައެވެ.
މަޝްހޫރު ފުޓުބޯޅަ ކުލަބު ޗެލްސީގެ ވެރިޔާ އަބުރަމޮވިޗްގެ މިލްކިއްޔާތު 9 ބިލިއަން ޑޮލަރަށް އަރައެވެ.
ރަޝިއާއިން ޔޫކުރެއިންއަށް އަރާ، އަދި އެގައުމާ ދެކޮޅަށް ދުނިޔޭގެ އެކި ގައުމުތަކުން ދަތިކުރުމުގެ ފިޔަވަޅު އަޅަން ފެށުމާއެކު، ޗެލްސީ ވިއްކާލަން ބޭނުންވާކަން އަބުރަމޮވިޗް ވަނީ ހާމަކޮށްފައެވެ. މިކަން އިއުލާން ކުރަމުން އޭނާ ވިދާޅުވެފައިވަނީ، މިއީ އެކުލަބާއި އެ ކުލަބަށް ތާއީދުރާ މީހުންނާއި، ކުލަބުގެ މުވައްޒިފުންނާއި އަދި އެކުލަބުގެ ސްޕޮންސަރުންނަށްވެސް އެންމެ ފައިދާހުރި ގޮތް ކަމުގައެވެ.
އިގިރޭސިވިލާތުން ނެރުނު ބަޔާނުގައި ބުނެފައިވަނީ، އަބުރަމޮވިޗްއާއި ދެކޮޅަށް ދަތިކުރުމުގެ ފިޔަވަޅު އެޅިނަމަވެސް، ފުޓުބޯޅަ ކުލަބު ޗެލްސީއަށް އެކުލަބުގެ މުވައްޒިފުންނަށާއި އަދި ކުޅުންތެރިންނަށް މުސާރަ ދިނުންފަދަ ފުޓު ބޯޅައާއި ގުޅުންހުރި ބައެއް ޓްރާންސެކްޝަންތައް ފުރިހަމަ ކުރުމަށް ޚާއްސައެއް ދޫކުރުމަށް ހަމަޖެހިފައި ވާކަމުގައެވެ.
އެހެންނަމަވެސް، އެކުލަބަށް އިތުރަށް ކުޅުންތެރިން ގަނެއް ވިއްކުމާއި، އަދި މިހާރު ވިއްކާފައިވާ މެޗްތަކުގެ އިތުރަށް ދެން ޓީކެޓް ވިއްކުން މި ދަތިކުރުމުގެ ފިޔަވަޅުތަކާއެކު މަނާކުރެވިގެން ދާނެއެވެ. އަދި މި ހަފްތާގެ ބުރާސްފަތި ދުވަހުގެ ކުރިން ޓިކެޓް ގަނެފައިވާ ފަރާތްތަކަށް ޗެލްސީގެ މެޗްތަކަށް ވަދެވޭނެކަމަށް އިނގިރޭސިވިލާތުގެ ބަޔާނުގައި ބުނަފައި ވެއެވެ.
