ދެމެހެއްޓެނިވި މާދަމާއެއް ބިނާކުރުމަށް، އަންހެނުންގެ ފުރިހަމަ ހިއްސާ އޮންނަންޖެހޭ ކަމުގައި ޓްރާސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
މިއަދު ފާހަގަ ކުރަމުންދާ ބައިނަލް އަގުވާމީ އަންހެނުންގެ ދުވަހުގެ ތަހުނިޔާ ދިވެހި ރާއްޖޭގެ ހުރިހާ ކަނބަލުންނަށް ފޮނުވައި މިނިސްޓަރ ނަހުލާ ވިދާޅުވީ ޤައުމު ބިނާކޮށް އާރާސް ކުރުމުގައި މިންތީގެ ހަމަހަމަކަން ގާއިމް ކުރަންޖެހޭކަމަށެވެ. އަދި ދެމެހެއްޓެނިވި މާދަމައެއް ބިނާކުރެވޭނީ އަންހެނުންގެ ފުރިހަމަ ހިއްސާ އޮވެގެން ކަމަށް މިނިސްޓަރ ނަހުލާ ވިދާޅުވިއެވެ.
ބައިނަލް އަޤްވާމީ އަންހެނުންގެ ދުވަހުގެ މުނާސަބަތުގައި ދިވެހިރާއްޖޭގެ ހުރިހާ ކަނބަލުންނަށް ދުވަހުގެ ތަހްނިޔާ އަރިސްކުރަން. ދެމެހެއްޓެނިވި މާދަމާއެއް ބިނާކުރުމަށްޓަކައި އަންހެނުންގެ ފުރިހަމަ ހިއްސާ އޮންނަންޖެހޭ، ނަހުލާ ވިދާޅުވިއެވެ. މިންތީގެ ހަމަހަމަކަން ޤާއިމްކޮށް އަންހެނުން ބާރުވެރި ބަޔަކަށް ހެދުމަށްޓަކައި އަންހެނުންގެ ފުރިހަމަ ބައިވެރިވުމަކީ އަންހެނުންގެ ތަރައްޤީގެ ކުރިމަގު.
– ނަހުލާ ވިދާޅުވިއެވެ.
ބައިނަލްއަޤްވާމީ އަންހެނުންގެ ދުވަހެއް ފާހަގަކުރުމުގެ މަޤްސަދަކީ، އަންހެނުންނަށް ލިބިފައިވާ ހައްޤުތައް ކަށަވަރުކުރުމަށާއި އަންހެނުންގެ ޙާލަތު ރަނގަޅު ކުރުމަށް އެކި ދާއިރާތަކުން ހޯދާފައިވާ ކާމިޔާބީތައް ފާހަގަކޮށް، ދިވެހިރާއްޖޭގައި އަންހެނުން ބާރުވެރި ކުރުމަށާއި މިންތީގެ ހަމަހަމަކަން ޤާއިމުކުރުމަށް އެކި ފަރާތްތަކުން ކުރަމުންދާ މަސައްކަތްތަކުގެ އަގުވަޒަންކުރުމެވެ. މި ދުވަސް ފާހަގަކުރުމުގެ ގޮތުން ޔޫ.އެން.ވިމެން އިން މިއަހަރަށް ކަނޑައަޅާފައިވާ ޝިޢާރަކީ
“Gender equality today, for a sustainable tomorrow” ނުވަތަ "މިއަދު މިންތީގެ ހަމަހަމަކަން – ދެމެހެއްޓެނިވި މާދަމާއަކަށް" މިއެވެ.
މިއަހަރުގެ އަންހެނުންގެ ދުވަހާ ގުޅިގެން ހިންގާ ޙަރަކާތްތައް ހިންގުމަށް ހަމަޖެހިފައިވަނީ އދ.އިން ކުރިއަށް ގެންދާ "ޖެނެރޭޝަން އީކްއަލިޓީ" ނުވަތަ ހަމަހަމަ ޖީލު، ކެމްޕޭނާ ގުޅުވައިގެންކަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ވިދާޅުވެއެވެ.
މި ކެމްޕޭނަކީ ހުރިހާ ދާއިރާއެއްގައިވެސް ކަންކަން ނިންމުމުގައި އަންހެނުންނަށް ލިބިފައިވާ ޙައްޤު ހޯދައިދިނުމާއި، މަސައްކަތްތަކުގައި ހަމަހަމަ އުޖޫރަ ލިބިދިނުމާއި، އެއްވެސް އުޖޫރައަކާ ނުލައި ގޭތެރޭގައި ކުރާ މަސައްކަތްތަކުގައި ދެޖިންސުގެ ހަމަހަމަ ބައިވެރިވުން އޮތުމާއެކު، އަންހެނުންގެ ބޭނުންތަކަށް އިޖާބަދޭ ސިއްޙީ ޚިދުމަތްތައް ޤާއިމުކުރުމަށާއި އަންހެނުންނާއި އަންހެން ކުދިންނަށް ކުރާ އެންމެހައި އަނިޔާ ހުއްޓުވުމަށް ބާރުއަޅާ ބައިނަލްއަޤްވާމީ ކެމްޕޭނެކެވެ.
