ޕީއޯއެސް މެދުވެރިކޮށް މަހަކު 30،000 ރުފިޔާގެ ވިޔަފާރިވާ ވިޔަފާރިތަކަށް ބީއެމްލެލްގެ ރީޓެއިލަރސް ލޯނު ލިބޭގޮތަށް އެ ބެންކުން ލުއި ފަސޭހަތަކެއް ގެނެސްފިއެވެ.
ގައުމީ ބެންކުން ބުނީ މިއީ ކޯވިޑް-19 އާ ގުޅިގެން ވިޔާފާރިތަކަށް ދިމާވާ ދަތިތަކަށް ލުޔެއް ހޯދައިދިނުމަށް އެ ބެންކުން ގެނައި ހެޔޮ ބަދަލުތަކެއް ކަމަށެވެ. ބީއެމްލެލްގެ ރީޓެއިލަރސް ލޯނަކީ ވިޔަފާރިތައް ފުޅާކޮށް ވިޔަފާރި ހިންގުމަށް ބޭނުންވާ ފައިސާ އާއި މާލީ އެހީތެރިކަން ފޯރުކޮށްދިނުމަށް ދޫކުރާ ލޯނެކެވެ. ކުރިން މި ލޯނު ދޫކުރީ ޕީއޯއެސް މެދުވެރިކޮށް މަހެއްގެ މައްޗަށް 50،000 ރުފިޔާ ގެ ވިޔަފާރިވާ ވިޔަފާރިތަކަށް ކަމަށް ބެންކުން ބުނެއެވެ.
ވިޔަފާރިތަކުން ޕީއޯއެސް މެދުވެރިކޮށް ހިންގާ މުއާމަލާތްތަކުގެ ޖުމްލަ ވިޔަފާރީގެ ތިން ގުނައާ ހަމަޔަށް ބީއެމްއެލުން ރީޓެއިލަރސް ލޯނު ދޫކުރެ އެވެ. ލޯނުގެ އިތުރުން އޯވަރޑްރާފްޓްގެ ގޮތުގައިވެސް މި ލޯނު ދޫކުރާނެކަމަށް ބީއެމްއެލުން ބުނެއެވެ.
މި ބަދަލާއިއެކު ރާއްޖޭގެ ކޮންމެ ތަނެއްގައި ހިންގާ ވިޔަފާރިއަކަށް ވެސް މި ލޯނަށް އެދެވޭނެ ކަމަށް ބީއެމްއެލުން ބުނެއެވެ. ނަމަވެސް ލޯނަށް އެދޭ ވިޔަފާރިތަކުން ފާއިތުވި 12 މަސްދުވަހު މެދުކެނޑުމެއް ނެތި ޕީއޯއެސް އިން ވިޔަފާރީގެ މުއާމަލާތް ހިންގާފައި ވާންޖެހޭނެއެވެ. މި ބާރަމަސް ބެލުމުގައި، ކޯވިޑް-19ގެ ސަބަބުން ވިޔަފާރިތަކަށް އެންމެ ބޮޑަށް އަސަރުކުރި، މިދިޔަ އޭޕްރީލް މަހުން ފެށިގެން ޖޫން މަހުގެ ނިޔަލަށް ހުރި ދުވަސްތައް ނުބަލާނެ ކަމަށް ބެންކުން ބުނެއެވެ.
ބީއެމްއެލްގެ ޑައިރެކްޓާ އޮފް ރީޓެއިލް އަދި އެސްއެމްއީ ބޭންކިން މޫސާ ނިމާލް ވިދާޅުވީ ކޮވިޑް-19ގެ ސަބަބުން ވިޔަފާރިތަކަށް ވަމުންދާ ގެއްލުންތަކުން އަރައިގަތުމަށް އެހީވުމަށް ގިނަ ފިޔަވަޅުތައް ބެންކުން އަޅާފައިވާ ކަމަށެވެ.
"މި ދަނޑިވަޅުގައި ރީޓެއިލަރސް ލޯނާއި ބީއެމްއެލް އިސްލާމިކް ރީޓެއިލަރސް ފައިނޭންސިންގ އަށް މިފަދަ ބަދަލުތަކެއް ގެނެވޭ ކަމީ އަޅުގަނޑުމެންނަށް ލިބޭ އުފަލެއް. މިފަ ދަތި އުނދަގޫ ހާލަތެއްގައިވެސް އަޅުގަނޑުމެންގެ އަމާޒަކީ ހަރުދަނާ ގޮތެއްގައި ވިޔަފާރިތަކަށް އެހީތެރިކަން ފޯރުކޮށްދެމުންދިޔުން،"
– މޫސާ ނިމާލް
ބީއެމްއެލް އިސްލާމިކް ރީޓެއިލަރސް ފައިނޭންސިން އަށް ވެސް މި ބަދަލުތައް ގެނެސްފައި ވާ ކަމަށް ބެންކުން ބުނެއެވެ.
ކޮމެންޓު ފޮނުވާ