ޔޫކުރެއިންއަށް ރަޝިއާއިން އުދުވާނީ ހަމަލާ ދެމުން ދިއުމާ ގުޅިގެންނާއި އަދި މި ހަމަލާތަކަށް ބެލަރޫސްއިން އެހީތެރިކަން ފޯރު ކޮށްދީފައި ވާތީ، ރަޝިއާއި ބެލަރޫސްގެ އިތުރު 32 އޮފިޝަލެއްގެ އެސެޓް ފްރީޒް ކޮށްފައި ވާކަން ޖަޕާންއިން ހާމަ ކޮށްފިއެވެ.
ޖަޕާންއިން ބުނެފައިވާ ގޮތުގައި ރަޝިއާގެ ތެޔޮ އުފައްދާ ކާރުޚާނާތަކަށް ބޭނުންވާ ސާމާނު ރަޝިއާއަށް އެކްސްޕޯޓު ކުރުންވެސް އެގައުމުން މިހާރުވަނީ ހުއްޓުމަކަށް ގެނެސްފައެވެ. އަދި އޭގެ އިތުރުން، ބެލަރޫސްގެ އަސްކަރިއްޔާއަށް ބޭނުން ކުރެވިދާނެފަދަ އެއްވެސް އެއްޗެއް އެގައުމަށް އެކްސްޕޯޓު ކުުރުންވެސް މިހާރު މަނާ ކޮށްފައިވާކަންވެސް ޖަޕާނުންވަނީ ހާމަ ކޮށްފަައެވެ.
ރަޝިއާގެ އޮފިޝަލުންނާ ދެކޮޅަށް ޖަޕާނުން އެންމެ ފަހުން މިއެޅި ފިޔަވަޅުތަކުގެ ތެރޭގައި ރަޝިއާގެ 20 މީހަކު ހިމަނާފައި ވެއެވެ. މީގެ ތެރޭގައި ޕުޓިންގެ ސަރުކާރުގެ ޑެޕިއުޓީ ޗީފް އޮފް ސްޓާފް އާއި، ރަޝިއާގެ ގާނޫނުހަދާ މަޖިލިހުގެ ޑެޕިއުޓީ ޗެއަރމަންއާއި ޗެޗެން ރިޕަބްލިކްގެ އެންމެ އިސް ވެރިޔާއާއި، ރަޝިއާގެ ސަރުކާރާއި ގާތް ގުޅުންތައް ބާއްވާ ކުންފުނިތަކުގެ އިސްވެރިންވެސް ހިމެނެއެވެ. މީގެ ތެރޭގައި ރަޝިއާގެ ވޮލްގާ ގުރޫޕާއި، ޓްރާންސްނެފްޓުގެ އިތުރުން ވަގްނާރ ކުންފުނިވެސް ހިމަނާފައި ވެއެވެ.
މި ދަތި ކުރުމުގެ ފިޔަވަޅުތަކުގެ ތެރޭގައި ބެލަރޫސްގެ ސަރުކާރާއި އަމިއްލަ ވިޔަފާރި ވެރިންގެ ތެރޭގައި ހިމެނޭ 12 މީހަކުވެސް ހިމަނާފައި ވެއެވެ. އަދި މީގެ އިތުރުން ރަޝިއާއާއި ބެލަރޫސްގެ 12 ޖަމިއްޔާއެއްވެސް ހިމަނާފައި ވެއެވެ.
ޖަޕާން ސަރުކާރުން ހާމަކޮށްފައިވާ ގޮތުން، އެންމެ ފަހުން އާންމުކުރި ލިސްޓުގައި ހިމެނޭ އެންވެސް ފަރުދަކާވެސް އަދި ކުންފުންޏަކާވެސް ފައިސާގެ އެއްވެސް މުއާމަލާތެއް ކުރާނަމަ ޖަޕާން ސަރުކާރުގެ ހުއްދަ ހޯދަން ޖެހޭނެއެވެ.
ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކާއި ގުޅިގެން ދުނިޔޭގެ އެތައް ގައުމަކުން މިހާރުވަނީ ރަޝިއާއާއި ދެކޮޅަށް އިގްތިސާދީގޮތުން ދަތިކުރުމުގެ ފިޔަވަޅު އަޅާފައެވެ. އަދި ޔޫކުރެއިންއާއި އިންވެގެން އޮތް ބެލަރޫސްއިން ރަޝިއާއަށް އެހީތެރި ވެދީފައި ވާތީ، މި ފިޔަވަޅުތަކުގެ ތެރޭގައި ގިނަ ގައުމުތަކުން ބެލަރޫސްވެސް ހިމަނާފައި ވެއެވެ.
