ދުނިޔޭގެ އެންމެ ބޮޑު 4 އެކައުންޓިން ފާރމްގެ ތެރޭގައި ހިމެނޭ ދެ އެކައުންޓިންގ ފާރމް ކަމުގައިވާ ކޭޕީއެމްޖީއާއި ޕްރައިސްވޯޓަރހައުސްކޫޕަރސް އިން ރަޝިއާގައި މަސައްކަތް ކުރުން ހުއްޓާލައިފިއެވެ.
މި ދެ އަކައުންޓިންގ ފާރމުން ބުނެފައިވާ ގޮތުގައި ރަޝިއާއިން ޔޫކުރެއިންއަށް އަރާ އެގައުމުގައި ހިންގަމުންދާ އުދުވާންއާއި ގުޅިގެން، ދެ އެކައުންޓިން ފާރމުންވެސް، ރަޝިއާގައި ހިންގާ އެއްވެސް ކުންފުންޏަކާއެކު މިހާރު މަސައްކަތް ނުކުރަން ނިންމާފައި ވާކަމުގައެވެ. އަދި ކޭޕީއެމްޖީން ބުނެފައިވާ ގޮތުގައި އެ ފާރމުން ބެލަރޫސްގައިވެސް މަސަތްކަތް ނުކުރަން މިހާރުވަނީ ނިންމާފައެވެ.
ކޭޕީއެމްޖީ އިންޓަރނޭޝަނަލްއިން ނެރެފައިވާ ބަޔާނުގައި ބުނެފައިވަނީ އެ ކުންފުނީގެ ރަޝިއާއާއި ބެލަރޫސްގެ ފާރމްތައް އެކުންފުންޏާއި ވަކިވެގެން ދިއުމަކީ އެކުންފުނިން ހިތާމަކުރާ ކަމެއް ކަމުގައެވެ. މި ދެގައުމުގައި ކޭޕީއެމްޖީގެ 4،500 މުވައްޒިފުން މައްކަތް ކުރެއެވެ.
ޕްރައިސްވޯޓަރހައުސްކޫޕަރސްއިން ބުނެފައިވަނީ އެ ކުންފުނީގެ ޕީޑަބްލިއު ރަޝިއާ ފާރމުގައި 3،700 މުވައްޒިފުން މަސައްކަތް ކުރަމުންދާ ކަމަށާއި، އަދި ރަޝިއާގައި ކުރާ މަސައްކަތްތައް ހުއްޓާލުމުގެ މަަސައްކަތް މިހާރު ފަށާފައިވާ ކަމުގައެވެ.
ދުނިޔޭގެ އެންމެ ބޮޑެތި އެކައުންޓިންގ ފާރމްތަކުން ރަޝިއާގައި މަސައްކަތް ކުރުން ހުއްޓާލާފައި ވާއިރު، އެންޓަރޓެއިންމަންޓް ދާއިރާގައި މަޝްހޫރު ދެ ޕްލެޓްފޯމް ކަމުގައިވާ މަޝްހޫރު ނެޓްފްލިކްސްއާއި އަދި ޓިކްޓޮކްއިންވެސް ވަނީ ރަޝިއާގަ ސްޓްރީމްކުރުން ހުއްޓަމަކަށް ގެނައުމަށް ނިންމާފައި ވާކަން އިއުލާން ކޮށްފައެވެ.
ރަޝިއާއިން ފާއިތުވެދިޔަ ފެބްރުއަރީމަހުގެ 24ވަނަ ދުވަހު ޔޫކުރެއިންއަށް އަރާ ދޭންފެށި އުދުވާނީ ހަމަލާތަކާއި ގުޅިގެން ދުނިޔޭގެ ބޮޑެތި މަޝްހޫރު އެތައް ވިފަރާތިތަކާއި ކުންފުނިތަކުން ދަނީ ރަޝިއާގައި ހިންގަމުން އައިސްފައިވާ ވިޔަފާރިތަކާއި އެހެނިހެން އޮޕަރޭޝަންތައްވެސް ހުއްޓުމަކަށް ގެންނަމުންނެވެ.
ދުނިޔޭގެ މިވަގުތު އެންމެ ބޮޑު އެއް ސްޓްރީމިން ޕްލެޓްފޯމްކަމުގައިވާ ނެޓްފްލިކސްއިން ކުރިންވަނީ، ރަޝިއާގައި ކުރިޔަށް ރޭވިފައި ހުރި ހުރިހާ ޕްރޮޖެކްޓުތަކެއް ހުއްޓުމަކަށް ގެންނާނޭކަން އިއުލާން ކޮށްފައެވެ. އެހެންނަމަވެސް އެކުންފުނިންވެސް އެންމެ ފަހުންވަނީ ރަޝިއާގެ މިހާރުގެ ހާލަތަށް ބަލާ، އެގައުމުގައި ދެމުންއައި ސްޓްރީމް ކުރުމުގެ ޚިދުމަތްވެސް މިހާރު ހުއްޓާލުމަށް ނިންމާފައިވާކަން ހާމަ ކޮށްފައެވެ.
ނެޓްފްލިކްސްގެ އިތުރުން، މަޝްހޫރު ޓިކްޓޮކުންވެސް ވަނީ މި ޕްލެޓްފޯމުގެ ލައިވް ސްޓްރީމްއާއި އަދި އެ ޕްލެޓްފޯމުގެ ވީޑިއޯ ސާރވިސްގައި ހިމެނޭ ކޮންޓެންޓްތައްވެސް ރަޝިއާގައި ގެނެސްދިނުން ހުއްޓުމަކަށް ގެނައުމަށް ނިންމާފައިވާކަން ހާމަ ކޮށްފައެވެ. ޓިކްޓޮކުން ހާމަ ކޮށްފައިވާ ގޮތުގައި، "ފޭކް ނިއުސް"ތައް ގެނެސްދޭކަމަށް ރަޝިއާ ސަރުކާރުން ދެކޭ ކޮންމެ މީހަކަށް އަދި މީޑިއާތަކުގެ މުވައްޒިފުންނަށް 15 އަހަރުގެ ޖަލު ހުކުމެއް އަންނަ ގޮތަށް ފާއިތުވެދިޔަ ހަފްތާގައި ރަޝިއާގައި ފާސްކޮށްފައިވާ ގާނޫނުގެ ސަބަބުން އެގައުމުގައި އެ ޕްލެޓްފޯރމަށް އިތުރަށް މަސައްކަތް ކުރެވެން ނެތްކަމުގައެވެ.
ރަޝިއާއިން ޔޫކުރެއިންއަށް އެރުމާއި ގުޅިގެން ދުނިޔޭގެ ގިނަ އަދަދެއްގެ ބޮޑެތި ކުންފުނިތަކުންވަނީ ރަޝިއާގައި ހިންގަމުން އައި ވިޔަފާރިތައް ހުއްޓާލާފައެވެ. މީގެތެރޭގައި ކާރު އުފައްދާ ބޮޑެތި ކުންފުނިތައް ކަމުގައިވާ ޓޮޔޯޓާއާއި މަޒްޑާ ހިމެނޭއިރު، މުޅި ދުނިޔޭގައި ފަރނީޗަރު ވިޔަފާރި ކުރާ އިކިއެއަރއާއި، އަދި މާސްޓަރ ކާޑާއި ވިސާރ ކާޑުގެ ޚިދުމަތް ފޯރުކޮށްދޭ ދެ ކުންފުނިވެސް ހިމެއެވެ. އަދި ބައިނަލްއަގުވާމީ ގިނަ މީޑިއާތަކުންވެސް ވަނީ ރަޝިއާގައި ހިންގަމުން އައި އޮފީސްތައް ބަންދު ކޮށްފައެވެ.
