ރަޝިއާއިން ޔޫކުރެއިންއަށް އަރާ، އެގައުމަށް އުދުވާނީ ހަމަލާ ދޭންފަށާފައިވާތާ 9 ދުވަސް ފާއިތުވެގެން ގޮސްފައިވާއިރު، މި ހަނގުރާމާގައި މިހާތަނަށް އާންމުންގެ 350 މީހުން މަރުވެފައިވާ ކަމުގައި ޔޫއެންއިން ބުނެފިއެވެ.
ޔޫއެން ހައިކޮމިޝަނަރ ފޯރ ހިއުމަން ރައިސްޓްސް (OHCHR) އިން ބުނެފައިވާ ގޮތުގައި، އާންމުންގެ މީހުން ވަރުވެފައިވަނީ، ރޮކެޓްތަކުންނާއި މިސައިލްތަކުން ގިނަ ސަރަހައްދުތަކަށް ދެމުންދާ ހަމަލާތަކުގެ ނަތީޖާއެއްގެ ގޮތުން ކަމުގައެވެ.
ޔޫއެން ހައިކޮމިޝަނަރ ފޯރ ހިއުމަން ރައިސްޓްސްއިން ބުނެފައިވާ ގޮތުގައި، މިހާތަނަށް ލިބިފައިވާ މައުލޫމާތުތަކުން މި ހަނގުރާމާގައި މިހާތަނަށް މަރުވެފައިވާ މީހުންގެ އަދަދަކީ 350 މީހުންކަމުގައި ބެލެވިފައިވި ނަމަވެސް، މިއަދަދު މިއަށްވުރެ މަތިވާނެކަމަށް ބެލެވެއެވެ. ސަބަބަކީ އެންމެ ބޮޑަށް ހަގުރާމަ ހިގަމުންދާ ސަރަހައްދުތަކުން އެންމެ ފުރިހަމަ ސާފު މައުލޫމާތު ލިބެމުން ނުދާތީއެވެ.
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފަށާފައިވާތާ 9 ދުވަސް ފާއިތުވެގެން ގޮސްފައިވާއިރު، ރަޝިއާއަށް އަދި މިހާތަނަށް ރަޝިއާގެ ބާރުގެ ދަށަށް ގެނެވިފައިވަނީ ޔޫކުރެއިންގެ އެންމެ ސިޓީއެކެވެ. އަދި މީގެ އިތުރުން، ޔޫކުރެއިންގެ އެންމެ ބޮޑު ނިއުލިއަރ ޕްލާންޓު ވަނީ ރަޝިއާގެ ބާރުގެދަށަށް ގެނެސްފައެވެ. އަދި ދެވަނަ ނިއުކުލިއަރ ރިއެކްޓަރއެއް ރަޝިއާގެ ބާރުގެދަށަށް ގެނައުމަށް މިހާރު ރަޝިއަގެ އަސްކަރިއްޔާއިން ދަނީ މަސައްކަތް ކުރަމުންނެވެ.
ޔޫކުރެއިންގައި ހިނގަމުންދާ ހަގުރާ ހުއްޓުމެއް ނައިސް ކުރިޔަށް ދާއިރުމ ޔޫކުރެއިންގެ ސަރަހައްދުގައި ނޯ ފްލައި ޒޯނެއް ކަނޑައަޅާ ކޮންމެ ގައުމަކީ ހަގުރާމައިގެ ބައިވެރިއެއް ކަމުގައި ބަލާނޭ ކަމުގެ އިންޒާރު ރަޝިއާގެ ރައީސް ޕުޓިން ވަނީ ދެއްވާފައެވެ.
ޕުޓިން އިންޒާރު ދީފައިވަނީ، ޔޫކުރެއިންގެ ވައިގެ ސަރަހައްދަކީ ނޯފްލައި ޒޯނެއް ކަމުގައި ކަނޑައެޅުމަށް އެދި ޔޫކުރެއިން ސަރުކާރުން ނޭޓޯގެ ކިބައިން އެދެމުން ދަނިކޮށެވެ.
އެހެންމަވެސް، ނޭޓޯއިން ބުނެފައިވަނީ، ޔޫކުރެއިންގެ ސަރަހައްދުގައި ނޯ ފްލައި ޒޯނެއް ކަނޑައެޅުމަށް އެޖަމާއަތުން އަދި ވިސްނަމުން ނުދާކަމުގައެވެ.
"ނޯ ފްލައި ޒޯނެއް ކަނޑައަޅާ ކޮންމެ ގައުމަކީ ހަގުރާމައިގެ ބައިވެރިއެއްގެ ގޮތުގައި އަހަރެމެން ވަގުތުން ކަނޑައަޅާނަން. އެއީ ކޮން އޯގަނިޒޭޝަނެއްގެ މެމްބަރެއްތޯ ނުބަލާނަން،" ރަޝިއާގެ ގައުމީ އެއަރލައިންގެ ކުރޫ މެމްބަރުންނާ ބައްދަލުކުރައްވާ ވާހަކަ ދައްކަވަމުން ޕުޓިން ވިދާޅުވެފައި ވެއެވެ.
ޔޫކުރެއިންގެ ސަރަހައްދަކީ ނޯ ފްލައި ޒޯނެއްގެ ގޮތުގައި ކަނޑައެޅުމަށް ޔޫކުރެއިންގެ ރައީސް ޒެލެންސްކީ ގޮވާލައްވަމުން ގެންދެވިނަމަވެސް، އެމެރިކާއާއި ނޭޓޯއިން ބުނެފައިވަނީ، ނޯ ފްލައި ޒޯނެއް ކަނޑައަޅައިފިނަމަ، މި ހަގުރާމަ މުޅި ޔޫރަޕަށް ފެތުރިގެން ދިއުމުގެ ނުރައްކާ އެބައޮތް ކަމަށެވެ.
ނޭޓޯގެ ގައުމުތަކުންނާއި އެމެރިކާއިން، މީގެކުރިން ނިންމާފައިވަނީ، ޔޫކުރެއިންއަށް ސިފައިން ނުފޮނުވުމަށެވެ. އެހެންނަމަވެސް، އެމެރިކާއާއި ނޭޓޯއިންދަނީ ޔޫކުރެއިންއަށް ހަތިޔާރުގެ އެހީތެރިކަން ފޯރުކޮށްދެމުންނެވެ.
