ކުރީގެ ނައިބުރައީސް އަޙްމަދު އަދީބު ޢަބްދުލްޣަފޫރުގެ މައްޗަށް ކުރި 7 ދަޢުވާ ސާބިތުވެ ޖުމުލަ 20 އަހަރަށް ޖަލަށް ލުމަށާއި 2 މިލިއަން ރުފިޔާ އިން ޖޫރިމަނާކުރުމަށް ކްރިމިނަލް ކޯޓުން ޙުކުމްކޮށްފިއެވެ.
އަދީބުގެ މައްޗަށް އުފުލާފައިވާ 7 ދައުވާ ކްރިމިނަލް ކޯޓުން ކުރިން ބޭރުކޮށްލުމުން ހައިކޯޓުގެ އިސްތިއުނާފު މަރުހަލާގައި އެ މަސްސަލަތަށް ކްރިމިނަލް ކޯޓުން އަލުން ބެލުމަށް އެންގުމުން، ކްރިމިނަލް ކޯޓުގައި އަލުން ޝަރީޢަތް ފަށާފައިވަނީ މިދިޔަ ބުދަ ދުވަހުއެވެ. އެދުވަހުގެ ޝަރީޢަތުގައި އަދީބު ވަނީ 7 ދައުވާއަށް އިޢުތިރާފް ވެފައެވެ.
އަދީބުގެ މައްޗަށް އުފުލާފައިވާ 7 ދައުވާއަކީ، ޚިޔާނާތްތެރިވުމުގައި ބައިވެރިވުމުގެ 2 ދައުވާ އާއި މަގާމުގެ ނުފޫޒު ބޭނުން ކޮށްގެން ނާޖާއިޒު ފައިދާ ހޯދައި ދިނުމުގެ ދައުވާ އަކާއި މަގާމުގެ ނުފޫޒު ބޭނުން ކޮށްގެން ނާޖާއިޒު ފައިދާ ހޯދުމުގެ ދައުވާ އަކާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާއެއްގެ އިތުރުން މަނީ ލޯންޑަރިންގެ 2 ދައުވާ އެކެވެ. ދައުވާތަކަށް އެއްބަސްވެ ވަޑައިގަތުމުން އަދަބު ލުއިކޮށްދޭ ގޮތަށް ދައުލަތާއި އަދީބާ އެކު ހެދި އިއުތިރާފުގެ އެއްބަސްވުމުގެ ދަށުން ހުރިހާ ދައުވާތަކަށް ވެސް އަދީބު ވަނީ ކޯޓުގައި ކުރިން އެއްބަސްވެ ވަޑައިގެންފަ އެވެ.
މި 7 ދައުވާގެ ތެރެއިން ޚިޔާނާތްތެރިވުމުގައި ބައިވެރިވުމުގެ ދައުވާގައި 4 އަހަރާއި 9 މަހާއި 18 ދުވަހަށް ޖަލަށް ލުމަށް ވަނީ ހުކުމް ކޮށްފައެވެ. ޚިޔާނާތްތެރިވުމުގައި ބައިވެރިވުމުގެ ދެވަނަ ދައުވާގައި 2 އަހަރާއި 4 މަހާއި 24 ދުވަހަށް ޖަލަށް ލުމަށް ވަނީ ހުކުމް ކޮށްފައެވެ. މަނީ ލޯންޑަރިންގެ 2 ދައުވާއަށް ވެސް 5 އަހަރާއި 11 މަހާއި 21 ދުވަހުގެ ޖަލު ހުކުމާއި 1 މިލިއަން ރުފިޔާގެ ޖޫރިމަނާ ދެއްކުމަށް ވަނީ ހުކުމް ކޮށްފައެވެ. އެހެންކަމުން މަނީލޯންޑަރިންގެ 2 މައްސަލާގައި ޖުމްލަ 11 އަހަރާއި 11 މަހުގެ ޖަލު ހުކުމާއިއެކު 2 މިލިއަންރުފިޔާ އަދީބު އަޢުލަތަށް ދައްކަން ޖެހޭނެއެވެ.
މަގާމުގެ ނުފޫޒު ބޭނުން ކޮށްގެން ނާޖާއިޒް ފައިދާއެއް ހޯދައި ދިނުމުގެ ދައުވާގައި 1 މަހާއި 15 ދުވަހަށް ޖަލަށް ލުމަށް ހުކުމް ކުރިއިރު، މަގާމުގެ ނުފޫޒު ބޭނުން ކޮށްގެން ނާޖާއިޒް ފައިދާއެއް ހޯދުމުގެ ދައުވާގައި ވަނީ 6 މަހަށް ޖަލަށް ލުމަށް ހުކުމް ކޮށްފައެވެ. އަދި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާގައި 3 މަހަށް ޖަލަށް ލުމަށް ވަނީ ހުކުމްކޮށްފައެވެ.
އަދީބު 20 އަހަރަށް ޖަލަށްލާން ހުކުމް ކުރިޔަސް، އޭނާ ތަންފީޒު ކުރައްވަން ޖެހިވަޑައިގަންނަވާނީ 19 އަހަރުގެ މުއްދަތެކެވެ. އެއީ އެ މައްސަލަތަކާ ގުޅިގެން އޭނާ މިދިޔަ އަހަރުގެ ފަހުކޮޅުން ފެށިގެން ބަންދުގައި ހުންނެވި މުއްދަތު ހުކުމުގެ މުއްދަތުން އުނި ކުރުމުންނެވެ.
މިދިޔަ ބުދަ ދުވަހު ބޭއްވި ޝަރީޢަތުގެ އަޑުއެހުމުގައި އަދީބު ވަނީ 7 ދައުވާއަށް އިއުރިތާފްވެ ޚިޔާނާތުގެ ފައިސާ ދައުލަތަށް އަނބުރާ ހޯދުމުގައި އެއްބާރުލުން ދޭނެކަމަށް ވިދާޅުވެފައެވެ. އަދި އެމް.އެމް.ޕީ.އާރު.ސީގެ ބޮޑު ޚިޔާނާތަކީ ކުރީގެ ރައީސް ޢަބްދުﷲ ޔާމީންގެ އިރުޝާދުގެ ދަށުން އޭރުގެ ސަރުކާރުން ރާވައިގެން ހިންގި ޖަރީމާއެއްކަމަށް އަދީބު ވަނީ ތުހުމަތު ކުރައްވާފައެވެ. އަދީބު ވިދާޅުވީ އެމް.އެމް.ޕީ.އާރު.ސީގެ ހުރިހާ މުޢާމަލާތެއް ހިންގާފައި ވަނީ އޭރުގެ ރައީސް ޢަބްދުﷲ ޔާމީނަށް އެނގިވަޑައިގެން އެމަނިކުފާނުގެ އިރުޝާދުގެ ދަށުންކަމަށާއި، އެއީ މުޅި ސަރުކާރު ގުޅިގެން ހިންގި ބޮޑު ސްކޭމެއް ކަމަށެވެ. އަދި މިކަމުގައި ވަރަށް ގިނަ ބަޔަކު ޝާމިލް ވާކަމަށްވެސް އަދީބު ވިދާޅުވެފައިވެއެވެ.
