އަނިޔާގެ ވާހަކަ، ގޯނާގެ ވާހަކަ، ޖަރީމާގެ ވާހަކަ ދެއްކުމަކީ އެންޓި ކެމްޕެއިން ކުރުމެއް ނޫންކަމަށް އެމްޑީޕީގެ ޗެއާޕާސަންގެ މަޤާމަށް ވާދަކުރާ އިމްތިޔާޒު ފަހުމީގެ ސްޕޯކްސް ޕާސަން މުހައްމަދު ވަހީދު (ވައްޑެ) ވިދާޅުވެއްޖެއެވެ.
ކެމްޕޭނުގެ ހަމަލާތައް ހޫނުވުމުން، މިއިންތިޚާބުގައި ވާދަކުރާ އިމޮކޮނޮމިކް މިނިސްޓަރ ފައްޔާޒް ވަނީ ރޭ ކުރުބަޔާނެއް ނެރުއްވައި، އެކަކު އަނެކަކަށް އިލްޒާމު ނާޅުވައި އޭނާގެ ސަޕޯޓަރުން ރީތި ކެމްޕޭނެއް ކުރަން ގޮވައިލާފައެވެ. މިކެމްޕެއިންގައި އެންމެ ގަދަޔަށް އިންތިގެ ޓީމުން ފައްޔާޒަށް ކުރާ ތުހުމަތަކީ ވަޒީފާގެ ބިރު ދެއްކުމާއި، ކޮރަޕްޝަންގެ ތުހުމަތެވެ.
މިކަންކަމާއި ގުޅިގެން ވައްޑެ ވިދާޅުވީ އަނިޔާއާއި، ގޯނާއާއި، ޖަރީމާތަކުގެ ވާހަކަ ދެއްކުމަކީ އެއްގޮތަކަށްވެސް އެންޓި ކެމެޕެއިނެއް ނޫންކަމަށެވެ. އެފަދަ ވާހަކަ ދައްކަމުންދަނީ އެފަދަ ކަންކަން ކުރުމުންކަމަށާއި، ވެރިކަމަށް އައީވެސް އަނިޔާއާއި، ކޮރަޕްޝަންގެ ވާހަކަ އިންތިހާއަށް ދައްކައިގެންކަމަށް ވަހީދު ވިދާޅުވިއެވެ. އޭނާ ވިދާޅުވީ، މިފަދަ ވާހަކަތައް ދައްކަނީ އެކަންކަން ކުރެވިފައިވާތީކަމަށާއި، މިއީ އެންޓި ކެމްޕެއިނަށް ވާނެ ހަމައެއްވެސް ގޮތެއް ނޯންނާނެކަމަށެވެ.
އަނިޔާގެ ވާހަކަ، ގޯނާގެ ވާހަކަ، ޖަރީމާގެ ވާހަކަ ދެއްކުމަކީ އެންޓި ކެމްޕެއިން ކުރުމެއް ނޫން. އެފަދަ ކަންކަން ނުކުރަންޏާ އެވާހަކައެއް މީހުން ނުދައްކާނެ. އަޅުގަނޑުމެން ވެރިކަމަށް އައީވެސް ޔާމީނުގެ އަނިޔާއާ ކޮރަޕްޝަނުގެ ވާހަކަ ދައްކައިގެންކަން ހަނދާން ނައްތާލައިގެން ނުވާނެ!
– ވައްޑެ ވިދާޅުވިއެވެ.
އިންތިހާބު ކާމިޔާބު ކުރުމުގެ ކެމްޕޭންގައި ފެންނަނީ އެމްޑީޕީގެ ހިޔާލުތަފާތުވުންތައް ބޮޑުވެ ދެ ފަޅިން ބަހުގެ ހަމަލާތައް ބަދަލުކުރުމާ އެކު ތުހުމަތުތައް އަޅުވާ މަންޒަރެވެ. ރައީސް އިބްރާހިމް މުހައްމަދު ސޯލިހްގެ ތާއީދާ އެކު ނުކުންނެވި ފައްޔާޒުގެ ކެމްޕޭނަށް ސަރުކާރުގެ ވަސީލަތްތައް ބޭނުންކޮށް، ނުފޫޒު ފޯރުވަމުންދާ ކަމުގެ ތުހުމަތާ އެކު މަޖިލީހަށް އިއްޔެ ވަނީ ކުއްލި މައްސަލައެއް ހުށަހަޅައިފައެވެ.
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ތާއީދު އޮތް އިންތިގެ ކެމްޕޭންގައި އުޅުއްވާ މަޖިލިސް މެމްބަރުން ހުށަހެޅުއްވި މައްސަލައާ ގުޅިގެން، މެމްބަރުންގެ މެދުގައި ހޫނު ބަހުސެއް ހިނގިއެވެ. އޭގެ ތެރޭގައި، މި ސަރުކާރު ގެނައުމަށް މަސައްކަތްކުރީ އެމްޑީޕީގެ ވަކި ފެކްޝަނަކުން ކަމަށެވެ. މި ވާހަކަ އަށް ރައްދު ދެއްވި މެމްބަރުން ވިދާޅުވީ އެ ދަރަޖަ އަށް ޕާޓީގެ ބައެއް މެމްބަރުންގެ މަސައްކަތް ބަލައިނުގަތުމަކީ ހިތާމަހުރި ކަމެއް ކަމަށެވެ.
